Kapul dam dara halan hatain dong ka mik va bhum ia sua 

mBan tacei jalan pakat negar ka pacang caga bala meng langik tasik –UB negar caga bala meng langik tasik haong duah, daong urang gaok bala hu công điện payua chip tal dom tỉnh, ban bhum Tây Nguyên ka pacang caga ribuk ka 9. Tui nan, dom tỉnh ban samar ba tabiak dom jalan ngak piah khik siam mekre ka menuac sia saong drap ar di bhap bini, caga ba menuac tabiak truh labik kan kandah, tacei pacang khik sang danaok, labik ngak bruk, sang bac, sang iek ruak…; khik caga bruk ngak nong. Gam haong nan, pasang iek dom danao, binek, kavei, abih di nyu lac dom danao praong, khik kajap salamat; caga pandap mbang menyum, caga pacang hajan, ia sua, dauk ia pacang cakak rilo harei. Tui kuhria, meng melam 27-29/10, di labik meng Thừa Thiên Huế tal Phú Yên hu hajan biak praong, meng 200-400mm sa mbang, Bắc Tây Nguyên 100-200mm sa mbang.

Vietnam Airlines bahrau ramik veik tuk vak par dalam harei ni  27/10. Dom mbang par nao, tal  Huế, Đà Nẵng, Quảng Nam, Tuy Hòa (Phú Yên) , Gia Lai, Buôn Mê Thuột (DakLak), Quy Nhơn ( Bình Định, Đà Lạt ( Lâm Đồng) song Khánh Hòa hu peih  avar jang tui kuhria  meng  1 - 3 tuk. Dom  hãng Vietjet, Bamboo Airways song  Pacific Airlines brei thau dalam harei ni  hu ramik veik rilo mbang par kayua langik ribuk. Dom hãng par hu panuac kakei tuai khin nao mai meng dom mblang kapan haoh di labik njauk ribuk ka 9  dalam tuk vak ni bhian pasang iek, duah thau bruk langik tasik song khaw tin meng hãng kapan haoh .

Harei kabroi 26/10, QH daok ngak bruk harei ka 6 saong jeng lac harei puac abih di mbang 1 tui jalan online di Nhà Quốc hội, ban ine Hà Nội. Ala bruk tacei ba di Phaok akaok QH Uông Chu Lưu, dalam jala mesup saong meteh biar hartei nan, QH hu caik tukvak pang dom pathau khan di Rajaei, dom jabat tư pháp; pang pathau khan taong yaom di UB Tư pháp di Quốc hội saong ginum biai online ka dom pathau khan. Tui danak dak mbang nyaom ka 10, QH mbang XIV, mbang 2 QH ginum biai di Nhà Quốc hội meng harei 2/11/2020-17/11/2020. 

Beir  26-10, di  Hà Nội, Hội  Chữ thập đỏ (CTÐ) Việt Nam pakat negar peih bruk taduan pandap dong ka mik va gah kreik negar di dom đơn vị, doanh nghiệp ngan song yaom jien song pandap panda yaom  jiak 4 tỷ đồng. Jeng dalam mbang ni,  Hội  CTÐ Việt Nam pakat negar pambuak bruk song  Cổng thông tin pahla pakat negar  1400 peih bruk nhắn tin "kayua mik va bhum ia sua", tui jalan : UH payua  1403 (20.000 đồng/sa tin nhắn). Bruk ni hu peih tabiak meng harei  23-10 tal  21-12-2020.  

Mesup ini 27/10, 2 sruh container peih tui taok gauk angaok jalan meng ban raya HCM nao Tiền Giang, tuk tal labik tapa huyện Thủ Thừa (Long An) ye paoh tame gauk ngak brei 2 radaih nan khuah. Bala nan oh ngak brei urang halei njauk hagait min min ngak brei jalan gar khang. Anagok dom jalan nao gah Tiền Giang, rilo radaih pataok dak jeng talei, gar jalan dui atah rilo km. Dom radaih ba gauk tame jalan khẩn cấp ngak ka jalan ini jeng gar khang. Gah CS jalan mbak hu mbaok piah rami ramik jalan nao. Tal maong 7 meteh harei 27/10, bruk gar jalan meng hu cadu, dom radaih nduac hu min biak suai damuai.

Nyaom biai pakat glong  y tế dunya mbang ka 12 bahrau peih tabiak di Berlin (Đức) tui jalan online ngan saong kadha praong lac dom jalan ngak piah ba dunya tabiak truh jit ruak  prong  Covid-19. 300 urang  dalam nan hu dom chính trị gia dang akaok, dom urang ilamu haong urang lambaok dom kapul dunya… hu panuac ieu dunya kham merat pambuak bruk patagok pacang cakak Covid-19. Urak ni, bruk pakacah gauk duah jalan ngak tabiak  vắc-xin pacang  Covid-19 dok ba tal kamlah gauk ka yaom  vắc-xin jang yau urang halei bayar jien. Ura ni yaom kaom oh tani tanat  ka dom janih vắc-xin siam labaih 3 USD tal labaih 30 USD/sa mbang song dom urang pachreih tui pren yava  bhap bini dok hu panuac ieu njauk ba tabiak sa yaom kaom dang di tanut mbiah ginup ka dom negar kan kathaot.. 

Danak dak Y tế Khẩn cấp di gah Y tế dunya (WHO) hu panuac ieu châu Âu brei jhul samar bruk mesruh pacang Covid-19 saong bruk kurang prein duah dom urang taom gaok meda jhul jit ruak tame sup. Jit praong di châu Âu dak harei dak ngak kan kandah rilo taneh ia tuk hu urang njaom ruak tagok biak glaong,, ba akaok lac negar Prang. 46 taneh ia châu Âu ala bruk khik ramik di WHO hu tal 46% dom urang ruak di dunya saong hu jaik 1/3 dom urang metai.

Labaih 60 triệu urang  Mỹ nao plaik phiếu dalam tuk dok labaih sa adit tra lac tal harei  palih ruah 3/11. Bruk plaik phiếu di mbang palih ruah  Tổng thống Mỹ thun 2020 hu khan lac glong di abih  dalam 100 thun di  Mỹ. Makna lac rilo urang  Mỹ khang hatai nao plaik phiếu avar kayua suh sah dang cang dalam tuk jit ruak  Covid-19 rah tabiak kan kandah, hu labaih 225.000 urang metai di Mỹ. Tong abih urang nao palik phiếu dalam thun ni tui kuhria hu labaih  150 triệu urang./.

   Urang lang: Hanipha- Mousaphuong- 27/10