Rilo tinh ban brei pacang cakak labik halei hu jit ruak 

Mentri Y tế brei thau page ini 20/5 hu 30 urang dương tính nCoV di labik daok karei atau labik pacang cakak, ralo meng lac di tỉnh Bắc Giang saong Bắc Ninh, dalam nan Ninh Bình mbang akok meti hu urang ruak. Dom urang birau njom ruak meng ka 4691-4720. Yau nan mbiah tal ini 29 tỉnh, ban hu ruak, abih tih urang njom ruak dalam bhap bini meng harei 27/4 mbiah tal ini tagok tal 1.678.

Bier harei 19/5, Ban pato tacei pakat negar pacang caga jit Covid-19 hu mbang ginum biai kayua Phó Thủ tướng Vũ Đức Đam dang akaok, Phó Thủ tướng ieu kakei mintri Y tế samar drah padang ngak, patabiak pato tacei pambuak haong dom jalan dut iek karei di gauk ngan haong dom urang negar langiu mai Việt Nam, dahlau di abih lac jalan kapar ahaoh. Hadei di tuk dut iek, meda parabha piah oh njauk taong abih manuac njauk daok karei pataom gauk 21 harei atau 14 harei dreih yau gauk, urang halei salamat njauk daok karei pataom gauk lac 7 harei saong brei nao daok di sang piah tui iekprein yava.

Sở Jalan mbak pajeng ba tỉnh Ninh Thuận brei thau, bruk jao brei taneh ngak jalan cao tốc Bắc – Nam tapa tỉnh Ninh Thuận hu labaih 99%, urak ini tok daok tavak jalan talei điện 22Kv oh ka ba nao. Kuhria tal urak ini, tỉnh Ninh Thuận mbaoh harak brei bayar jien taneh, daong jien, padang labik daok birau ka 1.229 baoh sang. Dom baoh sang hu taduan jien labaih 99%. Bruk peih ngak dom labik daok birau jeng hu ngak salah baloh. Urak ini dom huyen yau Ninh Sơn saong Thuận Nam daok brei suak sam, jao taneh ka mikva.

Piah pacang cagak bruk pablei salih suan adat hukum di jalan tapen negar, jabat Thường trực Ban pato tacei 389 tỉnh An Giang hu padang blah Zalo “Ban pato tacei 389 tỉnh An Giang”. Tapa nan piah pathau khan adat hukum ka bruk pacang caga pablei salih suan hukum, bleik saleik dalam pablei salih saong ngak pandap ja; brei thau ka bruk ngak hu pambuak tal bruk pablei salih suan hukum, blei saleik dalam pablei salih; taduan panuac khan ka bruk ngak oh siam di dom gah chức năng. Langiu di nan, blah Zalo ni daok ngak brei paglaong bruk pambuak gauk, dom danak dak bruk ngak di mban pato tacei yau pasang iek, cap khik dom bruk pablei salih lsuan hukum, blei saleik dalam pablei salih saong ngak pandap ja.

Harei 19/5, UB palih ruah di ban sit Gành Hào (huyện Đông Hải) gam saong Đồn Biên phòng Gành Hào padang kapul tabiak tasik peih bruk palih ruah aval urang ka QH mbang XV saong urang ka HĐ bhap bini tỉnh Bạc Liêu vaktu 2021-2026 ka 37 urang jakar, urang lin daok ngak bruk di bhum tasik. Jeng dalam harei nan, Tổ ngak bruk palih ruah aval tagok gilai Trường Sa 04 saong Trường Sa 19,  hu pataok tame Lữ đoàn 171 Hải quân di TP Vũng Tàu, tỉnh Bà Rịa-Vũng Tàu saong jao brei thùng phieu palih ruah urang ka QH mbang XV saong HĐ bhap bini tỉnh Bà Rịa – Vũng Tàu vaktu 2021 – 2026 ka gah văn thư khik piah di Bộ Tư lệnh Vùng 2 Hải quân. Ini lac thung phieu palih ruah aval di urang jakar, urang lin pak nhà giàn DK1 saong dom gilai daok ngak bruk angaok tasik.

Harei kabroi (19/5) dom negar praong di dunya hu ginum biai ka sa mbag nyaom biai pakat glaong bahrau di Viên, Áo, ka bruk ba Mỹ mai veik bruk sanya hạt nhân haong I-ran, dalam tuk dak harei dak brei mboh lac samar pambuak hu veik. Par akaok mbang nyaom biai di Nga, Trung Quốc, Đức, Pháp, Anh saong I-ran, ong En-ri-kê Mô-ra (Enrique Mora) brei thau, mbang ginum biai hạt nhân haong I-ran hu cak rok, min jak jeng na ka oh hu tani tanat kayua gaok rilo bruk ka kandag. I-ran brei thau, dom bruk hu makna praong njauk hu taong yaom saong ndem mayai nao ma veik di dalam negar dahlau di tuk mhaoh tangin tame.

Tổng thống Nga Vladimir Putin saong Chủ tịch Trung Quốc Tập Cận Bình hu mbaok di var peih bruk padang ngak danak dak năng lượng hạt nhân peih praong di Trung Quốc saong Nga, tapa riyak papar binguk. Nga saong Trung Quốc peih bruk padang ngak 4 tổ mac điện birau di dua sang mac hạt nhân di dom tỉnh Liêu Ninh saong Giang Tô, taong abih jeng pandar cong nghe di Nga. Langiu di nan, dom bruk roh duah birau di Nga saong Trung Quốc jeng hu peih ngak. Bruk peih padang ngak hu rah tabiak dom mon  dahlau di tuk ndem menyai nao mai di Mentri Ngoại giao Mỹ saong Nga, kuhria caga ka njaom biai pakat glaong Nga - Mỹ di bilan 6 anak tal.

Dom urang njom Covid-19 hu trun di grauk labik dalam châu Mỹ, daong trun kan kandah ka gah y tế, min dom negar di Mỹ Latinh saong Caribe njauk samar drah brei hu pabak vaccine. Labaih 400 triệu mbang vắc-xin caga Covid-19 hu pandar di dalam châu lục, min jaik abih lac di Mỹ. Bahrau hu 3% urang Mỹ Latinh hu klauk ginup jru pacang caga veik Covid-19 saong jeng daok sa jalan atah piah ngak brei ka yaok menuac urang hu khik caga plaih di ruak mbuan metai lahik ini./.

Urang lang : Thu Thảo -Ái Nghiêm -20/5