Meng bilan 7 thun ini, vaccine pacang Covid-19 mai taneh ia drei rilo (jaik 8 triệu mbang). Iek tui bruk hu hadom vaccine mai Việt Nam saong dom janih vaccine hu daong brei, Mintri Y  tế brei hu jalan ngak saong kuhria parabha dom janih vaccine ka nyu samu gauk di dom kapul menuac urang, tui jalan ba di Liên hợp quốc saong njaik bruk oh samu gauk di dom doanh nghiệp. Ini lac panuac kakei di Phó Thủ tướng Vũ Đức Đam, akaok mban tacei jalan pakat negar ka pacang caga jit Covid-19 di mbang nyaom brei thau ka bruk blei saong klauk vaccine pacang covid-19 hu peih tabiak tuk biar harei 23.6.

Di mbang nyaom ka 1 di HĐND TP.HCM mbang X hu peih tabiak di harei 24-6, Bí thư Thành ủy TP.HCM Nguyễn Văn Nên brei thau lac meda pasang iek brei tapa sarak ka dom bruk duh ka pacang caga jit saong daong ka bhap bini gaok kan kandah. Mbang nyaom meda pasang iek brei tapa sarak ka pasiam, pabak dom bruk biyar jien bồi thường, daong tái định cư khu đô thị bahrau Thủ Thiêm. Bruk ni piah daong ka bhap bini tani tanat raidiuk, pasiam dom tavak tavaiy dalam bruk biyar jien bồi thường, tái định cư, tui jalan  iek praong, khik caga quyen saong kein laba njauk adat hukum di bhap bini lac bruk praong di abih.

Sở Y tế TP.HCM brei thau, anak bruk jit ruak Covid-19 dalam ban daok rah tabiak srau kadau, kuhria tal harei 23/6/2021, dom urang ruak yam tapa tanut 2.000 menuac, gah Y tế ban raya brei patagok dom papal ndih iek ruak ka urang ruak Covid-19, meng 3.500 tagok 5.000 papal, meng salih bruk ngak di Sang iek ruak Bình Chánh haong Sang iek ruak Đa khoa khu vực Thủ Đức tapa iek ruak Covid-19. Sang iek ruak huyện Bình Chánh brei padeih bruk iek ruak dalam saong langiu, salih bruk ngak di taong abih labik dalam sang iek ruak piah taong ruak Covid-19. Daok sang iek ruak Đa khoa Khu vực Thủ Đức jeng daok khik bruk iek ruak langiu, brei padeih taong abih bruk iek saong taong ruak dalam.

Tỉnh Bắc Giang brei yah klaak bruk adat paatah di gauk dalam ban Bắc Giang meng maong 6 dah page harei 24-6, gam tui di nan pataom tame paglaong dom bruk pacang caga jit COVID-19 tui jalan ba tabiak lac tal harei 30-6 oh daok urang F0 tamuh tabiak. Hadei di tuk  yah klaak bruk paatah di gauk, ban Bắc Giang daok brei ngak tui sarak 19 di Thủ tướng. Dom quan mbang hu peih veik min tok brei duh meteh tuai min piah plaih bruk pataom rilo manuac. Bruk pajeng tuai nao tapa tỉnh karei, atau dalam tỉnh hu peih veik min njauk ngak tui dom bruk pacang caga jit. Bhap bini njauk ngak tui 5 paka di Mintri Y te.

Harei 23-6, lambaok Kapul Vạn Thịnh Phát hu alin hadaih 350 pok pandap brei ka dom sang kan kandah kayua jit Covid-19 daok dalam quận 5-TP Hồ Chí Minh, dalam nan rilo meng lac menuac pablei vé số, ve chai, xe ôm, pablei pandap naong, pablei tapen jalan...Dalam mbang jit ini, kuhria ta-eng di TP Hồ Chí Minh, Kapul Vạn Thịnh Phát hu daong 1.450 tỷ đồng jien blei vaccine pacang jit Covid-19. Tapa dom mbang jit, Vạn Thịnh Phát haong dom Cty di drei  saong dom gah pambuak bruk, hu daong 2.000 tỷ đồng jien blei vaccine pacang caga Covid-19 di Việt Nam saong di TP Hồ Chí Minh.

Harei kabroi, di jabat mintri Quốc phòng Lào di ban ine Viêng Chăn, Phó Thủ tướng, akaok mintri Quốc phòng Chansamone Chanyalath hu jao ka urang lambuak negar Việt Nam di Lào lac Ong Nguyễn Bá Hùng paok jien 200.000 USD piah daong kadung jien pacang caga COVID-19 di Việt Nam. Ong  Nguyễn Bá Hùng brei thau lac ni lac paok pandap hu makna praong, brei mboh hatung hatai, bruk sangka klah rabha di dom urang ngak di mintri Quốc phòng Lào ngan haong Đảng, kanja saong bhap bini Việt Nam.

Japon brei ngak jien xu yaom 500 Yên bahrau, hu thiết kế veik. Jien 500 Yên bahrau, hu ngak 2 sambo, hu 3 tal saong hu sarak piah pacang ngak ja. Jien 500 Yên bhian hu pandar piah patak pataom atau piah blei harak radaih, ia menyum di Japon saong jien ini bhian njauk ngak ja. 

 Ủy ban pablei salih dunya Mỹ (ITC) harei kabroi (23/6) brei thau, dom gah sản xuất Mỹ njauk khat lahik gah drap ar kayua bruk blei tame dom janih baoh radaih pajeng tuai saong baoh radaih pajeng pandap sit meng Hàn Quốc, Đài Loan (Trung Quốc) saong Thái Lan. Kayua yau nan ye, jabat ni ba tabiak sarak breir kak je pacang pablei khut yaom dom pandap panda meng dom negar saong bhum taneh bahrau ndem nan. Ủy ban pablei salih dunya Mỹ jeng hu panuac lac baoh radaih tuai hu asal meng Việt Nam hu daong yaom saong ngak kan kandah tal gah ngak baoh radaih di Mỹ; saong brei thau lac meda kak je pacang daong yaom ngan haong janih pandap ini blei tame meng Việt Nam./.

Urang lang: Thu Thảo – M.Phuong  24/6/2021