Tỉnh Hải Dương peih bruk dut iek Covid-19 mẫu pagam gauk ka anek saih,... lac bhap bini Hải Dương daok tui bac di dom tỉnh, ban karei

Mentri Y tế brei thau meda peih bruk ginum biai online ngan saong 63 tỉnh, ban di puac adit ini piah brei thau bruk peih klauk jru vaccine Covid-19. Tui kuhria dahlau bruk klauk jru vaccine meda brei peih ngak meng akok adit anak, dahlau di abih di dom tỉnh hu jit, lac đô thị praong, labik jalan mbak pambuak rilo labik. Jeng dalam harei ini 5/3, ĐH Y Hà Nội, Viện Vệ sinh dịch tễ trung ương jeng brei tut angan urang halan hatian klauk jru vaccine pacang Covid-19 angan Covivac kayua Viện Vắc xin saong sinh phẩm y tế Nha Trang roh duah, ngak tabiak. Ini lac vaccine pacang Covid-19 mbang ka 2 di Viet Nam hu klauk iek vaccine di manuac. Tukvak ka 1hu klauk iek, hu 120 urang umo meng 18 tal 59 thun hu klauk 2 mbang jru vaccine, urang halan tian hu dut iek ruak 8 mbang dalam sa thun piah taong yaom vaccine siam yau halei.

Meng harei ni, 5-3, tỉnh Hải Dương peih bruk dut iek Covid-19 mẫu pagam gauk ka urang peih radaih, anek saih, sinh viên lac bhap bini Hải Dương daok tui bac di dom tỉnh, ban karei. Tuk peih bruk mek mẫu pagam gauk, bhap bini meda patak pataom hu jien ka yaok mbang dut iek. Dom urang caong dut iek njauk duah kapul piah pagam gauk, rilo abih lac 5 urang sa kapul. Tukvak mek mẫu meng maong 7 mateh tal maong 12 saong maong 1 jala pandiak tal maong 4 mateh bier harei yaok harei, gam harei sanecar saong harei adit. Bruk dut iek hu khan brei thau dalam 24 maong meng di tuk mek mẫu, langiu di dom bruk đặc biệt. pasak pasang iek ruak kik tỉnh Hải Dương meda brei thau ka yaok rahra. Ngan haong urang peih radaih, harak brei thau lac âm tính ngan haong SARS-CoV-2 hu yaom dalam 72 maong tuk tapa bhum hu jit.

Ndem meyai saong báo chí gah langiu var ngak bruk saong Sở Kế hoạch-Đầu tư (KH-ĐT) biar harei 4/3, Chủ tịch UBND TPHCM Nguyễn Thành Phong brei thau, Ban raya oh ka kuhria tal bruk peih veik dom bruk pablei salih daok brei padeih piah pacang caga jit Covid-19. Tui ong Nguyễn Thành Phong, Ban raya HCM lac labik hu rilo bhap bini, cadu hasit nan taduan kan kandah trak, tuk hu urang njom mbak dalam bhap bini. Meng tuk Ban raya HCM brei ka anek saih, sinh viên nao bac gilac saong peih pabah mbang dom gah ngak bruk mbiah tal ini birau hu 4 harei, meyah khin peih veik dom bruk ngak mbang karei, Ban raya HCM njauk brei hu tukvak taong yaom, abih di nyu lac dom bruk hu rilo manuac dalam labik pacang sir.

Anek naih kumei umo 3 thun laik trun meng tal 12 di sang chung cư harei ni hu tabiak truh sang iek ruak. Hadei di labaih 4 harei taong ruak, kamuan hu tani tanat, taom gaok siam; oh patuk, oh pandiak, oh mboh lac kan suak yava. Dahlau di nan, bier harei 28/2, kamuan H di tal 12A di sang 60B Nguyễn Huy Tưởng, phường Thanh Xuân Trung, quận Thanh Xuân, Hà Nội meng dalam sang tapa lan can saong laik trun. Patuah di nyu tuk kamuan laik trun atah di mbaok haluk labaih 2m hu saai Nguyễn Ngọc Mạnh (umo 31 thun, daok di xã Vĩnh Ngọc, Đông Anh, Hà Nội) pandok, daong trun manieng prein tuk laik trun tapung tôn di sang caik radaih. Bruk ngak biak siam makre di saai Mạnh hu daong ka kamuan oh njauk hagait. Thủ tướng rajaei hu brei harak pok manyaom ka saai Nguyễn Ngọc Mạnh.

Birau ini, Jabat Cảnh sát hình sự, Công an tỉnh Đak Lak birau chap khik saong ba tabiak kaoh tui hukum urang brei mesre laba trak 970%. Tui nan, nyaom urang nan pah sang daok di xã Hòa Thắng, TP. Buôn Ma Thuột. Dom urang nan in ba-ar yaih khan hu tavak laik phone ba prai di dom jalan di Ban Buôn Ma Thuột, huyện Krông Pắk saong Ea Kar. Tuk urang iew phone mai mesre jien, dom urang nan nao iek drap ar di urang blaoh brei jien mesre ngan saong jien laba meng 110% tal 970% sa thun. Ngan saong laba tagok tal 970% meyah brei mesre 1 trieu, hadei sa thun urang mesre njauk bayar tal 9,7 trieu đồng. Thun 2020 saong 2 bilan akok thun 2021, Cong an Dak Lak taong tayak 19 nyaom ngan saong 97 urang saong 4labik brei jien mesre laba trak. Dalam nan, ba tabik kaoh tui hukum 14 mbang ngan saong 42 urang ka bruk brei mesre bala trak.

Niu Di-lân harei ni trun pakat kan kandah di sóng thần tuk dom mbang riyak praong nao tapa bloh. Tui jabat khik ramik samar drak pakat negar Niu Di-lân, dom urang paduan nao daok karei urak ni meda mai sang veik. Dahlau di nan, yaok ribau urang di ar tasik gah timur di pulao Bắc Niu-Lân hu ba rahra nao daok di labik glaong jang hadei di tuk klau bala magei baoh taneh di ar tasik ngak pachreih còi báo động saong njauk kakei lat bala sóng thần. taeng dalam harei kabroi saong dah page ni, Niu Di-lân njauk hu 3 mbang magei baoh taneh, dalam nan, mbang magei baoh taneh bahrau abih khang pakat 8 di akaok pulao Kermadec.

Gah pasang iek taphia negar di Mỹ chap mek labaih 4.500 urang mai meng Mexico tame Mỹ di harei 3/3.Tui Hãng tin Reuters, ini lac harei chap hu urang biak rilo saong mboh cambaic laic lac tagok rilo mbang dut saong tukvak rajaei tổng thống Donald Trump. Bilan 1 thun 2021, gah pasang iek labik taphia negar chap hu labaih 2.400 urang di cư yaok harei di labik bhum tây nam min urak ini tagok dua mbang. Rilo urang haduh hatai lac urang tame Mỹ suan hukum meda tagok rilo jang dalam dom adit anak tal saong ini lac bruk kan kandah ka karja di tổng thống Joe Biden, urang caong khin duah jalan ngak bahala brei ka dom urang di cư bo oh ngak kan kandah taneh ia ini.

Italia bahrau hu panuac oh taduan pajeng 250 ribau mbang vắc-xin caga Covid-19 di AstraZeneca saong bruk ni hu Liên minh Châu Âu pachreih tui. Mintri Ngoại giao Italia langyah ka makna di bruk ngak ni lac kayua Australia oh njauk lac negar daok njauk kan kandah trak kayua Covid-19 kayua dom urang ruak di negar ni daok bier, dalam tuk nan Italia saong Liên minh Châu Âu lac daok kurang vaccine biak trak./.

Urang lang: Thu Thảo – Ái Nghiêm – 05/03 10:33:07