Nyaom biai peih ngak danak dak patagok bruk pasiam veik song lagaih tui di urang kamei bangsa takik gaok kan kandah kayua jit Covid-19 di tỉnh Đăk Nông

Tui pathau khan samar di Jabat Thường trực mban tacei jalan pakat negar ka pacang caga bala meng langik tasik, kuhria tal beir harei 19/10, hajan ia sua ngak ka 102 urang metai, 26 urang lahik. Trak abih lac di Quảng Trị hu 48 urang metai, 8 urang lahik. Urak ni, dom tỉnh từ Hà Tĩnh meng Thừa Thiên Huế hu ba jiak 29 ribau sang gam song labaih 91 ribau urang tal labik siam mekre. Hajan ia sua ngak brei dauk, glut jaleih, khut tayah 13 jalan roya di dom tỉnh Hà Tĩnh, Quảng Bình, Quảng Trị.

Mentri Quốc phòng saong Bộ Tư lệnh Quân khu 4 brei tagok quân hàm ka dom urang jakar, urang lin chuyên nghiệp, hạ sĩ quan urang lin di Đoàn Kinh tế - Quốc phòng 337, Quân khu 4 metai tuk ngak bruk. Mentri Quốc phòng pok panuac likau Akok negar alin brei Huân chương khik caga taneh ia hạng Nhì, hạng Ba ka dom urang jakar, urng lin Đoàn Kinh tế - Quốc phòng 337, Quân khu 4 metai tuk ngak bruk pacang caga, pasiam veik khut khat kayua bala meng langik tasik.

UBND tỉnh Đăk Nông bahrau peih Nyaom biai peih ngak danak dak patagok bruk pasiam veik song lagaih tui di urang kamei bangsa takik gaok kan kandah kayua jit Covid-19 dalam tỉnh (kayua danak dak patagok Liên hợp quốc UNDP Việt Nam dong brei). Tapa nan mboh hu dom kan kandah, tavak tavaiy di dom kapul nyaom, doanh nghiệp pak ni biak trak damak kayua Covid-19 song pasiam veik suai, tapa nan piah pataom veik jalan ngak. Danak dak hu phun jien 1 tỷ 400 triệu đồng, hu peih ngak meng bilan 9/2020 song kuhria tamat di puac thun ni, piah dong ka dom boh sang kan kandah, dom urang kamei bangasa takik patagok kinh tế, yam tal patrun kathaot khang kajap.

Labaih 605 tỷ đồng lac phun jien peih ngak Danak dak pakat negar patrun kan kathaot khang kajap vaktu 2016 -2020 di tỉnh Sóc Trăng. Mbiah tak urak ini, kuhria rah tapa baoh sang kathaot di tỉnh trun 30% sa thun, dalam nan sang kathaot urang bangsa takik trun 4%, sumu bruk ba tabiak tui Sarak. Dom xã hu rilo urang bangsa takik hu ngak salah dom tanut ka bruk padang ngak palei pala birau. Tỉnh Sóc Trăng ba tabiak bruk ngak dalam vaktu anak tal khik hu baoh sang trun kathaot dalam bhap bini bangsa takik meng 3 tal 4%.

Kuhria tal mesup ni (20/10), Việt Nam yam tapa harei ka 48 oh hu urang njom Covid-19 bahrau dalam bhap bini; hu tong thit ruak ka 1.046/1.140 urang. Dalam dom urang dok iek ruak di dom cơ sở y tế, urka ni hu 18 urang âm tính meng 1-3 mbang song SARS-CoV-2. Tui mintri Y tế, dom sruh jit hu pasang iek, min jit Covid-19 tuk halei jeng mbuan njom bak, abih di nyu nan lac tuk dom mbang par ba urang Việt Nam song chuyên gia mai palei negar. Langui di nan, tuk vak tal bilan đông xuân, langik lagaih ka dom ruak njom mbak tagok khang.

Jit ruak Civid-19 di châu Âu rah tabiak daka harei dak trak, dom taneh ia njauk ba tabiak dom jalan pacang caga. Cộng hòa Ai-len lac negar châu Âu akaok meti brei thau lac peih veik bruk pacang caga negar dalam 6 adit, meng kreh melam 21/10. Taong abih dom cửa hàng oh pablei pandap mbang yaok harei, dom nhà hàng, quán bar, gilang tapuk, muyim…brei kareik pabah mbang. Bhap bini Ai-len brei daok di sang saong oh tabiak atah 5km; dom sang bac saong dom gah kinh tế pandap pandar yaok harei brei ngak bruk. Langiu Cộng hòa Ai-len, bhum Wales di Vương quốc Anhhu brei thau ka jalan pacang caga dalm 2 dit, meng harei 23/10.

Cảnh sát Prang dok khik 15 urang pagam tal bruk pametai sa gru pato, dalam nan hu 4 anek saih pakat 2. Tapa duah thau tukamereip thau lac, Abdoullakh Anzorov, sa urang khủng bố brei jien piah sa anek saih umo 14 thun tacei mbaok Samuel Paty. Hadei di nan, adei ni hu ndom nyai song 3 anek saih karei. Cảnh sát Prang jeng daok ngak ka cambaih laih talei pambuak bruk di khol khủng bố song sa amaik ame di anek saih. Mintri Nội vụ Prang brei thau lac meda brei giải thể dom kapul nyaom di urang Islam di Prang hu pagam tal bruk nan. Sa sang megris Islam di tỉnh Seine-Saint-Denis brei kreih pabah mbang. Mbang pahadar pakat negar brei ka Samuel Paty sẽ hu peih ngak di melam 21/10 di ban ine Paris.

Rajei Anh oh khin pambuak veik bruk ginum meyai ka thỏa thuận hadei Brexit. Tui jabat Thủ tướng Anh, urak ini oh ka hu hagait caga piah ka bruk ndem meyai kayua EU oh ka ba tabiak bruk praong hagait karei dalm tuk taom gaok ngan saong dom bruk oh njauk gauk di dua gah. Rajei Anh daok brei thau lac meyah EU oh pambuak saong bruk sanya saong Anh sa thỏa thuận pablei salih dreih yau mboah tangin haong Canada ye Anh brei ginum meyai ka bruk pablei salih saong EU tui dom hukum di Gah Pablei salih dunya –WTO, min jien je glong jang./.

Urang lang: Ái Nghiêm – Hani Pha – 20/10  10:30:01