Piah pachreih bruk rivang main, yaom harak vé radaih pui trun khang meng harei 21/5 tal 15/8

Page ini 19/4, Mban Tacei jalan pakat negar pacang caga jit Covid-19 brei thau, hu 1 urang birau njom ruak Covid-19 lac urang ka 2.785, lac urang mai meng negar Nhật Bản hu brei daok karei pak Đà Nẵng. Yau nan, kuhria tal page ini, Viet Nam hu 2.785 urang njom ruak Covid-19, dalam nan hu 1.570 mbang urang njom ruak dalam negar. Kuhria abih tih urang hu taom gaok jaik saong tame negar meng bhum hu jit ruak daok iek ruak lac 40.150 urang. Pambuak tal bruk klauk jru vaccine caga ruak Covid-19, kuhria tal biar harei 18/4hu klauk vaccine Covid-19 mbang 1 saong 2 di 22 tỉnh, ban ka 79.182 urang.

Mboh lac jit ruak Covid-19 di Campuchia daok sarau kadhau, akaok mintri Y tế tế ieu kakei Viện Pasteur padang bilik dut iek Covid-19 di ban Hà Tiên, tỉnh Kiên Giang. Urak ni Đồn biên phòng pabah mbang negar pakat dunya Hà Tiên pambuak haong dom kapul daok khik dom bilai di jalan tapen negar di mangaok tasik saong di jalan haluk. Pak ni hu 5 labik brei daok karei pataom gauk hu prein taduan 720 urang; urak ni daok brei daok karei pataom gauk saong taong ruak ka 161 urang.

Pasak Kuhria mboh dahlau bruk langik tasik negar brei thau, langiu tasik gah Đông Philippines daok rah tabiak ribuk khang pakat 17, angan dunya ieu lac Surigae. Ribuk khang nao suai tui gah Tây Bắc, meda salih jalan nao gam, ribuk khang pakat 17. Dalam harak payua dom tỉnh tapen tasik meng Quảng Ninh tal Cà Mau, Mban tacei jalan Pakat negar pacang caga bala meng langik tasik iew dom palei brei tui iek catang dom khaw tin ka ribruk, khan brei dom gaiy gilai daok ngak angaok tasik thau piah pacang caga, khik hu salamat.

Dom gah pajeng ba jalan pasei brei thau, piah pachreih bruk rivang main, yaom harak vé radaih pui trun khang meng harei 21/5 tal 15/8. Công ty cổ phần pajeng ba jalan pasei Sài Gòn trun tal 40% yaom harak vé dom sruh radaih pui labik gah maraong. Tui nan, dom labik jalan Sài Gòn - Đà Nẵng, Sài Gòn - Quảng Ngãi, Sài Gòn - Quy Nhơn, Sài Gòn - Nha Trang, Sài Gòn - Phan Thiết, tui jalan nduac saong tukvak blei harak aval, tuai damuai meda hu trun 10-40%. Taphia di nan, tuai blei harak vé pataom rilo manuac meng 5 urang tagok hu trun yaom 2-14%. Tuai damuai blei harak vé gam nao gam mai hu trun 7-10% yaom vé ka mbang mai.

Harei 18/4, di Ban raya HCM rah tabiak harei jum pataom ilamu dom bangsa Viet Nam, Lào saong Campuchia mbang ka 9 ngan saong rilo bruk chreih chrai bui sambai, pachreih hu jaik 400 sinh viên dom bangsa hu mbaok. Harei jum pataom hu padang dom tiểu trại saong labik parang pandap di dom bangsa Cam, Kinh, Lo, Khmer saong Lào, Campuchia. Dom sinh viên ngui cuh khan ao dom bangsa yaih khan kaya mbang menyum, dom pandap thủ công, dom ilamu siam ghieh karei, kadha main di bnagsa drei saong ayut jeng yau tuai damuai.

Rajaei Ấn Độ hu tabiak adat pakauk pandar oxy tame bruk công nghiệp piah ieu pataom prein ka bruk taong ruak Covid-19. Ni lac sa dalam rilo bruk ngak samar drak di Ấn Độ piah langyah bruk njom jit ruak Covid-19 daok biak samar drak. Adat pakauk meng harei 22/4, dalam tuk dom urang njom SARS-CoV-2 di Ấn Độ tagok rilo dalam 40 harei tapa, ngak ka gah y tế negar ni laik tame bruk quá tải. Harei 18/4, Ấn Độ brei thau lac hu biak rilo urang njom virus SARS-CoV-2 dalam harei, lac 261.500 urang.

Jabat jalan kapal haok saong vũ trụ Mỹ (NASA) brei thau, mbang par akaok meti meng jamriak di sa baoh hình tinh karei lac patuh Apui rah tabiak tukvak 17 tuk 30 minit harei ini tui tukvak di Viet Nam. Tui nan, kapal haok Ingenuity trak 1,8 ki-lô-gam par glaong 3 mét dalam langik, paar rilo gah, thaok binguik saong par trun pataok di mbaok taneh. Tui kuhria kapal haok In-giơ-niu-ơ-ti par abih tih dalam 40 giây. NASA brei thau, hu peih livestream tapak, klak rabah thaok binguk saong dom bruk ngak di urang ilamu saong kỹ sư, tuk anek manuac mbang akok meti peih kapal haok meng năng lượng di hành tinh karei.

Mintri Y tế Ai Cập brei thau hu 11 urang metai saong 98 urang njauk rambuac dalam bala radaih pasei di tỉnh Qalioubia. Dahlau di nan, Ủy ban jalan pasei negar Ai Cập brei thau hu 4 toa di radaih pasei nduac gah jalan pasei Mansoura njauk blact baoh. Urak ni radaih pui gam haong 8 urang ngak di radaih pui njauk cap khik piah pasang iek. Ni lac bala jalan pasei ka 3 rahtabiak di gah negar bhum Bắc Phi ni dalam tukvak jaik di ni. Bilan dahlau, sa bala jalan pasei biak trak rahtabiak di gah maraong Ai Cập, ngak ka takik di nyu 20 urang metai saong jaik 200 urang njauk rambuac.

Urang lang: Ái Nghiêm – Thu Thảo – 19/04 10:25:35