Uỷ ban Trung ương MTTQ Việt Nam alin harak pok manyaom 245 urang hu naih gheih 

Mbang ginum biai akaok mintri ngak bruk saong bruk ngak G20 tui jalan online peih tabiak di melam kabroi (10/9 – tui maong Việt Nam). Mbang ginum biai hu brei tapa Harak tabiak panuac di dom akaok mintri ngak bruk saong bruk ngak G20 thun 2020 lac “peih ngak dom siam lagaih dalam abap 21 brei ka taong abih manuac sia”. Tui nan, dom negar brei pambuak bruk khang kajap piah pacang caga jit praong Covid-19, khik kajap bruk lac dom kham marat ngak pasiam kinh tế saong darak pasa ngak bruk meda ramik caik paglaong khang kajap saong bruk ngak hu chất lượng ngak dahlau, ramik veik bruk daong xã hội praong jang piah daong ka yaok urang ngak bruk, dalam nan hu gam dom urang kan kandah, dom urang dalam labik phi chính thức. Việt Nam hu daa hu mbaok dalam angan akaok ASEAN saong akaok mintri Lao động Thương binh saong Xã hội Đào Ngọc Dung hu mbaok tame di akaok tatua Hà Nội.

Meng page harei 11/9, Ban Đà Nẵng meda brei salih ngak tui dom jalan pacang caga jit ruak Covid-19 birau, brei dom sang pablei pandap mbang, kuan pablei pandap, labik pablei salih duh ka bruk mbang, menyum pak di labik nan hu peih veik. Dom sang bac THPT, THCS, pasak pato thường xuyên gilac tame bac veik meng harei 14/9/2020. Yau nan min, karja Đà Nẵng kakei bhap bini takik tabiak truh sang meyah oh njuak bruk tabiak . Breih cuh pateih pacang pabah tuk tabiak jalan, brei khik atah di gauk tatik di nyu lac sa mét.  Oh pataom gauk labaih 30 urang di labik công cộng, langiu jabat ngak bruk, sang bac, sang iek ruak…

245 urang hu naih gheih hu Uỷ ban Trung ương MTTQ Việt Nam, dom ban, mintri, gah Trung ương alin harak pok manyaom di Nyaom biai pacacah pakat negar pok manyaom urang ghieh, bruk siam dalam bhap bini Công giáo mbang ka 5, vaktu 2015-2020 peih tabiak di Hà Nội harei kabroi. Taong abih 245 urang lambaok hu 69 urang saong 9 kapul, lac linh mục, tu sỹ saong giáo dân hu angan je dalam bruk pacacah anit ranam taneh ia di bhap bini Công giáo Việt Nam.  Nan lac dom urang hadah krah, brei mboh dom kham marat ka bruk abih drei duh ka menuac sia, sa hatung hatian gam haong taneh ia, diuk dalam agama, duh ka bangsa piah ba haniem phul ka bhap bini. 

Hadei di 4 harei ngak bruk, biar harei 10/9 var tòa langyah 29 bị cáo pametai manuac saong cagar veik urang jakar ngak bruk karja rah tabiak di xã Đồng Tâm, Mỹ Đức, Hà Nội tamat bruk tangin sua, ndem meyai nao mai. Brei panuac puac abih anak tòa, dom bị cáo brei mboh hatai huac duisa kayua drei ngak metai 3 urang lin công an saong kuk akaok lilau ma-ah biak trak tal baoh sang urang metai nan. Dahlau di nan, urang lambaok Viện kiểm sát khik quyền công tố di tòa brei panuac ka bruk ngak suan hukum saong ba tabiak jalan taong phạt. Dalam kapol urang pametai manuac, urang lambaok Viện kiểm sát iew  Kapol langyah bị cao Lê Đình Công, Lê Đình Chức njauk tử hình; bị cáo Lê Đình Doanh daok guk abih rai; dua bị cáo Bùi Viết Hiểu saong Nguyễn Quốc Tiến daok guk 16-18 thun; Nguyễn Văn Tuyển daok duk 14-16 thun. Hu 19 bị cáo brei salih angan duis “pametai manuac” tapa “ cagar urang ngak bruk” saong njauk brei daok guk takik abih lac meng 18-26 bilan guk gah langiu, glaong abih meng 6 -7 thun guk. Hội đồng langyah brei thau tukvak ngak bruk suai, tal biar harei 14/9 meng tuyên án.

Bier harei kabroi, jabat pato magru quận Nam Từ Liêm (Hà Nôi) brei thau cambaih laih ka bruk sa anek saih tal 3 di sang bac tiểu học Đoàn Thị Điểm njauk klak var di mangaok radiah rok anek saih. Nai gru saong urang peih radieh ba anek saih nao bac biak maong bier, klak tapa bruk trun puac abih piah pasang iek anek saih, yau nan ye hu klak var sa anek saih ndik var di radiah. Patuah di nyu lac anek saih ni eng drei peih pabah mbang radieh tame sang bac salamat. Jabat pato magru quận Nam Từ Liêm hu payua kapul trun ngak bruk haong sang bac Tiểu học Đoàn Thị Điểm ka bruk ni dalam bier harei. Tapa pasang iek brei mbh, bruk rok anek saih di sang bac ba adat tabiak biak catang, min dom urang ngak bruk ni oh ngak tui njauk dom bruk ba tabiak nan ye ba tal ratabiak bruk ni.

Tui urang ngak praong di Kapol y dược Sinopharm- Trung Quốc, tal tukvak ini, hu yaok rituh urang negar Trung Quốc hu klauk jru caga ruak Covid-19 kayua Sinopharm ngak tabiak, gam ngak iek tukvak ka 3 ka urang negar langiu meng vaccin di kapol ini jeng mboh hu siam jang. Akok Công ty công nghệ sinh học Trung Quốc Dương Hiểu Minh brei thau, yaom lac mbiah tal metah bilan 11 bruk bruk klauk jru ngak iek tukvak ka 3 meng brei thau, min urak ini hu jaik 40 negar saong bhum taneh di dunya khin pandar chip atau khin blei vaccin di Sinopharm, ngan saong 500 triệu mbang vaccin.

Urang jakar ngak praong di Cô-lôm-bia brei thau hu takik di nyu 7 urang metai dalam mbang trun jalan melam 10/09 (tui maong pak ni) di ban ine Bô-gô-ta.  Dom mbang trun jalan tamuh tabiak di ban ine Bogota hadei tuk sa urang peih radaih taxi metai dalam tuk njauk cảnh sát cap khik. Urang ni njauk cảnh sát cuh rilo mbang meng phao điện saong metai dalam sang iek ruak. Bruk ni daok ngak ka 55 urang trun jalan saong 93 urang cảnh sát njauk rambuac saong yaok ribau sruh radiah saong labik cảnh sát njauk cuh khuah.

Dom mbang apui khuah glai oh ka bhian mboh di bang Ô-rê-gôn, Mỹ ngak tayak tayiac 5 ban sit saong ba tal bruk urang metai tagok rilo. Hangin khang saong pandiak ngak ka jaik 100 mbang khuah glai ralo labik di gah Pei negar Mỹ, mbang abih jaik 2 trieu hecta. Bang Ô-rê-gôn lac bang khut khat trak di abih tuk taneh glai njauk apui khuah praong dua mbang ban Niu Yoóc. Urang jakar pak nan brei manuac tame tal sang piah iew bhap bini panduan nao labaik karei dahlau tuk pui khuah mai tal dom ban sit. Dom urang ilamu lac, bruk pandiak di baoh taneh ba tal tathak saong thu lagu di gah Pei negar Mỹ ngak hareik hrom saong phun sit tamuh  khang hadei di nan metai thu mbuan apui khuah glai./.

Urang lang: Thu Thảo – Ái Nghiêm – 11/09 10:33:20