Bruk mbang huak di urang ngak hu khik siam mekre salamad 

Mentri Ilamu, The thao saong Dulich birau hu sarak iew UB bhap bini dom tỉnh, ban di trung uong tacei pato dom jabat, dom gah di tỉnh, ban brei peih ngak dom jalan salamat pacang, caga jit Covid-19 di gah ilamu,the thao, dulich thun 2021. Harak hu ndem cambaic laic,piah tacei ba jalan ngak njauk, siam lagaih tui tacei ba di Thủ tướng Rajaei ka bruk peih ngak sumu gauk dua bruk: gam pacang caga jit, gam jhul pakhang bruk cak rok patagok kinh tế -xã hội, saong paglaong ilamu ngak bruk, ngak hu siam bruk pacang caga jit Covid-19 di gah ilamu, the thao, dulich, Mentri Ilamu, the thao saong Dulich hu panuac ieu UB bhap bini dom tỉnh, ban di Trung ương tacei pato brei padeih peih ngak lễ hội tui bruk ba tabiak di Sarak ka 110 harei  29/8/2018 di Rajaei ka bruk khik ramik saong peih ngak lễ hội dalam tuk jit ruak tamuh, mbuan njom mbak dalam bhap bini; peih ngak mbuan mbiah, ramik veik bruk peih ngak, tukvak peih ngak lễ hội piah njauk tui bruk ba tabiak ka pacang caga jit ruak. 

Mesup ni 7-1, tatua Phước Lộc (pambuak 2 xã Phước Kiển song  Phước Lộc, huyện Nhà Bè-TPHCM)  brei radeih peih tapa hadei di 8 thun padang ngak. Tatua Phước Lộc lac sa dalam dom danak dak  jalan mbak prong di ban raya piah patagok bruk nao mai, pasiam bruk jalan mbak di  huyện Nhà Bè song labik gah merong ban raya.Tatua bahrau atah  386m,hu 2 jalan radeih nduac, hu jalan brei ka urang nao takai song lan can .

Di Lâm Đồng rilo po bein pala bingu daok haduh hatai tuk daok labaih sa bilan tra tal Tết thun anek sah Kubao min ralo taneh pala bingu oh ka mboh urang mai pambuak bruk blei yau dom thun dahlau.Dreih yau nan,Hiệp hội Bingu Đà Lạt brei thau dom harak pambuak bruk blei bingu urak ini bahrau hu labaih 35% dut saong tukvak ini dom thun dahlau. Dalam tuk nan, bilan bingu tết thun ini dalam tỉnh Lâm Đồng trun 20% taneh pala dut saong thun dahlau. Oh lac dom po bein haduh hatai bo rilo cong ty, doanh nghiep ngak tabiak pandap pablei salih bingu di Lâm Đồng jeng gaok kan kandah dalam bruk duah darak piah pablei.

Melam 6/1,Cục Hải quan TPHCM brei thau lac bahrau pambuak bruk song dom gah chức năng tong tayah jalan pajeng ba cần sa  meng  Canada mai Việt Nam tapa mblang kapal haok Tân Sơn Nhất, chap mek labaih 5kg cần sa.  Dom cần sa nan hu tame 20 paok nylon hút chân không, padauk dalam dom lon pandap mbang menyum brei ka urang pasram  Gym song caik tame haong thung har kẹo, pandap panda  payua mai Việt Nam.Ni lac bruk chap mek jru phien mbang ka 2 dalam sa adit mai ini,  meng  Canada mai Việt Nam. Dahlau di nan, harei 31/12/2020, hải quan jeng mboh hu bruk pajeng ba suan hukum 27 kadung nylon hu jaik 5 kg cần sa.

Page ini 7/1, Tòa án bhap bini Ban raya HCM peih bruk langyah Nguyễn Hữu Phước ndih tapui thun 1982, doak di Ban raya HCM, urang cuh sang daok taphia ngak ka 5 urang metai tuk jaik Tết Nguyên đán anek sak Tikuh. Nguyễn Hữu Phước njauk dua duis “ Pametai manuac” saong “ Palai pajua drap ar “. Tui VKS bhap bini Ban raya HCM, bruk ngak di Nguyễn Hữu Phước ngak brei metai rilo menuac saong khat lahik drap ar  di urang karei. Nan ye, njauk brei langyah catang piah tapa nan urang mboh huac bo plaih atah bruk jhak.

Dom urang  dalam rajaei Mỹ dok ginum biai ka bruk ba tabiak pandar Tu chính án ka 25 piah pajaleih Tổng thống Mỹ Donald Trump. Tui sa khaw tin di rajaei Mỹ, dom bruk ginum biai dok rah tabiak,min oh thau cambaih bruk nan hu taduan ginup bruk pachreih tui piah kateik urang pal akaok Mỹ padeih ngak hlaei oh.Dalam tuk nan,brei panuac tuk  Hạ viện hu pataom veik, Akaok  Hạ viện Nan-xi Pê-lô-xi hu panuac oh njauk hatai bruk urang trun jalan ngak srau kadau gah langiu Điện Ca-pi-tồ song lac dom urang ni meda njauk ba tabiak kaoh tui hukum. 

Rilo urang ngak praong di dunya ndem puac catang dom bruk trun jalan ngak sraw kadau gah langiu sang Quốc hội Mỹ, brei mboh having akaok anak bruk sraw kadau daok rah tabiak di taneh ia tuk halei jeng hu maong lac “ taneh ia dang akaok dunya”. Angaok Tuýt-tơ di drei, Thủ tướng Anh Boris Johnson, lac sa urang tui Mỹ iew bruk nan lac biak melau. Di Béc-lin, Ngoại trưởng Đức Hê-cô Mát (Heiko Maas) brei panuac lac, Tổng thống Mỹ Đô-nan Trăm saong dom urang pachreih tui ong brei taduan bruk palih ruah di cử tri Mỹ saong padeih bruk ngak jhak taneh ia dân chủ.

Tui yaok pataom bahrau brei thau mesup  7/01, Trung Quốc hu 52 urang njom Covid-19 dalam negar di harei  06/01, dalam nan hu tal 51 urang di tỉnh Hà Bắc.Dalam 79 urang oh mboh hagait  jeng hu 69 urang di tỉnh ni.Yau nan, kuhria meng harei 02/01, hadei di  5 harei hu urang ruak camereip,tỉnh Hà Bắc hu labaih 200 urang njom  SARS-CoV-2.Ni hu khan lac mbang tamuh jit biak trak dalam bhap bini Trung Quốc hadei di tuk negar ni  ba tabaik rilo jalan ngak biak khang piah pasang iek jit ruak dalam labaih sa thun tapa./.

Urang lang: Hanipha-Ái Nghiêm -7/1