Ndom biai haong khaol dahlak, sa-ai Đặng Công Khanh, Phaok akaok UB bhap bani xã La Ngâu brei thau: dom thun jaik di ini, lingiu di sami samar, hadah krah dalam peih ngak dom danak dak, bruk ngak patagok kinh tế, mikva K’ho daok thau hu labik dang di drei dalam dom  bruk pakacah gauk ngak mbang pablei salih naih jioy, tapa nan, hu mboh rilo kareih camin ngak mbang kinh tế naih jioy, hu jien mek tame yaok rituh triệu đồng sa thun. 

Urak ini, yaok baoh sang pak ini tuk halei jeng sangka tal bruk salih janih phun pala, anek athur raong habar piah hu kein laba. Karei jang dom thun dahlau, mikva tok pala sa janih phun nan lac tangeiy atau padai, ye urak ini jeng angaok mblang taneh nan, mikva thau parabha siam laghaih mblang taneh piah trun pajaih pala rilo janih phun jang, piah patagok jien mek tame angaok mblang taneh di drei.

Sa-ai Đặng Công Khanh, Phaok Akaok UB bhap bani xã La Ngâu, huyện Tánh Linh, tỉnh Bình Thuận bui sambai khan lac: Dalam dom thun tapa, jeng yau dalam thun 2019 ini hu bruk sang ka di Đảng, Karja hu padang ngak cơ sở vật chất, daong brei mesre phun jien piah ka mikva pak ini mbuan laghaih jang dalam bruk cakrok patagok kinh tế baoh sang. Urak ini, mbaok meta palei pala hu hadah hadai, rai diuk di mikva hu patagok.

Yaom lac daok rilo kan kandah tavak tavaiy di gah anak, min mong rah tapa dalam dom thun tapa, hu bruk sangka di Karja, mikva K’ho pak ini kham merat kak kajap haong taneh piah cakrok patagok kinh tế baoh sang. Meng labik lac oh ka thau mong iek njauk ilamu saong daok huac kanda tuk buh jien tame ngak mbang pala drak, tal urak ini mikva khang hatai buh jien tame ngak, đầu tư ka phun pala di drei. Meng nan năng suất saong sản lượng di pandap panda kaya nong dalam dom thun jaik di ini di mikva hu patagok mboh di anak mata.

Gam haong bruk jhul patagok bruk ngak mbang kinh tế baoh sang, dalam dom thun tapa mikva pak ini tuk halei jeng ngak siam dom jalan ba, sarak di Đảng, hukum di . Tui bruk “Taong abih bhap bani gul pataom, dak padang rai diuk ilamu di labik daok”. Dom salih bahrai dalam jalan saneng, jalan ngak di mikva, hu daong ngak brei grap tanat rai diuk di yaok baoh sang pak ini.

Dalam tukvak anak tal, La Ngâu hu ba tabiak jalan ngak patrun kathaot cambaih laih, parabha ka dom urang dalam mban tacei pato daong ka mikva urang kathaot. Tapa dom phun jien mesre meng gilang pariak saong bruk daong ba di karja, ngan haong dom baoh sang oh hu taneh pala drak ye drei daong ka mikva raong limo, daok dom baoh sang kurang phun jien ye drei jak ba mikva mesre phun jien Karja piah ngak mbang, patui veik pato bruk ngak paih daong bruk ngak ka mikva.

Meng dom hagait ngak hu dalam dom thun tapa, mikva K’ho pak ini hu brei mboh bruk cakrok patagok oh padeih di sa xã dahlau diah lac kan kathaot, lạc hậu, suai cakrok patagok. Mikva mboh biak sahnang hatai, dak jia jang tame Đảng, Karja saong nan lac jalan nao khang kajap piah ka mikva patui jalan patagok bruk ngak mbang pala drak, dak harei dak paglaong rai diuk, ba gauk dak padang puk palei dak harei dak nao tagok./.