Mintri Quốc phòng tui kuhria hu ieu pataom dân quân tự vệ haong lin meng Quân khu 7, Quân đoàn 4 tame pacang caga jit

Meng mon 12 melam 23/8, gah bol bala mai daong ka dom bilai pasang iek di 312 phường, xã dalam ban raya HCM, peih bruk pasang iek radaih, ngak catang bruk paatah di gauk. Di 12 labik jalan praong tame tabiak ban raya haong 21 quận, huyện saong ban Thủ Đức hu labaih 300 kapul meng Quân khu 7 piah pasang iek bruk pacang caga jit, pajeng ba dom paok an sinh xã hội, pabak pandap mbang. Mintri Quốc phòng tui kuhria hu ieu pataom labaih 35.000 dân quân tự vệ haong yaok ribau lin meng Quân khu 7, Quân đoàn 4 tame pacang caga jit. Gam haong nan, labaih 2.000 bác sĩ saong urang ngak gah y tế; 30 radaih pajeng manuac ruak di bol lin gah barak hu ba tame ban raya HCM piah tame bruk dut iek, taong ruak ka urang ruak Covid-19.

Meng mon 12 melam (23/8), Long An patagok dom bruk pacang caga Covid-19 tui jalan ngak lac "hei dok halei dok kandang nan", sang papatah di sang, tổ dân phố paatah hong tổ dân phố... Sarak ni hu UB bhap tỉnh Long An ba tabiak ngak tal abih harei 30/8. Tỉnh padang dom bilai pasang iek pacang, caga, Covid-19 dalam tỉnh. Tong abih dom jabat, đơn vị, doanh nghiệp peih bruk ngak bruk di sang, patrun takik di abih bruk nao mai meng radaih. Tỉnh padang dom jalan talei pandiak pabak ka tong abih boh sang piah pambuak gauk dong tuk hu bruk. Urak ni Long An hu labaih 18.500 urang njom dalam bhap bini, hu 225 urang metai.

Meng mon 12 melam 23/8 tal 30/8, Bà Rịa-Vũng Tàu daok brei paatah di gauk tui sarak 16 di ban sit Long Hải tui tanut glaong jang, catang jang. Tui pathau khan, bruk njom mbak jit ruak di pak ni jeng daok sarau kadhau, abih di nyu nan lac di ban sit Long Hải, huyện Long Điền. Yaom lac hu 6 mbang peih bruk dut iek Covid-19 min dom urang F0 jeng daok rilo. Bà Rịa – Vũng Tàu jeng hu taduan labaih 150 urang jakar, urang lin hu Quân khu 7 ba mai piah daong pacang caga jit Covid-19.

Harei ni (23/8), Tây Ninh daok peih bruk ba menuac di tỉnh drei daok di ban raya .HCM nao palei plaih jit . Tui kuhria hu 2.250 bhap bini Tây Ninh gaok kan kandah, urang nao iek ruak gar veik di ban raya hu ba nao palei dalam 5 mbang. Dom urang ni test SARS-CoV-2 song hu klauk vaccine dahlau di tuk hu ba mai palei. Tây Ninh dok peih bruk paatah di gauk tui sarak 16. Dom sarak dong tui sarak 68 hu dom gah chức năng jhul samar. Tỉnh hu dong ka labaih 16.400 urang ngan song pok jien labaih 25 tỷ đồng.

Mintri ilamo Công nghệ daok samar drah padang ngak piah pok tagok Thủ tướng brei adat danak dak ilamo công nghệ praong di taneh ia “roh duah ngak tabiak vaccine pandar ka menuac tal thun 2030”. Dalam nan hu ba tabiak dom danak dak piah daong cak rok patagok, pandar vaccine ngak tabiak dalam taneh ia. Dom kapul, doanh nghiệp hu ngak bruk pasang iek, roh duah, ba brei ilamu công nghệ ngak tabiak vaccine hu mbang tui sarak daong dreih yau pandap panda di taneh ia. Ngan haong vaccine Covid-19 hu daong taong abih jien padai roh duah, ngak iek angaok menuac, ngak tabiak ngak iek, blei bảo hiểm saong daong ka dom urang halain hatain. 

Dah page ini (tui mon Việt Nam), di mbang họp báo ka bruk di Afganistan. Tổng thống Mỹ ndom lac, taneh ia Mỹ sanya ba ka pahu rahra Mỹ haong dom urang Afganistan hu salamat tabiak truh taneh ia Nam Á ini. Ong Biden caong lac oh njauk dui atah tukvak ba tabiak lac harei 31/8 meda ngak salah bruk ba rahra tabiak. Tổng thống Mỹ brei thau, ong oh jia Taliban min tal tuk ini meda ndom lac, gah Taliban oh ka hu bruk ngak hagait pamaong tame lin Mỹ daok pasang iek mblang kapal haoh Ca-bun saong daok ngak njauk tui panuac sanya brei ka urang Mỹ salamat tal mblang kapal haoh.

Đài Loan (Trung Quốc) harei ini (23/8) peih bruk klauk vaccine pacang Covid-19 ngak eng ka bhap bini. Karja Đài Loan bilan dahlau hu brei adat pandar chip vaccine pacang Covid-19 Medigen kayua Tập đoàn công nghệ sinh học Đài Loan ngak tabiak. Tui kuhria hu jaik 70 rabau menuac di Đài Loan hu klauk sa mbang vắc-xin Medigen.

Gah khik caga rahra Hai-i-ti brei thau, dom menuac metai dalam mbang megei baoh taneh di negar ini harei 14/8 meng blaoh tagok labaih 2.207 urang. Dom urang njauk rambus lac labaih 12.260, dalam tuk 344 urang karei jeng daok lahik. Mbang megei baoh taneh 7,2 độ jeng ngak tayah 53 rabau baoh sang saong ngak khut trak 77 rabau baoh sang karei. Yaok pluh rabau baoh sang jaleih ngak ka rilo menuac Haiti ndih di langiu langik, yaom lac hu dom mbang hajan khang yau tuh ia di tuk melam./.

Urang lang: Hani Pha – Thu Thảo – 23/08 10:25:45