Tapuk pato bac tal 1 di thun bac bahrau

Tui yaom ba tabiak di dom nhà xuất bản (NXB), sa bộ tapuk bac da-a njauk adat di Mintri Pato Megru lac oh tapa 200.000 đồng. Min anak meta mboh lac, rilo amaik ame hu anek tame tal bac 1 njauk buh tabiak yaom jien rilo jang yaok mbang kayua brei blei tui dom tapuk daong pabak bruk bac da-a saong pandap pandar ka bruk bac da-a.

Daok dom tal bac 2 tal tal bac 12 urak ini jeng daok bac tui tapuk di danak dak klak kayua NXB Giáo Dục patabiak. Yaom 1 bộ tapuk di tal bac 8 lac 135.000 đồng. Min 1 amaik ame hu anek bac tal 8 brei thau lac hu anai gru ieu blei rilo jang mboh biak huac.

Hu thau, hu 39 janih tapuk bac da-a saong tapuk daong pabak bruk bac da-a pacap brei blei, daok 17 janih tapuk karei lac eng drei pilih ruah. Abih tih yaom jien di tapuk pacap blei lac labaih 755.000 đồng, daok tapuk pilih ruah piah blei tui hatai lac 434.000 đồng. Kuhria abih 2 janih nan lac jaik 1,2 triệu đồng. Ini bahrau lac jien tapuk, oh ka ndom tal dom janih jien akaok thun bo 1 anek saih trung học njauk blei yau ye khan ao, jien ia hacih, jien vệ sinh, jien payua radaih, jien daong bán trú, jien bac da-a...

Di dom tal bac pakat trung học, abih di nyu lac tal puac pakat, yaok pluh janih tapuk tham khảo hu gru ieu amaik ame blei, saong gru pandar bài tập, ngữ liệu dalam tapuk nan piah pato, piah brei bài ngak. Bruk ini pacap amaik ame njauk blei tapuk ye anek meng hu tapuk bac.

Karei jang pakat tiểu học oh hu “siphau bài tập in" min môn bac halei jeng hu gam tui dom janih tapuk bài tập, pasram ngak toán tapa Internet, ngak toán tui jalan pato bac tích cực, peih bruk pasang iek, taong yaom prein bac da-a, yaih khan bộ đề thi...

Bruk lagaih di siphau “bài tập in” lac patak pataom hu tukvak, pato pasram ka uraniah hu rilo jang daok ngak ka dom sang bac maong iek "vở in" lac janih oh kurang hu di anek saih. Dom anek saih oh blei tapuk oh tui hu jalan pato bac di anai gru. Oh lac gru halei jeng takre pandar siphau “bài tập in” min bruk nan daok jeng bruk yau Yuan lac "luật bất thành văn" bo dom gru pato oh ngak karei hu.

Daok ngan saong dom amaik ame lac urang ngak, ye tagok jang 50.000 đồng dalam pok jien blei pandap ka anek bac jeng lac sa naong trak.

Anak bruk yau nan, ong Thái Văn Tài (akaok Vụ pato pakai tiểu học – Mintri Pato Megru) ndom lac, Mintri Pato Megru oh tabiak bruk pacap anek saih tiểu học njauk blei tapuk daong pabak bruk bac da-a. daok ngan saong tal bac 1 thun ini, Mintri Pato Megru hu harak payua dom Sở Pato Megru brei thau ka bộ tapuk bac da-a di 8 môn bac bắt buộc tui danak dak pato pakai phổ thông 2018. Lingiu di nan daok hu 1 môn bac pilih ruah tui hatai di drei lac Ngoại ngữ 1 (sap Anh). Dom tapuk daok langiu angan ini jeng oh lac bruk ba tabiak di mintri pato megru, dalam nan hu siphau bài tập in, pandap ngak toán, sap Việt. Min rilo gru pato mboh lac meyah oh pandar siphau bài tập ye brei hu tacei pato meng văn bản ka nyu cambaih laih meng Mintri Pato Megru saong dom Sở Pato Megru, Jabat Pato Megru. Kayua lac ngan saong gru pato, mban giám hiệu pilih ruah tapuk halei brei pato tui tapuk nan./.

Lang sap Mousa Phương – 10/09