Mentri Công an birau peih danak dak Cơ sở dữ liệu negar ka rahra tukvak ka 1. Dom khaw tin di bhap bini, yau angan, likei atau kumei, bhum palei, bangsa, agama…hu  số hóa, khik piah duh ka bruk khik iek di karja. Danak dak praong abih kuhria meng dahlau mai bo Mentri Công an hu jao brei ngak urak ini hu ngak salah tukvak ka 1, pagam jamriah, pandap ngak bruk, mek thông tin di 95% rahra. Tukvak ka 2, tui kuhria hu ngak salah di harei 1/7, hu pambuak saong danak dak ngak Căn cước cong dan, klak rabha taong abih dữ liệu haong dom mentri, dom gah, dom tỉnh ban dalam negar.

Cục Cảnh sát pacang khuah pandam khuah song dong duah urang gaok bala-Mintri  Công an brei thau, dalam bilan 2/2021, dalam negar rah tabiak  205 mbang khuah song  15 mbang khuah glai ngak ka  11 urang metai, 14 urang njauk rambuac , khat lahik drap ar tui kuhria  labaih  25 tỷ đồng song labaih  11ha glai. Bruk njauk biai nan lac, dom mbang khuah rilo meng lac di ban prong, meblah tal 62,8% mbang, saong lac dom labik  hu bruk patagok kinh tế song đô thị hóa samar, yau TPHCM, Hà Nội, Đồng Nai, Thái Bình, Đà Nẵng, Sóc Trăng… Dalam 63 mbang khuah hu duah thau cambaih makna di nyu, hu tal  44 mbang khuah kayua  điện song kayua takik caik hatai tal bruk pandar pui, nhiệt.

Sở Jalan mbak Pajeng ba Lâm Đồng daok padang danak dak duah thau hatai sahaneng ka bruk caik gom menyek hijao, menyek bhong di dom canah jalan labik pasak ban Đà Lạt. Ini lac ban dalam negar oh ka hu caik gom menek hijao menyek bhong, lac sa dalam dom janih njauk ndom tal di ban dulich. Yau nan min, dom thun jaik ini, Đà Lạt bhian rah tabiak bruk gar jalan di harei puac adit, tuk roya Tết. UB bhap bini Lâm Đồng brei ngak dua mblang pataok radaih di langiu ban, praong 75ha, daok jiak dom jalan praong di Đà Lạt piah trun bruk gar jalan tuk tabung glaong. 

Paga pacang atah 150 m angaok jalan  Lê Lợi, quận 1, TPHCM duh ka bruk padang ngak Metro ka 1 jiak hu yah klaak, hadei di jiak  7 thun pacang veik. Mban khik ramik jalan pasei  đô thị ban raya  HCM – po padang ngak danak dak  brei thau, labik paga pacang hu yah klaak meng jalan Nguyễn Huệ tal Pasteur. Dahlau di nan, sa labik karei angaok jalan Lê Lợi dok dalam labik padang sang  ga ni hu bayar veik mbaok taneh. Bruk yah klaak labik dok veik, bayar veik mbaok jalan, takai jalan hu ngak ka jalan Lê Lợi lanieng lanoi jang, palagaih ka bruk pablei salih.

Mentri Ilamu - Padhih the thao - Dulich birau brei angan 2 inem krung ilamu phi vật thể pakat negar di Bình Dương lac “Bruk ngak lan am meng kan di Bình Dương” saong “Tri thức bhap bini, ilamu parang me-in võ lâm Tân Khánh Bà Trà”. Bruk ngak lan am hu meng lavik mai di Bình Dương, tal urak ini padang hu angan je. Daok võ Tân Khánh Bà Trà hu padang tabiak, cak rok patagok gam haong bruk mesruh metak  padang taneh ia saong khik taneh ia di bangsa, urak ini daok hu patoa veik. Ini lac tha dalam dom janih võ meng kan di Viet Nam hu biak rilo jalan taong pacang.

Tổng thống Nga Vladimir Putin song Tổng thống Thổ Nhĩ Kỳ Tay-íp-Éc-đô-gan (Recep Tayyip Erdogan) hu mbaok di tuk peih bruk padang ngak tổ máy ka 3 di  sang mac điện hạt nhân Ác-kiu (Akkuyu) di  Thổ Nhĩ Kỳ, hu mong lac danak dak padang ngak hạt nhân prong abih di dunya. Tui Tổng thống Nga Putin, bruk peih ngak danak dak hu pabak pren khang ka Thổ Nhĩ Kỳ piah patagok gah công nghiệp hạt nhân. Hadei di tuk ngak salah, sang mac điện ni tui kuhria hu  công suất labaih 35 tỷ ki-lô-oát điện yaok thun.

Tui harak pathau khan di LHQ ba tabiak di bilan ini, hu 22 trieu urang Mỹ Latinh laik tame eik lipa kathaot rambah kayua jit praong Covid-19. Ini lac mbang kaok meti dalam 20 thun tapa, bruk biak kathaot di bhum taneh ini daok di tanut tabung glaong. Tui kuhria mboh, yaok trieu sang lahik gauk gar kayua jit Covid-19 dalm jit praong di Mỹ Latinh. Bhum taneh ini hu 687 ribau urang metai kayua Covid-19, dang dhi dua angaok dunya ka urang metai kayua jit, hadei châu Âu.

Harei 11/3, Tòa án ban Pê-sa-oa (Peshawar) - Pakistan hu panuac ieu jabat Thông tin Truyền thông di negar ni samar batabiak adat pacang  mạng xã hội klah rabha video TikTok. Adat pakauk pandar TikTok di tòa án hu batabiak hadei di tuk sa  công ty tư nhân ngak harak pathau lac ứng dụng ni hu batabiak rilo asar kadha oh lagaih. Bilan dahlau, Karja Ấn Độ jeng batabiak hukum pakauh TikTok song rilo ứng dụng karei  di  Trung Quốc kayua bruk catang tagok di tapen negar./.

Urang lang: H.Pha- A.Nghiem 13/03/2021