Dom adei biak bui sambai tuk taduan hu pandap panda di Mban peih ngak 

Di nyaom biai online di Rajaei haong dom tỉnh, ban peih ngak sarak di QH mbang XIV ka bruk patagok kinh tế - xã hội thun 2021 rah tabiak harei kabroi 29-12, ong Đỗ Văn Chiến - akaok mintri, akaok UB Bangsa brei thau: Thun 2020, bruk bangsa saong sarak bangsa hu ngak samu gauk, hu kein laba. UB bangsa pambuak bruk haong dom mintri, dom gah, dom tỉnh ban, jak ba bhap bini peih ngak 3 kadha praong kayua Rajaei, Thủ tướng Rajaei tacei pato, lac: pacang klaoh bruk palai pajoa glai, pala 1 tỷ phun hijao, pacang cakak bruk urang tame negar drei suan hukum tui dom jalan sit, jalan haluk. Raidiuk bhap bini bangsa takik, bhum ceik hu tagok. Dom sang eik lipa trun  76% duk haong thun 2019.

Melam blaoh (29/12), di sang daoh rayo sap ndem Việt Nam (Hà Nội) rah tabiak bruk pok mayaom 122 anek saih, sinh viên, dam dara bangsa takik naih joi, hu angan je di thun 2020, kayua Ủy ban bangsa pambuak haong mintri pato magru saong kapul dam dara pakat negar peih tabiak. Brei panuac tuk nan, Phó Thủ tướng Thường trực Trương Hòa Bình ndom lac,Đảng saong kanja tuk halei jeng sangka biak rilo ka bhap bini bangsa takik saong bhum ceik. Phó Thủ tướng ieu kakei dom pakat patui jalan daong, palgaih di abih, pachreih dam dara bangsa takik bac da-a, roh duah, pasram megru, jeng dom rahra siam.

MBan Khik ramik dom labik ngak kong tỉnh Đồng Nai brei thau, thun 2020, hu 13.000 urang ngak dalam dom labik ngak kong di tỉnh lahik bruk ngak kayua jit Covid-19. Dalam thun, tỉnh hu 349 doanh nghiệp luai ngak saong yaom phun jien labaih 5.515 tỷ đồng saong 360 dhar, labik pablei salih padeih pablei, 679 doanh nghiệp padeih ngak. Njauk uan tabuan lac bilan 12 ini, hu 174 dalam 213 doanh nghiệp gaok kan kandah meng jit Covid-19 di Đồng Nai daok pasaim veik bruk ngak.

Tui mban pato tacei pacang caga jit ruak Covid-19 tỉnh Cà Mau, bruk urang tame negar suan hukum di tỉnh daok rahtabiak sarau kadhau. Dalam 2 bilan tapa, Cà Mau mboh hu 56 urang tame negar suan hukum, jeng hu brei daok karei pataom gauk saong dut iek mboh âm tính. Tui Sở Y tế Cà Mau, dom bilan jaik di ni, tuk jit ruak daok trun jeng lac tuk menuac sia iek lap. Abih di nyu nan lac, bruk tame negar suan hukum meda ba tal dom kanjak jhak biak praong kayua rilo bhap bini ka oh pathau khan samar drak, hu bruk lahik dom harei meng ba tagok labik daok karei pataom gauk.

Tui Pasak kuhria mboh dahlau bruk langik tasik negar, mbang langik la-an meng melam blaoh 29/12 oh lac ngak patrun pandiak di baoh taneh saong mbang la-an khang, la-an jhak ka 2 di bilan brak thun ini mbuan ngak brei la-an biak khang di dom bhum ceik glaong, bo daok hu ngin biak khang di baoh taneh saong angaok dom bhum tasik taneh ia drei. Duk haong mbang la-an biak khang di thun 2016, Pasak kuhria mboh dahlau bruk langik tasik negar brei thau: mbang la-an ini rilo meng lac la-an thu, melam lingik biak la-an.

Dalam 24 maong tapa, dunya hu bahrau 547.506 urang njom Covid-19 saong labaih 12.500 urang metai, tui nan abih tih urang ruak tagok tal labaih 82 triệu 2 rituh ribau urang, dalam nan hu jaik 1 triệu 8 rituh ribau urang metai. Di bang Colorado (Mỹ) hu mboh 1 urang njom biến thể bahrau di SARS-CoV-2, yau anek ruah hu mboh mbang akaok meti di Anh. Tổng thống hu pilih ruah di Mỹ Joe Biden caong maong tagok kadung jien kanja piah biyar ka bruk parabha vắc-xin Covid-19 saong daong dom bang peih pabhang veik sang bac. Tal urak ni Mỹ hu labaih 2 triệu urang hu klauk jru, lac biak takik dut saong panuac sanya di Tổng thống Donald Trump lac 20 triệu urang hu klauk jru dalam thun 2020.

Jit Covid-19 di rilo labik dalam negar Prang dom harei tapa daok jhak nao biak samar. Rilo  urang ngak praong pan akaok dom puk palei hu panuac ieu Rajaei Prang brei pacang cakak chip kayua jit ruak daok yam tapa tanut kan kandah di abih. Anak meta, Rajaei Prang hu panuac brei peih praong tukvak giới nghiêm daok hu pandar urak ini, meda meng mon 6 biar harei, salih ka mon 8 melam mbiah tal mon 6 page mesup harei hadei. Jalan ngak ini hu ba tabiak pandar di 20 tỉnh hu jit ruak rah tabiak khang abih, hu menuac njom virút tapa 250 urang dalam 100 menuac.

Mintri Điện lực Irắc brei thau lac, Iran meda pambuak veik abih bruk pablei tabiak khí đốt tapa Irắc hadei di tuk dua negar ni mek hu sanya pambuak tal dom harak gar ka oh biyar hu yaom labaih 6 tỷ đôla Mỹ di Irắc. dahlau di nan, Iran brei thau trun dom janih cuh pablei tabiak tapa Irắc meng 50 triệu m3 trun daok 5 triệu m3 kayua Irắc ngak suai bruk biyar jien. Bruk ni meda ngak ka Irắc laik tame bruk kurang điện biak trak. Mintri pablei salih Irắc brei thau negar ni daok pablei tabiak padai lúa mì gam saong dom pandap karei tapa Iran, yau sa jalan piah biyar sre./.

Urang lang: Mousaphuong -Thu Thảo -30/12