Bhap bini Hải Dương mek darah dut iek ruak

Mesup ini 24-2, ban sit Hải Dương (tỉnh Hải Dương) peih bruk mek mẫu dut iek COVID-19 ka labaih 7.000 menuac mbuan njom mbak di 25 xã, phường dalam ban sit. Dahlau di nan, harei 23-2, ban sit Hải Dương hu panuac ieu taong abih dom xã, phường dalam ban sit peih bruk mek mẫu dut iek COVID-19 ka rilo menuac. Tapa pasang iek hu jaik 7.000 menuac mbuan njom ruak di 25 xã phường dalam ban sit. Dom menuc dalam 1 baoh sang hu mek mẫu 1 mbang blaoh piah khik kajap bruk mek mẫu sa mbang haong gauk.

Tui khau tin meng jabat di Mintri Công thương, piah khik hu dua bruk lac gam pacang caga jit ruak gam pasiam veik saong cak rok patagok kinh tế - xã hội, mintri hu harak payua Thủ tướng rajaei ka bruk lang talaih dom kan kandah ka bruk pajeng ba pandap panda saong pachreih bruk blei pandar kaya nong kayua njauk kan kandah di jit Covid-19. Tui panuac khan di dom doanh nghiệp di tỉnh Hải Dương, bruk pandar dut iek Covid-19 di mintri Y tế dalam tuk pajeng pandap panda hu rilo labik oh ka lagaih, ba tal bruk kaya nong pataom veik jeng mbuk saong oh pablei tabiak negar lingiu hu. Adat ni nyu ngak kan kandah tal kaya nong saong rilo janih pandap karei.

Tổng CTy padang ngak patagok jalan nduac drah samar Việt Nam (VEC) bahrau brei thau ka bruk pasiam veik  hadei di tuk kapal ginuh jaleih takai gheng tatua. Tui Tổng CTy padang ngak patagok jalan nduac drah samar Việt Nam (lac po padang ngak jalan nduac drah samar Bến Lức - Long Thành), tui kuhria oh ka ginup abih, bruk kapal ginuh cần cẩu padang ngak takai gheng P16 di tatua Phước Khánh, di danak dak jalan nduac samar drah Bến Lức - Long Thành ngak brei khut labaih 20 tỉ đồng. Bruk ginuh nan ngak brei taong abih cẩu tháp duh ka bruk padang ngak takai gheng P16 jaleih trun saong laik trun kraong. Labik pacang gaok paoh gah ala di dầm ngang ala takai gheng P16 nyu pacah tal bêtông khik caga. Urak ini, po padang ngak saong dom gah pambuak tal daok samar pasang iek, taong yaom bruk khut khat, pambuak gauk duah thau, pasang iek, taong yaom.

Meng di puac thun 2020, gah ngak nong Sóc Trăng hu pataom prein caga ka bilan Đông Xuân salamat anak bruk langik tasik oh lagaih, pandiak bhang, njom mbak meda tal aval. Tapa nan, tỉnh Sóc Trăng hu kakei bhap bini trun pajaih aval jang labaih sa bilan piah tuk yuak laik tame tukvak dahlau, dalam saong hadei di Tết Nguyên đán, patakik dom khat lahik kayua njauk kan kandah di pandiak bhang, njom mbak tabung glaong dalam bilan 3 saong bilan 4. Tỉnh jhul samar bruk salih janih phun pala, trun taneh pala drak  vụ 3, patagok taneh pala phun kayau takik pandar ia yau ye njam patam, tangei, hareik (ka kubao, limo), dom janih ritak, baoh kayau hu maong lac bruk ngak lagaih, abih di nyu nan lac dalam bilan thu saong bilan pandiak, njom mbak daok ngak kan kandah di rilo labik dalam tỉnh.

Mesup ini 24/2,  radaih buýt 27 BKS 51B-206.78 daok nduac angaok jalan meng Bến Thành (Quận 1) nao mblang radaih An Sương (Quận 12) TPHCM tuk nao tal labik jalan lubang An Sương ye nyu khuah. Bruk khuah nan oh hu thei njauk hagait, min radaih buýt khuah abih daok veik talang pasei. Gah cảnh sát Pacang khuah padam khuah samar hu mbaok padam pui, pacang cakak labik ini piah pasang iek, langyah. Hu thau, radaih buýt nan peih meng gas.

Harak pathau khan “siam lagaih bruk ngak saong Xã hội thun 2021” bahrau abih di gah Lao động dunya (ILO) brei mboh: dom bruk ngak di dunya hu tagok tal 5 mbang dalam pluh thun tapa. Bruk patagok ni brei mboh njauk hu ndom biai nao mai ka sarak dunya saong pambuak gauk dalam sarak rami ramik piah ba mai kein bruk ngak lagaih saong jhul patagok doanh nghiệp khang kajap jang. Pathau khan pataom tame dua janih lao động số chính. Sa lac dom nền tảng pandar pamaong tame di mangaok web, lac janih bo di pak nan urang ngak ngak bruk meng atah meng online. Dua lac dom bruk ngak pamaong tame vị trí, ngan haong janih ni dom urang yau ye urang peih radaih taxi atau urang jao pandap yaok harei, bhian ngak bruk di 1 labik.

Thái Lan harei ini taduan 317.000 mbang vắc-xin  caga Covid-19 camereip abih, dalam nan hu 117.000 mbang di hãng Át-xtra Dê-nê-ca (AstraZeneca) haong 200.000 mbang di Xi-nô-vắc Bai-ô-tếch (Sinovac Biotech). Thủ tướng Thái Lan Pra-dút Chan-ô-cha (Prayuth Chan-o-cha) brei thau, meda peih bruk klauk vắc-xin caga Covid-19 ka dom menuac njauk klauk dahlau, rilo meng lac urang ngak gah y tế daok di labik pacang jit di puac adit ini. Tal urak ini, Thái Lan hu kakei blei 2 triệu mbang vắc-xin di Xi-nô-vắc Bai-ô-tếch. Lingiu  200.000 mbang taduan hu di harei ini, Thái Lan daok taduan 800.000 mbang di bilan 3 saong 1 triệu mbang daok veik di bilan 4.

Gah pajeng ba meng kapal haoh Liên bang Mỹ (FAA) harei kabroi hu panuac ieu pasang iek chip dom sruh ahaoh Boeing 777-200 hu jamriak PW4000 hadei di tuk 1 sruh kapar haok janih ni gaok lỗi jamriak saong njauk par trun samar drah. Dahlau di nan, harei 20/2, sruh Boeing 777-200 di gah pajeng ba jalan kapal haok negar Mỹ (United Airlines) pajeng 231 tuai saong 10 urang ngak dalam kapar njauk par trun mblang kapar haoh dunya Đen-vơ (Denver) di bang Cô-lô-ra-đô (Colorado) tuk gaok kan kandah di jamraik. Patuah di nyu, lac bala ni oh ngak ka menuac sia mangaok kapal haok njauk hagait. Hadei di tuk rah tabiak bala, harei 22/2 tập đoàn Boeing hu brei brei thau lac taong abih 128 sruh ahaoh Boeing 777 hu pagam jamraik PW4000 meda brei padeih par./.

Urang lang: Thu Thảo - M.Phương - 24/2/2021  15:39:48