Alin jien bac ka anek saih bangsa takik yam tapa kan kandah bac da-a naih joi

Mentri Y tế birau khan brei thau cambaih, hadei di 1 bilan peih bruk klauk vaccine Covid -19 di AstraZeneca, hu 55.151 urang di 19 tỉnh, ban hu klauk jru. Tui gah pasang iek klauk jru hu labaih 33% urang hadei di klauk blaoh mboh: pandik, bhong meriak di labik klauk jru,glaih glar, pandiak, pandik akaok, glaok ta-ok; min nyu abih eng dalam 1 tal 2 harei hadei di tuk klauk jru. Tal urak ini, Viet Nam oh mboh thei ruak khan darah saong barah hadei di tuk klauk jru.

Meng harei 16/5, Mintri pato megru brei adat ka dom sang bac peih bruk pato online meneing atau tong abih asar kadha bac piah dong atau salih bruk pato tapak. Tui sarak 09 ka bruk khik ramik song peih bruk pato online dalam dom labik pato pakai phổ thông vsong pato pakai thường xuyên, pato bac online lac jalan daong saong salih ka pato bac tapak, dong paglong bruk pato bac, patagok pren khang pandar công nghệ thông tin. Akaok sang bac hu adar brei peih bruk pato bac online piah dong atau salih ka pato tapak di sang bac dalam vaktu anek saih oh nao bac hu kayua dom makna lingiu di hatai khin.

Tỉnh Đoàn, Sở Pato megru – Khoa học saong Công nghệ tỉnh Bạc Liêu pambuak saong Kadung jien bac Vừ A Dính, Kalup kapol “ Kayua Hoàng Sa – Trường Sa anit ranam” birau alin brei 70 paok jien bac ka anek saih bangsa takik yam tapa kan kandah bac da-a naih joi saong anek bik di urang nao tasik hu raidiuk kan kandah dalam tỉnh, yaok paok 1 trieu dong. Tukvak tapa, meng Kadung jien Vừ A Dính hu padang rilo danak dak yau: Pambuak sauk caong khin, pabam caong khin anak tal, dom danak dak kayua tasik pulao…daong anek saih hu raidiuk kan kandah dalam negar kham yam tagok dalam bac da-a.

Piah ka anek saih di dom xã, palei biak kan kandah samar taduan hu brah dong dalam học kỳ II thun bac 2020 - 2021, UBND tỉnh Ninh Thuận pandar karja dom puk palei hu anek dalam bhum hu mbang tui samar ngak salah bruk dong brah. Tapa pasang iek dalam tỉnh hu 3.257 anek saih di dom xã, palei biak kan kandah dok tui bac di dom pakat bac dok dalam 6 huyện. Dalam vaktu ka II, yaok anek saih hu daong dalam 4 bilan samu song 60 kg brah.

Công an tỉnh Đồng Nai birau brei chap mek 6 urang nan lac: : Nguyễn Tiến Dũng, Phạm Ngọc Xuyến, Trần Hiến Minh, Trần Ngọc Hưng, Trần Uy Quyền, Vũ Thanh Hà, njauk duis pambak tame angan bruk ngak meblah drap ar di Kadung jien tín dụng bhap bini Gia Kiệm, huyện Thống Nhất. Gam saong nan brei pasang iek labik daok saong labik ngak bruk ngan saong 5 urang daok di Đồng Nai saong 1 urang di tỉnh Bà Rịa – Vũng Tàu.

Japon daok kuhria ba Tokyo tame bruk khẩn cấp bahrau dui atah 1 bilan piah pasang iek dom urang njom Covid-19 dok tagok glong. Tui nan mintri Kinh tế Japon hu panuac brei 1 bilan takik peih ngak dom bruk di Tokyo, trun tuk vak peih pabah mbang di dom quán bar, nhà hàng… Dom urang halei ngak suan njauk phạt 200.000 Yên (samu 1.820 đôla). Daok ban Ky-ô-tô song tỉnh Ô-ki-na-oa brei patakik taom gaok gauk dalam 24 harei, meng harei 12/4.

Hãng tin Reuters brei thau, bruk pataom gar veik dom gilai container pajeng pandap pandar tagok di dom pabah lam nge praong hadei di bruk gar tavak dui atah jaik 1 adit di Kênh đào Suez saong ngak padeih bruk pablei salih di dunya. Bruk nan ngak brei dom công ty pajeng ba pandap angaok jalan tasik njauk abih rilo jang yaok trieu dola bo oh hu bảo hiểm bayar. Dom labik pablei rai di châu Âu saong Mỹ brei thau ka bruk trun pandap pabak kayua gaok kan kandah meng bruk di kênh đào Suez.

Dom urang roh duah Ai Cập bahrau duah mboh ban klak prong abih di negar ni hu meng labaih 3 ribau thun dahlau. Nan lac ban hu meng saman Patao Amenhotep III. Labik inem mek hu khik ramik biak siam, tong abih dom danieng yau dok tamo song ginup pandap pandar yaok harei./.

Urang lang: Hani Pha – Ái Nghiêm – 10/04 06:45:45