Dom urang ngak harak gar likau mbang jien daong oh hu bruk ngak 

6 bilan tapa, abih tih dom doanh nghiệp padeih ngak mbang hu tukvak lac 29.000, rilo jang 38,2% duk saong dom bilan ini thun blaoh. Kuhria ta-eng dalam quý 2 thun ini, dom menuac oh hu bruk ngak dalam umo ngak bruk (meng 15 thun tagok) lac jaik 1,3 triệu urang. Meyah dalam 6 bilan akaok thun blaoh, urang ngak umo meng 15 thun tagok hu bruk ngak lac 54,4 triệu urang, tal urak ini trun daok 51,8 triệu urang (takik jang 2,6 triệu urang). Dom bruk hu menuac ngak trun khang duk saong tukvak ini thun blaoh yau gah công nghiệp ngak pandap, labik brei pah labik ndih daok saong mbang huak, pato pakai, pablei salih praong – sit, pasiam  ôtô, môtô, radaih patuh... Ini jeng lac tanut trun rilo di abih dalam 10 thun tapa.

Tui ong Tào Bằng Huy, Phó akaok Cục Bruk ngak (Mintri Lao động-Thương binh saong Xã hội), rilo doanh nghiệp gia công menyim, jhik, takhaok klik, ngak dịch vụ, du lịch daok having kaok duah bruk ngak ka yaok triệu urang ngak: “Pandap tamo daok caga piah ngak di doanh nghiệp daok takik nao saong oh ka pablei tabiak negar lingiu hu. Kayua yau nan ye bo doanh nghiệp jeng daok kan kandah. Tui kuhria mboh di Mintri ilamu-Thể thao saong Du lịch, dalam 2 hu jaik 95% doanh nghiệp ba menuac nao ravang me-in di dunya njauk padeih ngak, 137 doanh nghiệp likau brei mek veik harak adat. Daok gah bảo hiểm oh hu bruk ngak, 7 bilan thun 2020,dom urang ngak harak gar likau mbang jien daong oh hu bruk ngak lac 686 rabau 214 menuac, rilo jang 32% duk saong tukvak ini thun 2019. Dom bilan di thun 2019, hu 60-70 rabau menuac ye thun ini, hu jaik 100 rabau urang likau mbang jien daong oh hu bruk ngak”

Yaom lac darak pasar urang ngak di Việt Nam mboh yau daok siam veik, rilo bruk urang ngak njauk padeih bruk, urak ini hu mai veik ngak bruk. Min 6 bilan tapa bahrau hu 120 rabau bruk ngak bahrau duk saong yaok triệu urang lahik bruk ngak kayua jit Covid 19. Tui kuhria tal puac thun hu 70% doanh nghiệp saong 3 triệu meteh tal 5 triệu urang ngak gaok kan kandah. Kayua yau nan ye, tui ong Vũ Quang Thọ, urang ilamu gah urang ngak, bruk ngak ye brei padang bruk brei thau ka bruk ngak piah daong ka doanh nghiệp khik bruk ngak mbang, piah hu bruk ngak ka urang ngak:“Kol dahlak jeng maong iek jien bilan lac ka 1 min urak ini jien bilan oh daok lac ka 1 tra bo bruk ngak meng lac ka 1, lac bruk brei hu ka urang ngak, kayua hu bruk ngak, kol drei meng hu jien mek tame saong hu jien bilan”

Bahrau ini, dom tỉnh ban hu daong ka urang gaok kan kandah kayua jit Covid-19 tui sarak 42 di Rajaei saong sarak 15 di Thủ tướng ngan saong pok jien daong abih tih lac 62.000 tỷ đồng. Jabat chức năng daok pasang iek piah khik ka urang kan kathaot, gaok kan kandah di jit ruak jeng hu daong abih. Lingiu di nan, Mintri Lao động Thương binh Xã hội jeng hu roh duah dom sarak lagaih haong bruk di anak meta, meda ba tabiak ngak hu piah peih praong bruk daong tal dom urang daok caong hu daong. Mintri meda pandar 1 pok jien dalam kadung jien Bảo hiểm thất nghiệp saong ieu pataom yaok gah piah patagok bruk pato bruk ngak, salih bruk ngak ka urang ngak piah lagaih haong bruk di anak meta./.

Mousa Phương lang sap - 28/08