Di Bà Rịa – Vũng Tàu bahrau peih bruk jao pok jien ka 50 anek saih lac urang kamei bangsa takik

Tui Mban tacei jalan pakat negar ka bruk pacang caga bala meng langik tasik, hajan ribuk praong kayua áp thấp saong langik la-ar di bhum kreh negar ngak takik abih 11 urang metai saong lahik. Meyah kuhria tame 2 urang metai di tỉnh Lào cai meng harei 6/10 ye taong abih urang metai saong lahik kayua ribuk mbang ini, kuhria tal biar harei 8/10 lac 13 urang. Pasak Pacang caga bala meng langik tasik brei thau gam gam ka ribuk di bhum kreh negar saong Tây Nguyên saong ribuk mbuan dui atah rilo harei anak tal di Trung bộ. Dom tỉnh palei di bhum kreh negar brei panduon ba, nao daok labik karei abih tih 3.250 baoh sang ngan saong 10.994 di dom labik ia dauk dalam, mbuan glut jaleik taneh.

Tui mintri Y tế, mesup ni 9/10, Việt Nam oh hu urang bahrau halei njauk ruak Covid-19 . Urak ni hu 1.023 urang ruak hu taong abih ruak. Di ban raya HCM, UBND ban raya bahrau pandar urang dang akaok dom sở, dom ban, dom gah, akaok Ubbhap bini dom quận, huyện, phường, xã, ban sit peih ngak siam bruk pacang caga jit ruak. Tui nan lac cuk patiah pacang mbaok tuk tabiak langui sang, di dom tỉnh ban song angaok jalan mbak nao mai di bhap bini patrun patakik taom gauk rilo menuac. Sở Y tế ban raya HCM ieu dom tỉnh Tây Ninh, Bình Dương, Bình Phước, Bà Rịa - Vũng Tàu, Đồng Nai, Long An song Tiền Giang taduan chuyên gia mai tỉnh drei brei dok karei tui hukum, oh brei dok karei di ban raya HCM

Mblang kapal haok Dunya Cần Thơ birau taduan kapal haok ba 247 bhap bini Viet Nam meng Malaysia mai negar. Bhap bini di kapal haok dalam nan hu uranaih umo la 18 thun, urang taha umo, urang kumei metian, urang ruak, urang ngak abih tukvak pambuak bruk, sinh viên oh hu labik daok kayua KTX kareik pabah mbang saong dom urang biak kan kandah karei. Hadei tuk mai Viet Nam, dom bhap bini hu dut iek prein yawa saong hu Mban tacei ba jalan pacang, caga jit Covid-19 Bộ tư lệnh quân khu 9 ba mai labik daok karei tui bruk ba tabiak di Hậu Giang saong Vĩnh Long.

Di Bà Rịa – Vũng Tàu, Kapul VinaCapital Foundation song kadung jien bac Vừ A Dính bahrau peih bruk jao pok jien ka 50 anek saih lac urang kamei bangsa takik di 21 bangsa mai meng 36 tỉnh dalam negar, bahrau pakacah tamat trung học phổ thông pakat negar. Meng thun 2010 mbiah tal ni, danak dak hu jao pok jien bac song pato pakai kỹ năng ka 100 anek saih lac urang kamei, dalam nan hu 50 adei di tuk vak 1 hu tamat đại học, cao đẳng, rilo adei gilac mai palei piah ngak bruk dong ka bhap bini .

Harei ini 9/10, Công an ban Phan Rang - Tháp Chàm, tỉnh Ninh Thuận daok duah thau ngak brei cambaic laic bruk ba tal sa anek saih bac tal 4 sang bac tiểu học Kinh Dinh, TP.Phan Rang - Tháp Chàm metai tuk daok mein di mblang bein jaik chung cư C2 di phường Thanh Sơn, TP.Phan Rang - Tháp Chàm.

Tuk nan, adei Hà Trương Đ.K ma-in saong ayut di mblang bein ye labuh tame got điện gom truac hadah saong metai. Camereip lac kayua điện giật. Tui bhap bini di dom khu chung cư di phuong Thanh Sơn, hu biak rilo got điện gom menyek dalam mblang bein hu talei điện laih trun biak mbuan gaok bala.

Uỷ ban bầu cử Mỹ brei thau, yaom lac dok labaih 3 adit tra jeng tal harei palih ruah (3/11) min hu 6,6 triệu urang nao palih ruah avar, bruk ni brei thau hu sa tỷ lệ urang hu mbaok tame palih ruah di ứng cử viên đảng Dân chủ Joe Biden song Tổng thống Donald Trumph. Sa dalam dom makna bo urang nao palih ruah avar tagok glong kayua lac hu bruk pasalih brei adat ka urang nao palih ruah avar atau meng harak baar di dom bang piah patrun bruk njom mbak di jit Covid 19.

Srau kadau chính trị di Kyrgyzstan daok rah tabiak mboh having akok, takik abih hu 3 kapol chính trị lac khin tagok pan akaok negar ini. Urak ini, taneh ia ini brei kareih pabah negar kayua sraw kadau. Yaok kapol jak gauk trun jalan ralo, tame meblah dom sang glong rilo tal labik ngak bruk karaj, chap urang jkar rajei brei padeih bruk. Dahlau dom bruk rah tabiak ngak sraw kadau bruk chính trị Kyrgyzstan, Tổng thống taneh ia ini Sooronbai Jeenbekov sahaneng dom gar cagar veik kham mek quyền lực oh njauk.

Israel song Jordan hu mbaoh tangin tame harak brei adat par tapa bhum langik di gauk. Tui nan, dom mbang par di dom negar hu rah tabiak meng 23tuk tal 6tuk mesup ( tuk vak pak ni) dom harei dalam adit , tuk brei adat hu tagok tal 12 tuk dalam harei puac adit. Mintri pajeng ba Israel brei thau, Israel song Jordan hu mbaoh tangin tame sarak siam mekre dalam thun 1994. Dom mbang par tapak di 2 negar jiak tapen hu peih ngak rilo thun tapa min oh pandar bhum palei di gauk tal dom mbang par tal dom labik karei karei ./.

Urang lang: Hani Pha – Ái Nghiêm – 09/10 10:49:52