Kadung jien hu daong uranaih bangsa takik, uranaih sang kathaot, jaik kathaot bhum ceik

Meng akok thun mbiah tal ini, Kadung jien daong ka uranaih Viet Nam hu daong labaih 98 ribau uranaih labaih 61 tỷ đồng. Dalam nan hu peih bruk iek ruak piah neh rabha dom janih ruak baoh hatai meng tian amaik, jaoh jo, ruak sup meta ka 1 ribau 200 uranaih bangsa takik, uranaih sang kathaot, jaik kathaot bhum ceik…jien daong jaik 6,9 tỷ đồng, ngan saong 20 ribau uranaih hu taduan tui. Abih di nyu, Kadung jien hu daong labaih 18 tỷ đồng ka labaih 14 ribau uranaih gaok kan kandah kayua jit Covid-19. Urang hu taduan lac uranaih raidiuk biak kan kandah atau uranaih baoh sang kathaot, baoh sang jaik kathaot, uranaih lac anek di urang ngak, urang ngak nong lahik bruk ngak saong anek kamar hu amaik njom Covid-19.

Bảo hiểm xã hội (BHXH) ban raya HCM brei thau, tal urak ni, hu labaih 5.508 tỷ đồng dong ka urang ngak song urang pandar urang ngak di ban raya HCM njauk kan kandah kayua jit Covid-19 meng kadung jien Bảo hiểm thất nghiệp (BHTN) tui sarak 116 di rajaei. Tui nan: BHXH ban raya HCM hu langyah ka labaih 83.500 jabat song jiak 1,8 triệu urang hu trun jien blei BHTN meng 1% trun samu 0%, song yaom jien 1.892 tỷ đồng (samu 100%). Piah oh caik brei kurang urang ngak halei hu mbang tui sarak dong brei, BHXH ban raya HCM hu panuac ieu urang halei padeih blei BHTN dalam tuk vak meng harei 1-1-2020 tal abih harei 30-9-2021 hu tuk vak blei BHTN hu khik veik tui hukum bo oh ka taduan hu pok jien dong ye ngak harak tui mẫu, payua mai ka jabat BHXH labik jiak di abih piah taduan hu bruk dong brei.

Tỉnh Bình Dương brei pabak abih bruk dịch vụ công online meng harei 1/1/2022. Piah ngak njauk bruk, tukvak peih ngak, Bình Dương daok samar ngak brei salah saong ba tame ngak bruk, pandar hu siam dom bruk dich vụ cong online pakat 3,4 di dom sở, ban,gah; UB bhap bini dom huyen, ban sit; UB bhap bini dom xã, phường, ban sit dalam tỉnh. Langiu di nan, dom sở, dom gah, karja palei di Bình Dương caga ginup manuac ngak bruk, urang halan hatian tacei pato ka mikva, peih rilo kenh pathau khan piah daong ka bhap bini saong D.N samar thau pandar.

Harei 26/11, mBan Thường vụ Tỉnh đoàn Bình Thuận peih harei pataom ilamu dam dara song ilamu nao mai angaok jalan mbak thun 2021. Danak dak hu peih ngak tapa saong online, dui pachreih hu labaih 100 urag đoàn, dam dara hu mbaok tame. Mai tal harei pataom ilamu, dom ayut ranaih, urang đoàn, dam dara hu pathau khan ka hukum nao mai angaok jalan, pasram megru dom ilamu ka bruk peih radaih di angaok jalan; ilamu peih radaih siam mekre salamad; langyah tuk hu bruk hagait rah tabiak dalam tuk vak peih radaih; pasram megru ilamu sơ cấp cứu tuk radaih paoh gauk… Pak di harei nan, Tỉnh đoàn Bình Thuận hu brei 10 “Tu muat đội viên – khik tamo hatai khin” ka dom Liên đội thiếu niên dok di ban Phan Thiết; dong ka 2 kapul daong samar urang bala angaok jalan roya 1A (huyện Bắc Bình song huyện Hàm Thuận Nam).

Birau ini, di Ban Đồng Xoài, Sở VH-TT-DL tỉnh Bình Phước peih bruk brei thau angan Drap ar ilamu phi vật thể pakat negar ngan saong Ilamu bhap bini, bruk ngak thủ công meng kan, ilamu ngak alak tapai di urang S’tiêng. Tapai nan lac pandap menyum meng kan mai saong biak bingi pahe di S’tiêng Bình Phước. Ini lac pandap menyum urang oh kurang hu dalam dom rija roya praong di bhap bini atau dom bruk praong karei di urang S’tiêng.

Anh mboh duh hatai ka biến thể bahrau B.1.1.529 di virus SARS-CoV-2 dok njom mbak di Nam Phi meda ngak patrun siam lagaih di vaccine pacang COVID-19 song ngak khat lahik dom kham merat ka bruk pacang jit. Yaom lac biến thể B.1.1.529 bahrau duah mboh dalam adit ni min Anh samar batabiak bruk brei takik nao mai tal Nam Phi hong 5 taneh ia dok jiak tapen negar ni. Tui nan, meng mon 12 tui mon GMT harei 26/11, Anh brei padeih dom mbang par tal 6 taneh ia châu Phi lac Nam Phi, Namibia, Botswana, Zimbabwe, Lesotho song Eswatini, saong dom tuai Anh mai veik meng 6 negar nan, njauk brei dok karei.

Thứ trưởng Mentri Ngak nong saong Công nghiệp pandap mang Malaysia Ahmad Hamzah brei thau japaih padai biến đổi gien IS-21 hu Mentri Ilamu, công nghệ saong salih birau taneh ia ini cak rok patagok hu jak jeng meng bruk pandar cong nghe hạt nhân. Thứ trưởng Ahmad brei thau ka dom asar siam di pajaih padai birau ini yau ye meda diuk hu dalam yaok labik, lagaih saong jaik abih dom janih taneh pala drak, pacang hu rilo janih ruak.

Bruk pakacah ngak har giáng sinh– sa dalam dom bruk uan raok Noel song thun bahrau di Thụy Điển hu peih tabiak. Bruk pakacah hu 5 kadha piah mek giải lac giải thưởng ka kiến trúc, thiết kế, urang ngak har umo labaih 12 thun song dom urang ngak har karei karei. Dalam tuk châu âu sa mbang tra dang anak bruk tamuh veik jit Covid-19 bahrau, angan ieu di bruk pakacah thun ni lac “Pambuak gauk” yau panuac kakei dom menuac urang brei jum pataom gauk piah pacang cakak jit prong./.

Urang lang: Hani Pha – Bhumi – 27/11 14:30:00