Akok negar Nguyễn Xuân Phúc  ndem biai haong Tổng thống Liên bang Thụy Sỹ Guy Parmelin

Melam 25/11, Akok negar Nguyễn Xuân Phúc saong diuk di ong haong Kapol urang jakar pakat glong Viet Nam tagok jalan nao rivang Liên bang Thụy Sỹ tui panuac da-a di Tổng thống Liên bang Thụy Sỹ Guy Parmelin. Mbang rivang ini, urang ngak praong di dua taneh ia brei ginum biai dom jalan ngak piah jhul pakhang, paglong talei rohim pambuak bruk di dua gah Việt Nam-Thụy Sỹ dalam jang, njauk lagaih dalam dom thun anak tal di taong abih gah chính trị - ngoại giao, bruk pablei salih, buh jien tame ngak mbang patagok kinh te, ilamu – pato megru. Mbang rivang jeng lac piah ka dua taneh ia jhul pakhang bruk mbaoh tangin Hiệp định thương mại tự do di Việt Nam saong Khối EFTA dalam nan hu 4 taneh ia Thụy Sỹ, Na Uy, Iceland, saong Liechtenstein. 

Dhar gilang pariak Ngak nong song patagok palei pala Ninh Thuận bahrau alin brei sang bac Phổ thông bangsa gam dok Phan Đình Phùng, xã Ma Nới, huyện Ninh Sơn 14 baoh komputer, yaom abih tih 150 triệu đồng. Jabat Giao dịch Agribank di huyện Ninh Sơn brei ka sang bac sa jamriak halang ia yaom 5 triệu đồng; dhar kapul dam dara di Agribank Ninh Thuận brei 50 pok jien bac ka dom adei anek saih. Ni lac bruk ngak di danak dak “Pabak akhar haroh, tru meneing eik lipa” kayua Agribank Việt Nam peih tabiak piah dong ka dom sang bac blei harak tapuk , pandap panda piah ka gru pato song anek saih hu pandap bac daa, roh duah tài liệu angaok internet ba ilamu bahrau tame bruk pato song bac. Rik dong paglong bruk pato pakai song bac daa di sang bac.

Dalam dom harei ini, tamun dưa lưới di Bình Thuận pablei hu ralo, yaom kaom tagok glong. Tamun dưa lưới lac phun pala birau di Bình Thuận dalam 2 thun ini mai, ralo meng pala dalm sang màng. Bruk nan hu phun jien buh tame tuk camereip bhian glong, lac 400 trieu dong/ 1000m² min tamun brei rilo baoh, praong siam, pablei hu yaom glong nan ye samar mek hu veik phun jien. Njauk tamun 4 mbang, ye urang pala meda mek hu phun jien saong jien laba. Urak ini Bình Thuận hu labaih 80 ha ngak sang mang pala tamun dưa lưới saong meteh taneh nan daok trun pajaih tamun piah paik pablei Tết. Meng bruk njauk tamun, pablei hu yaom yau urak ini, meda ba mai rilo kein laba ka urang pala.

Dalam harei kabroi, tỉnh Bà Rịa Vũng Tàu hu 658 urang njom COVID - 19, dalam nan hu 417 urang njom dalam bhap bini. Anak bruk rah tabiak kan kandah di jit ruak, tỉnh hu brei F0 iek ruak di sang. Gam haong nan, ieu dom sở, mban, ngành kapul nyaom, puk palei ba tabiak dom jalan ngak pacang caga jit ka nyu siam, lagaih. Taphia di nan, peih dom jalan pacang caga jit yau: jhul jhul samar bruk blei pandap panda, sinh phẩm, jru tavoa, pandapy tế njauk tui adat. Patagok bruk pathau khan piah ka pbhap bini paglong hatai sahneng dalam bruk pacang jit, oh caik ka jit pambak praong.

Sở Y tế Thanh Hóa hu harak pathau khan tal Mban tacei jalan pacang caga jit Covid-19 tỉnh Thanh Hóa taong yaom di Hội đồng langyah ka chuyên môn bruk ba tal ruak trak hadei di klauk jru vaccine pacang COVID-19 di Công ty trách nhiệm hữu hạn giầy Kim Việt, huyện Nông Cống (ban sit Nông Cống, huyện Nông Cống). Tui nan, bruk ba tal 3 urang metai saong 1 urang ruak trak lac sốc phản vệ hadei di klauk vaccine VeroCell pacang COVID-19. Dahlau di nan, harei 23/11, Pasak Y tế huyện Nông Cống peih bruk klauk jru vaccine pacang Covid-19 mbang 2 vaccine VeroCell ka urang ngak di Công ty trách nhiệm hữu hạn giầy Kim Việt. Tapa bruk klauk jru hu 10 urang ruak trak hadei tuk klauk. Dom urang nan hu daong cấp cứu, taong ruak tui jalan iek ruak di Mentri Y tế. Urak ini, 6 urang ruak daok veik hu taong ruak di Sang iek ruak Đa khoa tỉnh Thanh Hóa. 

Pahadar 5 thun harei lahik di aruah urang pal akaok Fidel Castro Ruz (25/11/2016 – 25/11/2021), harei 25/11, Cuba hu peih pakak pasak camereip hu angan urang pal akaok Cách mạng prong glong ni. Pasak Fidel Castro Ruz lac labik pataom mek , khik piah, rami ramik song pok meyaom dom inem krung di urang Tổng tư lệnh Cuba piah pabak ka bruk roh duah song pathau khan ka jalan ngak di ong. Karja Cuba hu tabiak sarak biak karei ka bruk padang ngak labik ni kayua cong khin tuk daok duik di Fidel lac hadei di tuk ong lahik nao, oh hu jalan mbak, mblang bein, sang bac , sang iek ruak atau pasak, labik halei hu angan di ong.

Hãng tin Reuters brei thau, Mỹ brei sap cagar veik saong I-ran di Jabat Năng lượng Nguyên tử Quốc tế (IAEA) di bilan anak tal, meyah taneh ia ini oh pambuak rilo jang saong jabat tui iek. Bruk catang nan meda ngak patrun dom bruk ginum biai ka bruk pambuak veik thỏa thuận hạt nhận 2015. Dahlau di nan harei 24/11, bruk ginum biai di Jabat Năng lượng nguyên tử dunya (IAEA) saong I-ran di Tê-hê-ran pambuak tal danak dak hạt nhân di taneh ia ini tamat bo oh hu lagaih.

Jabat An ninh Y tế negar Anh ba tabiak dữ liệu brei mboh, bruk klauk vắc xin pacang Covid-19 ka urang kamei metain hu siam mekre, salamat, oh pagam tal bruk biến chứng. tapa nan jeng brei mboh oh hu hagait karei ka bruk anek kama metai dalam tain, anek kama takik kilo song bruk ndik tapui kurang bilan di urang kamei hu klauk jru song urang kamei oh ka hu klauk jru. Tiến sĩ Mary Ramsay, Akaok kapul klauk jru di jabat An ninh Y tế negar Anh brei thau, yaok urang kamei metain oh ka hu klauk pacang njauk khang hatai nao klauk, bruk ni dong pacang cakak trak damak tuk njauk Covid-19 dalam tuk metain, abih di nyu nan lac dom urang kamei metaim mbang camereip./.

Urang lang: Hani Pha – Bhumi – 26/11  10:28:47