Ikan raong lồng bè di kraong Chà Và, xã Long Sơn, TP Vũng Tàu, tỉnh Bà Rịa - Vũng Tàu metai rilo dalam dom harei tapa

Mentri Pato megru birau tabiak sarak 3280, tacei pato ramik veik  asar kadha pato bac pakat THCS, THPT. Tui nan, 10 janih môn bac brei pasiam veik asar pato bac, lac: Toán, Vật lý, Hóa học, Sinh Học, Tin học, Công nghệ, Ngữ văn, Lịch sử, Địa lý saong Giáo dục công dân. Tui jalan brei ramik veik katut panak asar kadha labaih tui tanut chuan ilamu, ky nang  di danak dak patao megru yau urak ini; pagam tame dom asar kadha ngak jeng dom kadha; ramik pasiam dom asar kadha dreih yau gauk di dom môn bac atau bruk ngak gah pato pakai. Mentri Pato megru brei panuac lac oh pasang iek, taong yaom ngan saong dom asar kadha hu tacei pato. 

Bảo hiểm xã hội Việt Nam hu panuac ieu  Mintri jien padai roh duah pok tagok rajaei  tagok yaom dong di karja  ka urang blei bảo hiểm xã hội halan hatain. Tui nan, Bảo hiểm xã hội Việt Nam hu panuac caong tagok yaom dong meng  30% tagok  50% ka boh sang kathaot ; meng  25% tagok 30% ka boh sang jiak kan kathaot song meng  10% tagok 20% ngan song  dom urang dok veik.

Chi cục Raong glang saong Thú y tỉnh Bà Rịa – Vũng Tàu hu panuac tamat bruk ba tal ikan raong lồng bè di kraong Chà Và, xã Long Sơn, TP Vũng Tàu, tỉnh Bà Rịa - Vũng Tàu metai rilo dalam dom harei tapa. Tui nan, jabat chức năng hu panuac ka bruk ba tal ikan metai kayua ia nerak, kurang oxy, gam hu ký sinh trùng. Jabat chức năng kakei bhap bini samar mek ikan tagok, brei caik lồng raong paatah di gauk, raong takik ikan saong ngak hacih lồng ikan. Langiu di nan, bhap bini brei ka ikan takik mbang pandap metah, piah takik labiah pandap mbang nyu ngak jeng jru khí ala ia.  

Danak dak “Dom takai nao kayua bhap bini” bahrau hu  Kapul Liên hiệp dam dara pakat negar  Việt Nam peih tabiak dalam negar meng harei  29-8 tal harei  23-9, oh kuhria umo thun di urang pataom mbaok tame.  Danak dak lac bruk tabiak meng danak dak Hulin anit ranam taneh ia hulin song bruk jak ba “10.000 takai nao yaok harei”, piah pachreih ba dam dara mesram rup pabhap, paglong pren yava. Meng yaok  km vận động viên nao /nduac hu meda rik dong  1.000 đồng tame kadung jien padang ngak sang ilamu bhap bini ka  16 bang takik di  Việt Nam.. 16  bangsa hu dong dalam danak dak ni, lac bangsa biak taklik menuac, ala 10 ribau urang.

Mong 1 page ini 31/8, angaok jalan raya 26 tapa xã Ea Trang, huyen MDrắk, tỉnh Đắk Lắk apui khuah mbang ralai radaih pajeng tuai daok nduac angaok jalan. Bruk nan oh njauk hagait tal mauac min ngak ka urang angaok radaih mboh biak huac. Urang peih radaih lac Trần Quang Tiến, radaih hu biển kiểm soát 86B – 013.25 di po radaih Anh Phát daok di tỉnh Bình Thuận pajeng labaih 40 urang peih meng tỉnh Bình Thuận nao Gia Lai. Tuk nduac tal xã Ea Trang ye apui khuah meng ala tagok abih radaih. Mboh apui, sa-ai Tiến peih radaih vaih tame tapen jalan, iew abih urang trun hu salamat. Hadei di labaih sa mong, apui khuah mbang abih sruh radaih gam saong pandap panda di jaik 40 tuai. Khat lahik kuhria tuk camereip tagok tal labaih 2,5 tỷ đồng.

Harei kabroi  (30/8), dom urang ilamu di Viện sinh học phân tử E-man di  Gia-các-ta brei thau đột biến “D614G” di vi-rút SARS-CoV-2 hu tanut  “njom mbak khang jang min palai pajoa hajual jang”  hu duah mboh dalam dom gen meng dom janih bệnh phẩm kayua Viện ni pataom mek. Dahlau di nan, đột biến “D614G” jeng hu duah mboh di 2 negar jiak tapen di Indonesia lac  Singapore song  Malaysia.

Bruk brei cuk pataih pacang pabah idung hu ba tame pandar meng harei ini 31/8 di dom labik dalam negar Niu Di-lân dalam tuk Oóc-lần lac ban praong di Niu Di-lân camereip brei cadu dom jalan pacang caga jit. Kayua pacang cakak hu jit, negar Thái Bình Dương hu 5 trieu bhap bini ini  hu padeih dom urang njom mbak dalam bhap bini.

Kuhria tal  5 tuk mesup ni (tukvak  Việt Nam), negar Mỹ  hu tapa sa mbang pandik harao bahrau ngan song labaih  6 triệu urang njom Covid-19 . Rilo Mban di  Trung Tây negar  Mỹ brei thau  urang njom bahrau tagok, dalam nan hu Ai-ô-oa, song rilo sang bac rah tabia kjit hadei di tuk  sinh viên mai veik sang bac, hu dom labik njauk bac tui jalan online./.

Urang lang: Hani Pha – Ái Nghiêm – 31/08 15:36:11