Yaom ameh dalam taneh ia page ini tagok khang

Meng harei ini 5/8, Đà Nẵng peih bruk duk iek nCoV tui nyaom meng 3 tal 5 urang dalam sa baoh sang piah jhul pasamar bruk duah urang ruak. Abih dom urang nan hu mek darah dalam sa ống piah dut iek. Meyah dut iek mboh ruak ye brei dut iek darah ka yaok urang piah thau manuac ruak. Bruk pacang caga jit ruak di Đà Nẵng dalam tukvak ini lac dut iek darah, dauh urang ruak, brei patah di gauk, pacang cakak, padam jit. Dom bruk nan hu peih ngak catang piah patrun patakik ruak pambak tabiak bhap bini. 

Gah Y tế tỉnh Đắk Lắk jeng daok mek mẫu dut iek Covid-19 ka taong abih dom rahra daok di 4 labik njauk pacang cakak di ban Buôn Ma Thuột. Dom urang  y tế hu nao tal yaok sang, ieu bhap bini ngak tui panuac kakei piah khik hu salamat dalam bruk mek darak. Urak ni Đắk Lắk hu 3 urang njom Covid-19. Labaih 10.300 urang hu taom gaok jaik haong dom urang ruak daok brei daok karei di labik y tế, labik daok karei saong di sang.

Yaom ameh dalam taneh ia page ini tagok khang, jaik tal 59 triệu đồng sa mbaik (lượng). Cong ty Ameh pariak patau quý Sài Gòn brei thau yaom ameh SJC di Hà Nội saong Ban raya HCM meng 57 triệu 500 ribau đồng tal 58 triệu 720 ribau đồng, tagok 670 ribau đồng sa mbaik dut saong mesup harei karoi. Kapul Ameh pariak Phú Qúy jeng brei thau yaom ameh SJC meng 57 triệu 060 ribau tal 58 triệu 080 ribau đồng sa mbaik, tagok 800 ribau đồng sa mbaik dut saong harei kabroi.

Dom harei tapa, kayua hoàn lưu rabuk ka 2, di tỉnh Hậu Giang hu hajan khang dui atah saong hangin khang ngak jaleih labaih 700 hecta padai Hè thu daok tasak; dauk ia labaih 1.600ha padai Thu đông bahrau trun pajaih, jaleih, joh dhar di rilo bien phun mbang baoh di huyện Châu Thành. Tui kuhria hajan sraiy gam haong hangin khang meda daok hu dalam dom harei anak tal, gah ngak nong Hậu Giang kakei bhap bini nao rivang hamu yaok harei, caga njuk ia pacang ia dauk di labik pala padai, njam patam saong phun mbang baoh piah patrun khat lahik.

Công an Ban sit Thủ Dầu Một, tỉnh Bình Dương daok cap khik Phan Thanh Tuấn, umo 21 thun, daok di Cần Thơ, lac urang co blah radaih taxi di phường Phú Mỹ, ban sit Thủ Dầu Một 2 harei dahlau. Tapa duah thau mboh lac, mong 11 meteh melam 3/8, sa-ai N.H.H urang peih radaih di 1 hãng taxi di Bình Dương raok pajeng 3 urang tuai, dalam nan hu Tuấn, di phường Bình Chuẩn, ban Thuận An pajeng nao Ban Thủ Dầu Một. Tuk nao tal labik jua lange, Tuấn mek to tabiak kateik greik urang peih radaih blah mek 3 trieu jien saong phone tangin. Hadei di nan, abih 3 urang nan nduac dauk tame glai tràm. Tuk nan, Công an phường Phú Mỹ daok pasang khik mehit sap prew di urang peih radaih nan ye pagui chap mek hu.

Kuhria tal mesup ini (5/8) di dunya hu labaih 18,6 triệu urang njom COVID-19, dalam nan hu labaih 702 urang metai. Pasak jit jeng daok di Mỹ ngan saong 44 rabau urang njom bharau dalam 24 mon tapa. Tổng thống Mỹ Donald Trump hu mbaoh tangin tame 1 sarak brei adat peih praong quyền hu iek ruak meng atah ngan saong 57 triệu urang, rilo meng daok di bhum palei pala kan kathaot. Labaih 100 urang pan akaok doanh nghiệp di Mỹ hu panuac pachreih dom urang ngak adat padeih veik dom bruk oh njauk gauk gah chính trị saong samar brei tapa pok jien daong pacang COVID-19 bahrau.

Tapa pasang iek di sa kapol di Pêru, labaih 900 urang kumei saong uranaih kumei lahik tuk Pê-ru pacang cakak piah pacang caga jit Civid-19 meng bilan 3 tal bilan 6 thun 2020. Jaik abih dom urang lahik nan oh thau lac daok diuk atau metai. Dom urang nan meda lac kayua taong paoh dalam sang, jit ruak, pablei manuac atau njauk kateik ndih daok. Rilo taneh ia di dunya brei thau lac bruk taong paoh dalm baoh sang tagok rilo dalam tuk pacang cakak jit ruak, nan ye Liên hợp quốc njauk tabiak panuac iew dom rajaei brei ba tangin tame ngak chip.

Rajaei Brunei hu peih veik dom mbang par tapak tal ban Hàng Châu di Trung Quốc hadei di sa vaktu brei padeih kayua jit Covit-19. Ini lac jalan par tapak camereip abih hu peih veik haong Trung Quốc kuhria meng akaok thun 2020 tal urak ini. Dom mbang par jeng hu ngak catang bruk pacang caga jit, tuai brei daok paatah dalam 14 harei. Brunei lac 1 dalam dom taneh ia pacang jit Covid-19 hu siam mekre di châu Á. 89 harei tapa, taneh ia ini oh hu urang njom ruak bahrau./.

Urang lang: Ái Nghiêm – Thu Thảo – 05/08 15:28:53