Bruk nao mai angaok jalan dok pacang veik 

Mentri Jalan mbak pajeng ba brei thau, bruk bhap bini njauk dut iek Covid-19 tuk nao kapal haok, radaih pui, radaih pajeng tuai jeng daok hu pandar mbiah tal harei 20/10. Mentri brei kuhria iek, taong yaom tukvak ngak iek piah pabak tame, salih karei saong patabiak tacei pato birau lagaih saong Sarak 128 di Rajaei. Kuhria tal harei 14/10, gah pajeng ba meng jalan kapal haok hu peih 12 mbang par nao saong mai ngan saong 1.843 tuai nao dom tỉnh, ban; dalam negar hu 25 palei njauk gauk brei peih jalan radaih pajaeng tuai nao mai dom tỉnh.   

Brei panuac tamat nyaom biai Thành ủy ban raya HCM mbang ka 9, khóa 11, Bí thư Thành ủy TP Nguyễn Văn Nên taong yaom lac: meng bilan 6/2021, tuk ban raya pataom prein tame pacang caga jit ruak, kinh tế - xã hội njauk kan kandah trak, rilobruk kinh tế trun khang. Tui kuhria  abih thun ini, GDPR trun 5,06% dut saong tukvak ini di thun blaoh, oh ngak hubruk ba tabiak. Ban raya daok caga jalan ngak piah pasiam veik kinh tế ka yaok tukvak ngan haong jalan ngak praong, cambaih laih. Bí thư Thành ủy ban raya brei thau: bahrau blaoh hu rilo bhap bini di dom tinh, bal gah Maraong nao palei. Bru y tế di rilo tinh, bal truh tapa prein. Gah y tế ban raya halain hatain ba radaih nao dut iek, daong dut iek samar, jru tavao tuk dom tinh, bal caong khin.

Harei ini, radaih tuai, radaih bus, taxi, radaih pambuak bruk pajeng tuai…hu peih veik dalam tỉnh Bình Dương; tuai damuai, urang peih radaihbrei klauk ginup vaccine pacang Covid-19, lac F0 dhit ruak dalam 6 bilan, atau dut iek mboh am tinh saong SARS-CoV-2 dalam 72 tuk. Di bhum mbuan tamuh jit ruak biak glong oh ka brei pajeng tuai meng radaih công cộng. Di bhum mbuan tamuh jit glong, dom radaih công cộng hu peih ngak ala meteh preih ngak bruk. Dom labik pajeng tuai tapa kraong, mblang radaih nao dom tỉnh tui kuhria brei peih veik meng harei 20/10.

Di tỉnh Bình Thuận, labaih 3.600 urang ngak di labik ngak kong Hàm Kiệm II baharu hu klauk mbang 1 vaccine caga COVID-19. Tui mBan khik ramik dom labik ngak kong tỉnh, bruk klauk vaccine pak di doanh nghiệp hu ba mbuan lagaih ka bruk ngak di doanh nghiep. Tal urak ini hu labaih 8.200 dalam abih tih 12.000 urang ngak di Bình Thuận hu klauk vaccine mbang 1. Dalam tỉnh hu klauk vaccine ka jaik 374.000 urang (lac labaih 35%), dalam nan dom urang klauk mbang ka 2 meblah labaih 8%.

Page harei 15/10, Jabat Pato megru huyen Nam Đàn (Nghệ An) brei thau, dalam huyen bahrau hu 1 bruk biak pandik harao, tuk sa anek saih bac tal 5 daok bac online ye phone tangin patuh ngak brei adei metai. Hu thau, bier harei 14/10, adei N.V.Q. Sang bac Tiểu học Nam Anh bac online tapa phone tangin. Dalam tuk bac, Q pagam phone tame pi dự phòng piah sạc ye phone patuh ngak adei kandung trak, hu ba tame sang iek ruak, min adei oh tapa hu.

Tổng thống Mỹ Joe Biden khan lac meda daong labaih 17 triệu mbang vaccine caga COVID-19 ka Liên minh châu Phi, pabak ka 50 triệu mbang bo Mỹ hu daong ka Liên minh châu Phi dahlau di nan. Ngan haong 55 taneh ia saong rahra 1 tỉ 300 triệu menuac, Liên minh châu Phi hu panuac lac dom Cty ngak vaccine oh  samu gauk dalam bruk pabak vaccine. Dalam abih tih 5 tỷ 700 triệu mbang vaccine hu brei klauk dalam dunya, kuhria tal krieh bilan 9, bahrau hu 2% hu klauk di châu Phi. Urak ini bahrau hu 4,5% rahra châu Phi hu klauk caga ginup.

Hãng Reuters ba panuac meng meng karja bhum taneh Đài Loan brei thau, takik abih 46 urang metai, 41 urang karei njauk rambuac dalam bala pui khuah trak rah tabiak di page harei 14/10. Apui khuah di sa sang chung cư glong 13 tal, hu padang dahlau di ini 40 thun di quận Diêm Thành, TP Cao Hùng. Apui khuah hu padam di page harei nan min dom tal biar di sang glong nan apui mbang abih. Jabat chức năng daok duah thau kayua halei apui khuah, dalam nan hu bruk lac hu menuac cuh pui.

Cảnh sát Na Uy bahrau khan brei thau urang pametai manuac meng haning lac  Espen Andersen Brathen, umo 37 thun, rahra Đan Mạch; phiên tòa tui kuhria hu peih tabiak di harei ini. Jabat An ninh Cảnh sát Na Uy brei thau: bruk cuh haning nan rahtabiak di bier harei 13/10 ngak ka 5 urang metai saong 3 urang karei njauk rambuac, tui saneng ini lac bruk khủng bố". Hu thau, urang pametai manuac ni hu tukvak tui Islam saong oh mboh bruk ngak jhak halei meng akaok thun 2021 tal tuk cuh haning pametai menuac./.

Urang lang: Thu Thảo -Ái Nghiêm -15/10