Tỉnh daok ieu pataom dom y, bác sĩ di gah tư nhân tame bruk pacang jit

Mesup 27/8, Thủ tướng Phạm Minh Chính, Akaok mban tacei jalan pakat negar pacang caga jit COVID-19 haong kapul ngak bruk di Rajaei hu mai ravang, pachreih ba Đảng bộ, karja haong bhap bini Bình Dương. Di sang iek ruak pakat dunya Becamex, ban sit Thuận An, Thủ tướng taong yaom glaong kham merat di dom y bác sĩ pak ini, caong paglaong ilamu jang saong khan brei dom bác sĩ thau, gam taong ruak COVID-19 gam iek dom ruak karei ka bhap bini. Thủ tướng jeng hu nao ravang labik khik iek saong taong ruak ka dom F0 tal 1 di bruk taong ruak, daok di sang bac Tiểu học Bình Thuận, phường Thuận Giao, ban Thuận An.

mBan tacei jalan pacang caga COVID-19 tỉnh Bình Dương bahrau ba tame ngak bruk Pasak brei thau saong pabak 32 mac ka Tổng đài jalan talei pandiak 1022. Di dom xã, phường, ban sit, langiu jalan talei pandiak, laik phone di urang pan akaok puk palei jeng hu khan brei thau piah ka rahra ieu tuk hu bruk. Tui kuhria dalam dom harei anak tal, dom menuac njauk COVID-19 di Bình Dương meda tagok tal 150.000 urang. Tỉnh daok ieu pataom dom  y, bác sĩ di gah tư nhân tame bruk pacang jit.

Hu gac 2 lô vaccine AstraZeneca labaih 1,4 triệu mbang hu mai tal TP.HCM mesup ini, tui harak pambuak bruk blei 30 triệu mbang di AstraZeneca haong Cty Cổ phần Vaccine Việt Nam (VNVC). Vaccine di AstraZeneca urak ini hu tal 64% dom vaccine COVID-19  dalam taneh ia. Langiu di bruk oh mek laba  taong abih 30 triệu mbang vaccine ini ka Mintri Y tế, VNVC daok sanya bayar abih yaom jien tamuh tabiak dalam tuk blei, taduan mek , ba brei vaccine, tui kuhria tagok tal yaok ratuh tỷ đồng.

Harei 27/8, Huyện ủy Xuân Lộc (Đồng Nai) brei thau, tal urak ini jit ruak Covid-19 dalam huyện daok hu pasang iek. Dalam huyện hu 12/15 xã, ban sit hu tapa jeng bhum hijao', 2 xã bhum katam saong 1 xã 'bhum kanjik'' saong meyah oh hu menuac njom bahrau, ye akaok bilan 9, Xuân Lộc meda hu taong abih xã, ban sit lac bhum hijao'. Rilo jalan ngak samu gauk daok hu peih tabiak yau ye: oh patrun bruk peih ngak sarak 16; ngak catang bruk tui iek menuac, radaih nao tapa, padang rilo jang dom bilai pasang iek di dom labik jaik taphia bhum palei karei…

Tui Pasak kuhria mboh dahlau bruk langik tasik pakat negar, harei 27/8, yaom lac hu hajan di dom labik min di rilo bhum dalam taneh ia, tanut pandiak pa-uh meng 32-41, lac tanut njuak caik hatai sangka, yau ye Hà Nội, Quảng Ninh, Hà Tĩnh, Đà Nẵng, TP.HCM, Phú Quốc (Kiên Giang)… Di tanut pandiak ini, menuac sia meda njauk glaih glar, abih prein tuk tabiak langiu langik pandiak. Urak ini rilo tỉnh, ban dalam taneh ia daok pa-atah di gauk piah pacang caga jit COVID-19, dom menuac njauk tabiak jalan ngak bruk brei padeih padei 15 minit hadei di yaok mon ngak bruk langiu langik pandiak atau dalam labik sre, pabak ginup pandap pacang pandiak saong menyum ginup ia ka rup pabhap.

Bruk taong mbom pametai rup eng di kol (IS) di mblang kapal haoh Kabul negar Afghanistan ngak brei 13 lin Mỹ metai, 18 lin karei njauk rambus; labaih 200 urang Afghanistan metai haong njauk rambus. Tổng thống Mỹ Joe Biden tabiak panuac lac brei duah mek kol taong bom khủng bố. Nhà Trắng brei thau, Mỹ brei tual hala dok meteh gheng tal harei 30/08 piah hadar dom urang metai dalam mbang taong mbom di Afghanistan. 

Trung Quốc daok peih bruk ngak iek mbang klauk ka 3 vaccine pacang Covid-19. Tui Tập đoàn Sinopharm, tapa nan mboh lac siam lagaih, bruk pacang caga ruak di menuac hu tagok jang 30%. Dahlau di nan Sinopharm hu ngak iek mbang klauk ka 3 ka 9.300 urang di Tiểu Vương quốc Ả Rập thống nhất, mboh hu siam lagaih yau hatai caong, oh hu bruk trak damak halei. Urak ini, Trung Quốc hu klauk jaik 2 tỷ mbang vaccine pacang COVID-19 saong meda klauk hu 2 mbang ka taong abih rahra dalam thun ini.

Gah jru tavao châu Âu brei thau, hu peih pasang iek, duah thau bruk vaccine pacang COVID-19 di Moderna mboh yau njom nerak. Dahlau di nan, Japon brei padeih pandar 1 triệu 630 rabau mbang vaccine di Moderna. Min Japon haong Moderna jeng brei thau, ini tok lac jalan ngak piah pacang caga. Kapul 27 taneh ia di Liên minh châu Âu tal urak ini taduan hu labaih 70 triệu mbang vaccine pacang COVID-19 di Moderna, dalam abih tih 460 triệu mbang hu mbaoh tangin haong Hãng jru tavao Mỹ./.

Urang lang: M. Phuong – 27/08 16:58:13