Biar harei 22/7, dom urang QH hu mbaok di mbang nyaom ka sa, QH mbang XV ginum biai tui kapul piah taong yaom bruk peih ngak danak dak patagok KTXH, kadung jien karja 6 bilan akaok thun saong dom jalan peih ngak danak dak patagok KTXH, kadung jien karja 6 bilan puac thun. Dom urang QH caong khin Rajaei brei hu pathau khan karei ka bruk kan kandah kayua Covid jeng yau dom jalan langyah cambiac laic, saong hu panuac caong hu sarak daong ka bhap bini, urang ngak, urang pandar urang ngak gaok kan kandah kayua jit ruak. Khik saong pasiam veik bruk ngak di doanh nghiep sit, biak sit, duah bruk ngak ka urang; tui jalan “ daong doanh nghiep yau daong urang ruak” piah daong hu ralo abih ka doanh nghiep, caga blaoh blai ka tukval hadei Covid-19.

Mintri Y tế brei thau, hu labaih 2.000 pandap lac jamraik suak yava, jamraik halang darah, jamraik ngak oxy saong labaih 12 triệu pataih pacang mbaok dom janih hu payua tal kho dã chiến di sang iek ruak Chợ Rẫy piah duh ka bruk pacang caga jit COVID-19 di ban raya HCM saong dom tỉnh gah maraong. Langiu di nan, mintri Y tế jeng hu ba 3 hệ thống ECMO (2 ka TP.HCM saong 1 ka Đồng Nai); 32 jamriak halang darah gam gam; dalam adit ni, mintri Y tế meda pabak veik 500 hệ thống oxy pakat glaong kayua dom doanh nghiệp sanya daong, abih tih lac 560 hệ thống. Mintri Y tế daok brei ba dom pandap panda taong ruak ka dom tinh, bal gah maraong tui panuac likau di Kapul Thường trực đặc biệt di ban raya HCM.

Dalam mbang nyaom yaok bilan di Mentri Ngoại giao tui jalan online rah tabiak di biar harei 22/7, Urang brei panuac di Mentri Ngoại giao Lê Thị Thu Hằng ndem lac, labaih 3 trieu mbang vaccine Moderna di Hoa Kỳ hu ba mai ka Việt Nam puac adit ini. Ini lac sa bruk biak bui sambai dalam tuk jit ruak daok rah tabiak khang di rilo tỉnh, ban gah Meraong negar, abih di nyu lac Ban raya HCM. Dahlau di nan, tapa COVAX, Rajaei Mỹ jeng hu daong ka Việt Nam 2 triệu mbang vaccine Moderna saong dom jru nan hu ba mai VN harei 10/7. Amuk Lê Thị Thu Hằng brei thau, ini lac sa dalam dom bruk ngak hu meng kham merat ginum biai duah vaccine di Viet Nam dalam tukvak tapa.

  Meng harei ni 23/7, Bộ tư lệnh ban raya HCM peih bruk pruh jru pametai anek ruak di dalam ban raya HCM, abih di nyu nan lac dom labik daok hu jit COVID-19 sarau kadhau. Tui nan, hu 2 kapul hu 16 sruh radaih yaok harei nao pruh jru pametai anek ruak di 2 quận huyện dalam ban raya HCM. Tui kuhria, bruk pruh jru pametai anek ruak hu peih tabiak ngak dalam 7 harei. Harei ni, pruh jru di ban Thủ Đức saong huyện Bình Chánh.

Tui Sở Y tế Tây Ninh, jit ruak daok rah tabiak sraw kadau dalam tỉnh, urang njom ruak daok tagok, dom palei hu dom sruh jit birau, ralo meng njom mbak meng tỉnh karei mai. Melam kabroi, tỉnh ini brei thau bruk dut iek ruak PCR dalam harei hu 161 urang dương tính, dalam nan hu 157  urang njom mbak dalam bhap bini. Ban Tây Ninh, Gò Dầu, Tân Châu hu dom labik hu urang F0 dalam bhap bini saong dalam labik ngak kong. Mban Khik iek Khu kinh tế tỉnh Tây Ninh brei pasang iek dom D.N di labik ngak kong –KCX saong brei padeih ngak bruk 7 cong ty kayua oh khik hu bruk ngak tui jalan “ 3 di sa labik”.

Lac sa binah dalam jalan ngak piah pacang njom mbak di virus Delta, ban New York dalam mbang New York di Mỹ ieu klauk vắc xin COVID-19 atau dut iek yaok adit dom urang ngak di dom sang iek ruak dalam ban ini meng harei 2-8. Ini lac mbang camereip karja ban New York ieu klauk vắc xin COVID-19 atau dut iek mboh lac âm tính haong COVID-19 ngan saong dom urang ngak bruk y tế di karja.

Dalam panuac ba tabiak di mesup ini, Jabat khik ramik pandap panda taong ruak Australia brei thau, jabat ini bahrau brei adat pandar vắc-xin caga Covid-19 di hãng jru Pfizer ka uraniah umo meng 12 tal 15 thun. Dahlau di nan, vắc-xin ini jeng hu brei adat pandar ka urang umo meng 16 thun tagok. Yau nan, meng ini, di Australia, vắc-xin Pfizer oh njauk lac hu pandar ka urang praong saoh, bo daok hu pandar ka uranaih umo meng 12 thun tagok.

Jabat tui iek jit ruak Hàn Quốc (KDCA) brei thau, dalam harei kabroi (22/7), taneh ia ini hu 1.842 urang njaom COVID-19 bahrau, glaong di abih kuhria meng tuk tamuh jit saong glaong jang harei hu rilo urang ruak di abih lac harei 21/7. Yaom lac ban ine Seoul haong dom labik jaik taphia daok brei pa-atah di gauk tal pakat 4, lac pakat glaong di abih, min labik ini jeng daok hu tal jaik 1.000 urang ruak bahrau. Dalam nan ban ine Seoul hu 494 urang njaom bahrau./.

Urang lang: A.Nghiem & Thu Thao -23/07/2021