Ka sa lac ruak meta: Sadang dalam darah glong ba tal dom rak ala meta barah. Lavik lavik harei, meta di urang ruak me-ik sadang nyu sabil atau trak jang, meda ba tal sup meta. Langiu di nan, dom ruak karei ngak brei meta oh maong mboh cambaih…jeng mbuan rah tabiak.

Mikva saong grauk ayut brei nao iek ruak meta, takik di nyu sa thun sa mbang. Meyah mboh meta mesup atau pandik, brei nao iek ruak chip piah thau prein yawa rup drei yau habar nye!

Ka dua lac ruak tim mạch: Yaom lac dom ruak karei gah tim mạch yau tagok limek dalam darah, tagok darah, khang rak darah ngoại vi ba tal gar darah lac bruk kan plaih njiak hu di ruak me-ik sadang, min oh njauk lac oh hu jalan pacang caga dom ruak nan.

 Ka klau lac ruak gah thần kinh: Ini lac ruak avar di abih saong bhian mboh kayua ruak me-ik sadang. Kuhria gam pandik, pran, pandiak di takai, baoh hatai megai saong suak yava oh tani tanat, atau pacah ia hauk…

Pasang iek sadang dalam darah brei sumu, khik hacih sa-at rup pabhap saong plaak takai yaok harei lac jalan ngak siam di abih piah pacang caga ruak gah thần kinh. 

Ka pak ruak thận: Sadang dalam darah glong ngak ka ruak rak darah dalam thận, meng nan ngak trun bruk hlang di baoh thận, gaok mai nyu ngak brei suy thận.

Pasang iek siam sadang dalam darah saong huyết áp, pambuak saong bruk mbang takik sara, takik đạm, takik lamek. Juai var nao dut iek ia me-ik piah thau ka thận.

Ka lime lac ruak nhiễm trùng: Sadang dalam darah glong lac lagaih ka vi khuẩn cakrok saong ngak trun prein pacang ruak dalam rup, ba tal nhiễm trùng di rilo labik dalam rup.

Piah plaih dom ruak tamuh tabiak kayua sadang dalam darah tagok glong, brei khik sadang dalam darah sumu saong khik brei rup pabhap hacih sa-at, abih di nyu lac dom labik mbuan njom anek ruak yau pabah, tagei, labik melau di kumei, likei atau labik  me-ik. Meyah mboh yau nhiễm trùng yau pandiak, rup pabhap mbau karei, me-ik mboh pandik, hu darah…njauk nao iek ruak chip./.

Urang lang: Ai Nghiem - 28/10/2021