Meyah dahlau deih, ngan song tapon limo labaih pluh drei di drei, saai Võ Thanh Dũng dok di xã Tân Công Chí, huyện Tân Hồng harei harei glaih glar nao duah labik dar khak limo kubau. Min urak ni oh daok lac yau nan, khak yaok harei hu patom veik, cambu thu bloh tame bao piah pablei. Tui yaom yaok bao khak meng 16 tal 20 kg, urang rong meda mek hu meng 20 tal 25 ribau đồng. Kuhria taeng jien pablei khak, yaok bilan saai Dũng duah hu labaih 500 ribau đồng. Yaom jien ni saai bayar jien điện, jien ia atau blei hareik, phun tangei ka limo mbang, dong ka saai patrun hu jien pandar cai ka boh sang. Saai Võ Thanh Dũng khan lac:

Dahlau deih kuac lubang taphia nan, bloh klaak tame nan oh ngak hagait. Drei caik tame nan tal tuk thu drei cuh klaak. Urak ni hu urang blei nan ye drei cambu drei pablei. Urak ni urang blei 21 ribau đồng sa mbao, dalam 1 adit, 2 adit urang mai blei sa mbang       

Meng bhian randap klak nerak trun ribaong, dahlau daih, rilo sang raong kubau limo di Đồng Tháp dok klaak khak trun ia. Meng nan, nyu ngak ka alam môi trường nerak tachauk trak. Meng di tuk hu urang blei, bhap bini di labik ni samar patom mek khak limo piah pablei, nan ye langyah hu bruk môi trường dalam raong glang di puk palei. Meng ngak siam bruk patom mek khak limo bo di xã Tân Thành B, huyện Tân Hồng, karja oh dok pandik akaok anak bruk dom boh sang klak nerak ban glai ban klo. Urak ni, xã jeng mek hu tanut chuẩn xã palei pala bahrau, dalam nan hu tanut ka môi trường. Ong Võ Vă Thoàn, Phaok kaok UB bhap bini xã Tân Thành B, huyện Tân Hồng khan lac:

Khak limo yaom lac nyu ngak nerak tachuak alam môi trường tuk hajan ye urang oh cambu, urak ni drei OH ka hu dom lò xử lý. Urak ni urang nong patom mek bloh urang nong meda tame bao pablei. Urak ni sa bao urang nong pablei hu 15 ribau tal 20 ribau đồng jeng hu jien pandar cai.

Hu thau, khak limo hadei di tuk patom mek, hu pablei ka dom po vựa. Hadei di nan khak limo ni hu pablei veik ka urang pala phun lavik thun di dom tỉnh  gah Đông Nam bộ, Tây Nguyên. Khak limo ni hu pandar gam tui dom janih khak vi sinh meda dong ka phun song taneh patagok, dak harei dak siam ka môi trường, patakik bruk pandar khak hóa học. Tui rilo po vựa ye khak hữu cơ urak ni lac janih khak daok hu urang nong takre. Oh lac langiu tỉnh bo khak hữu cơ dok hu pandar rilo dalam dom bein phun mbang boh yau cam, quýt di huyện Lai Vung, Châu Thành song huyện Cao Lãnh. Ong Trần Thanh Phong, sa po vựa khak limo di ban sit Sa Rài, huyện Tân Hồng, Đồng Tháp lac:

Patom mek di labik ni, gam patom gam puh ramik haci hacih. Hulin patom mek di labik ni bloh lin nao tal Tây Nguyên, piah ka mikva di Tây Nguyên buh ka cà phê song am riak kalu. Di Tây Nguyên pandar biak rilo, urak ni darak pasa biak caong hu khak limo ni. Drei blei di mikva tui yaom darak pasar. Drei blei di bein ni, di labik ni tal labik karei.

Yaom lac bahrau tagok khang dalam dom thun jiak di ni, min bruk patom mek (menuk ada) khak limo kubao di tỉnh đồng Tháp piah ngak khak pandar dalam bruk ngak nong hu dong patrun ô nhiễm môi trường dalam bruk raong menuk ada, athur rong. Bruk ni gam hu paglaong jien mek tame ka urang rong glang gam pasiam môi trường, abih di nyu nan lac labik palei pala. Tapa nan, patrun kanyah jak meng bruk rong glang tal pren yava, rai diuk bhap bini dalam palei./.