Bruk ginum biai hu peih ngak di nyaom biai 

Mbang nyaom ka 4 di Ủy ban Thường vụ Quoc hoi hu peih pakak tuk page ini 11/10. Harak pathau khan pataom veik panuac di cử tri saong bhap bini hu mboh, cử tri caong khin Rajaei, dom palei ba mbuan lagaih dalam bruk pajeng ba pandap pamda piah khik tani tanat bruk ngak mbang, pablei salih. Cử tri brei thau daok rilo urang oh ka taduan hu paok jien daong tani tanat raidiuk; brei mboh haduh hatai ka bruk pato saong bac online…Ngan saong harak pathau khan di Rajaei ka bruk khik iek saong pandar kadung jien bảo hiểm y tế thun 2020, Uỷ ban Thường vụ Quốc hội likau brei pakhang bruk tui iek peih ngak sarak, hukum ka BHYT; hu jalan langyah piah ngak tui saong parilo tagok urang blei BHYT, abih di nyu nan lac dalam tuk jit ruak praong Covid-19.

Dah page harei ini 11/10, Akaok negar Nguyễn Xuân Phúc haong kapul urang Quốc hội labik ka 10 taom gaok cử tri huyện Củ Chi (TP.HCM). Akaok negar pok manyaom huyện Củ Chi ngak siam bruk pacang caga jit, samar pasang iek hu jit ruak COVID-19, ieu pataom rilo gah piah daong ka bhap bini. Tui akaok negar, bruk salih jalan ngak dalam pacang caga jit meng “Zero COVID-19” tapa diukrai siam lagaih salamat lac jalan nao lagaih dalam tuk ban raya HCM hu rilo urang njom saong dom urang mangaok 18 thun hu klauk vacxin mbang ka 1 lac 97%, 70% hu klauk mbang ka 2. Ngan haong huyện Củ Chi urak ini lac “bhum hijao”, njauk ngak pasiam bruk buh jien tame ngak, kham marat daong ka bhap bini saong doanh nghiệp, kham marat lac pasak ngak tabiak janih pajaih phun, pajaih athur tui dom jak jeng di ilamu công nghệ.

Harei 11/10, Metri Y te brei thau ka bruk buh jien tame duk iek ruak Covid-19 ka urang ruak di dom labik y te. Tui nan, urang ruak oh abih jien hagait tuk hu tacei ba duk iek Covid-19. Mentri Y tế  caong khin sở y tế dom tỉnh, ban brei pakhang pasang iek, duah thau bruk peih ngak tui hukum ka yaom kaom ngan saong dom labik y te di labik drei; langyah catang dom bruk ngak suan meyah mboh hu, oh luai ka urang pambak tame jit ruak piah tagok yaom bruk ngak duh ka y te. 

Di mbang nyaom mBan tacei jalan pacang caga jit COVID-19 tỉnh Đồng Nai dah page ini, Tỉnh ủy ieu kakei UBND tỉnh, dom huyện, ban padang jalan khik ramik dom labik brei daok karei, labik taong ruak piah pasang iek jit tui jalan khik ramik kan kandah. Bruk ngak ini piah hadei di 2 adit tra meda biyar viek dom labik bac da-a hu mek ngak labik brei daok karei, labik taong ruak, ngak pasiam viek sang bac, pruh jru pametai anek ruak, tui kuhria di harei 1/11 brei ka dom anek saih dalam tinh mai veik sang bac. Đồng Nai hu 192 sang bac daok hu mek ngak labik brei daok karei, 1 sang bac di ban Biên Hòa hu mek ngak sang iek ruak dã chiến.

       Harei ini, Công an TP. Phan Thiết, tỉnh Bình Thuận brei thau lac birau chap hu sa nyaom urang ngak ja ba-ar dut iek ruak Covid-19, chap khik 4 urang nan lac: Trần Xuân Đạt, Diệp Từ Hiếu, Phùng Thành Tài saong Nguyễn Minh Tiến. Tui hồ sơ, pambak tame bruk di bhap bini khin hu ba-ar dut iek am tinh saong covid-19 piah tapa balai khik pacang jit, dom urang nan ngak ba-ar ja dut iek pablei ka mikva bhap bini.Tapa pasang iek, gah điều tra chap mek 27 blah ba-ar dut iek samar COVID-19 ja. Bruk ngak suan nan daok hu ngak brei cambaic laic, langyah tui hukum karja.

Singapore ba tabiak 3 asal kadha paih pacang caga haong COVID-19, pandar meng harei 11/10. Tui nan, dom urang halei mboh oh siam dalam rup saong dut iek mboh dương tính meda hu taong ruak di sang mayah daok dalam kapul njom bier atau di dom pasak sangka iek glang prein yava. Dom urang halei dut iek mboh dương tính saong mboh rup khang  kadang ye brei daok karei di sang; hadei di 72 maong mayah dut iek viek mboh âm tính meda padieh bruk brei daok karei. Yaok quy định y te urak ini hu salih meng panuac kakei kan kandah tal prein yava, bhap bini tuk taduan hu pathau khan ini, njauk daok karei chip, dut iek samar saong payua kết quả tagok hệ thống. dalam dom taneh ia cak rok patagok, Singapore hu brei thau lac  jak jeng dalam danak dak klauk jru caga COVID-19, dom urang ruak trak saong metai daok di tanut biet, tok hu 2% urang ruak trak.

       Labaih 100 trieu bhap bini Indonesia hu klauk takik abih lac sa mbang vaccine pacang Covid-19, labaih 48% dut saong bruk ba tabiak, dalam tuk nan urang metai trun daok takik abih. Piah pasamar bruk hu klauk jru, Indonesia brei jhul pakhang veik bruk pabak vaccine. Anak bruk jit ruak daok ladam trun, Indonesia brei pacadu dom bruk ngak dalam bhap bini. Yau nan min, dom urang ilamu gah ye te kakei lac Indonesia brei ngak catang dom bruk ba tabiak pasang iek y te, abih di nyu lac di dom pabah mbang negar piah pacang cakak bruk njom tame di dom bien the birau di SARS-CoV-2.

100 tuai tagok sruh kapal haoh di British Airways meng negar Anh par tal Hong Kong tui kuhria atah 12 maong min nyu dui atah tal 36 maong kayua  ribuk Lionrock nao tapa pulao Hải Nam. Kayua ribuk ngak ka 36 mbang par njauk brei padieh, 5 mbang par brei klaak saong 3 sruh kapar salih jalan par. Hong Kong jeng daok caga pacang ribuk bahrau hu angan lac Kompasu daok khang tagok di bhum tasik gah Timur Philippines./.

Urang lang: Thu Thảo -Ái Nghiêm -11/10