Urang tame tabiak brei dut iek song brei hu klauk 2 mbang 

Mentri Jalan mbak pajeng ba brei thau, jalan peih bruk pajeng ba nao mai ka abih 5 gah lac jalan radaih, jalan pasei, jalan kapal haok, jalan kraong saong jalan tasik hu ngak salah blaoh saong payua tagok likau panuac di dom mentri, dom tỉnh, ban. Tui nan, ngan saong jalan radaih, brei ka doanh nghiệp peih bruk duk iek ruak yaok 14 harei sa mbang ka urang peih radaih saong urang nao gam radaih. Urang peih radaih saong urang nao gam radaih brei pabak dom bruk yau: hu klauk ginup vaccine, dalam nan mbang klauk puac abih hu takik di nyu 14 harei saong oh tapa 12 bilan, hu brei thau angaok sổ sức khỏe điện tử atau harak di labik klauk jru…Ngan saong urang nao mai ngaok jalan mbak, Mentri Jalan mbak pajeng ba hu panuac brei klaak bruk urang tuai nao radaih njauk brei kaluk ginup 2 mbang vaccine atau F0 abih ruak saong brei hu harak dut iek mboh lac âm tính.

40 paok thầu di 22 danak dak jalan mbak praong di ban raya HCM hadei di tukvak brei padeih kayua jit COVID-19 hu peih ngak veik meng harei 28/9 tal 15/10. Dalam nan hu danak dak pasiam jalan saong ribaong Nước Đen (quận Bình Tân), tatua Hang Ngoài bahrau (quận Gò Vấp); mblang bein Thanh Đa (quận Bình Thạnh)... Dom danak dak ini tui kuhria hu ngak salah dahlau di harei 31/12. 2 danak dak karei praong abih di huyện Hóc Môn saong quận Bình Tân ngan haong phun jien abih tih labaih 514 tỷ đồng jeng hu peih ngak veik, tui kuhria hu ba tame pandar dahlau di Tết Nguyên đán 2021. mBan khik ramik danak dak buh jien tame ngak dom danak dak jalan mbak di ban raya HCM brei thau, dom danak dak ini hu peih ngak veik hadei di tuk mban khik ramik haong nhà thầu, kapul langyah pasang iek, pabak hu bruk pacang caga jit ruak.

Bình Dương brei peih pabah mbang ba tỉnh mai veik siam mekre bahrau hadei di harei 30/9. Tui nan, UBND tỉnh brei tabiak jalan nao mai tapa dom tỉnh ka bhap bini, brei peih pabah mbang tapa dom huyện, ban, saong taong abih rahra tabiak jalan brei pandar mã QR piah pasang iek jit ruak. Tal urak ini, dalam 91 xã, phường, ban sit di Bình Dương tok daok 5 labik “bhum bhong”, 3 “bhum janik” haong 8 “bhum katam”.

Bình Thuận urak ini hu labaih 11.800 urang ngak daok ngak bruk di 5 labik ngak kong di tỉnh, min tal urak ini bahrau hu 3.600 urang ngak hu klauk mbang 1 vaccine pacang caga COVID-19. Dalam mbang tamuh jit ka 4 ini, bruk ngak di dom labik ngak kong dalam tỉnh njauk kan kandah biak rilo kayua dom tinh, bal peih bruk paatah di gauk paih pacang caga jit. Dom doanh nghiệp jeng peih ngak “3 di labik” pambuak haong “ 1 jalan nao – 2 labik tal” nan ye prein ngak jeng trun rilo. Rilo doanh nghiệp njauk pah dom labik y tế di pak ini peih bruk dut iek samar ka urang ngak, tui nan jien buh tame tagok biak glaong. 

Pambuak tal bruk me-in mbia biak praong tui jalan ghi lô đề haong yaom jien tagok tal labaih 2.000 tỷ đồng, biar harei 27/9, Gah CSĐT Công an tỉnh An Giang brei thau lac hu tabiak bruk khởi tố gac 7 urang. Tuk camereip mboh lac, jalan me-in mbi ini kayua  Nguyễn Thị Thủy Liên, Dương Văn Hoàng haong Huỳnh Sĩ Nguyên pan akaok, ngak lô đề meng ban sit tal puk palei, padang dom Cty, cửa hàng min oh ngak bruk. Tal urak ini, Công an tỉnh An Giang hu tabiak bruk khởi tố 17 urang ka bruk me-in mbia.

Taphia vaccine, hãng jru Pfizer di Mỹ harei 27/9 khan lac daok peih bruk oh duah tukvak ngak iek jru pacang virus tapa jalan menyum piah pacang caga ruak COVID-19 di dom urang njom mbak haong virus. Pfizer brei thau lac meda ngak iek janih jru ini angaok 2.660 urang praong, khang kadang, umo meng 18 thun tagok, daong dalam sang haong urang njauk COVID-19 hu triệu chứng. Pfizer mboh lac anak tal meda klauk COVID-19 yaok thun.

Negar Anh brei ngak danak dak pabak brei visa anak meta ka 10.000 urang ngak negar lingiu piah patrun bruk kurang menuac peih radaih pajeng pandap saong menuac ngak di negar ini. Piah patrun bruk kurang menuac peih radaih biak rilo saong dui atah, Akaok Mintri Jalan mbak pajeng ba negar Anh brei thau, dom tapon nyaom bol pan phao kraong meda hu ieu pataom tame ngak meyah bruk kurang menuac trak damak jang.

Kapul dom urang dang akaok dom gah bol lin Hàn Quốc harei 28/9 khan lac Triều Tiên cuh takik di abih 1 janih par oh thau lac hagait tabiak tasik negar Japon. Mintri Quốc phòng Japon daok duah thau cambaih laih ka bruk nan. Dahlau di nan, harei 15/9, bol bala Hàn Quốc brei thau lac Triều Tiên cuh 2 baoh tên lửa đạn đạo tabiak tasik Japon. Mintri Quốc phòng Japon brei thau, 2 baoh tên lửa di Triều Tiên nyu laik trun bhum ngak po di Japon Nhật Bản./.

Urang lang: Thu Thảo -Ái Nghiêm -28/9