Danak dak dui talei điện negar meng baoh taneh tabiak dom pulao di tỉnh Kiên Giang

Dalam chreih chrai haong bhap bini dalam taneh ia pahadar Harei negar 2/9, bhap bini daok di dom pulao jhung abih di gah meraong negar jeng chreih chrai haong hala dok, khan bai saong dom rija roya. Raidiuk di bhap bini angaok dom pulao di tỉnh Kiên Giang urak ini salih bharau khang meng hu rilo sarak daong di karja hu ba tabiak ngak, dalam nan hu bruk buh jien tabiak ngak dom danak dak gah điện.

Meng thun 2014 tal urak ini, gah điện lực miền Nam hu buh tabiak yaok rabau tỷ đồng padang ngak rilo danak dak dui talei điện negar meng baoh taneh tabiak dom pulao di tỉnh Kiên Giang, daong ka raidiuk di bhap bini angaok dom pulao dak harei dak kaya meda, gam rik daong khik caga quyền ngak po tasik pulao.

Tal urak ini gah điện hu ba điện negar tabiak pulao Hòn Tre saong plao Lại Sơn di huyện Kiên Hải, duh ka jaik 3.500 sang bhap bini daok pak ini, ngan saong điện yaok thun tagok 30% kayua pandar dak harei dak rilo jang, pabak ka dom bruk du lịch, bruk ngak ikan, dom labik ngak pandap oh padeih patagok.

4 thun dahlau, xã pulao Lại Sơn di huyện Kiên Hải, tỉnh Kiên Giang lac 1 bhum taneh kan kathaot, ka oh hu điện negar. Thun 2016, danak dak dui điện meng pabah lamnge Xẻo Nhàu tabiak pulao Lại Sơn ngak salah bloh hu daong ka raidiuk di bhap bini oh padeih salih bahrau. Di xã pulao Lại Sơn urak ini, jalan mbak hu tuh bê tông praong, laneng, rilo labik padeih padei, rilo hotel bahrau hu tamuh tagok, quán mbang menyum biak rilo duh ka rilo tuai damuai meng baoh taneh tabiak ravang me-in, menei tasik.

Ong Nguyễn Thanh Tùng – Phaok akaok UB bhap bini xã Lại Sơn brei thau, meng tuk hu điện negar, xã hu rilo salih bharau, dom bruk ngak mbang gah du lịch, pablei salih, ngak kong, ngak ikan cakrok tapa yaok thun. Meng tuk hu điện, lingiu di bruk duh ka raidiuk, pabak mạng Internet, bruk pato bac di tal bac, sang bac, bruk hu thau dom kadha di taneh ia, di dunya di rahra daok angaok pulao hu mbuan lagaih oh lah hagait menuac sia daok di baoh taneh.

Sa-ai Phạm Bích Trâm - po nhà nghỉ Nhã Kỳ, daok di ấp Bãi Nhà A, xã Lại Sơn khan lac, meng tuk hu điện negar, sa-ai peih praong jang 10 bilik ndih, tagok jeng 22 bilik, dom bilik jeng hu jamriak la-an, tu la-an, tivi, hu bình menei ia pandiak saong raok tuai mai ravang me-in hu rilo jang. Meng hu điện, yaok bilan tok abih jien điện 6 - 7 triệu đồng, trun hu 40% jien điện duk saong pandar jamriak điện yau dahlau daih.

Menuac sia huyện pulao Phú Quốc, tỉnh Kiên Giang jeng daok kanal hadar bruk bui sambai tuk danak dak cáp ngầm tapa tasik 110KV Hà Tiên - Phú Quốc hu peih điện. Ong Nguyễn Văn Nam, daok di khu phố 4, ban sit Dương Đông, huyện Phú Quốc hadar veik, tuk bhap bini Phú Quốc hu pandar điện negar njauk di tuk caga mbang Tết Nguyên đán thun 2014. Sang halei jeng bui sambai kayua oh daok bruk truac gom meng menyek hadei di rilo thun saong daok caga hu dom salih bharau dalam raidiuk tuk hu điện negar. Meng tuk hu điện tal urak ini, raidiuk di bhap bini Phú Quốc meda lac oh lah hagait di baoh taneh kayua bruk patagok biak samar.

Jeng bui sambai chreih chrai yau hadom menuac sia daok di Phú Quốc, ong Lê Văn Bảy, daok di xã Gành Dầu khan lac, dahlau daih Phú Quốc pandar điện meng jamriak yaom 25.000 đồng/kWh, điện tok pandar piah truac hadah sang atau pandar ka dom bruk njauk pandar karei min abih biak rilo jien. Tuk hu pandar điện negar, meda lac thei jeng oh daok duh hatai ka jien điện, bo sahanag hatai pandar điện habar ka bruk ngak mbang, pablei salih tagok hu kein laba.

Piah khik kajap bruk pabak điện brei ka pulao Phú Quốc, bilan 3/2020, Tổng công ty Điện lực miền Nam hu padang danak dak jalan điện 220kV Kiên Bình - Phú Quốc, urak ini ngak hu jaik 90%, tui kuhria puac thun ini hu ngak salah abih. Ini lac danak dak điện praong di gah điện lực miền Nam, tuk ngak salah blaoh hu daong prein ka huyện pulao Phú Quốc cakrok patagok.

Ong Huỳnh Quang Hưng – Phaok akaok UB bhap bini huyện Phú Quốc – brei thau, meng tuk hu điện negar, Phú Quốc hu jhul khang bruk padang ngak dom jalan mbak, hạ tầng kỹ thuật bahrau, dui pachreih hu labaih 200 danak dak buh biak rilo jien tame ngak mbang, ba Phú Quốc jeng labik nao tal biak chreih chrai di yaok triệu tuai damuai daok dalam saong langiu taneh ia mai ravang me-in, padeih padei. Điện negar jeng hu daong ka menuac sia angaok pulao patagok bruk ngak mbang, kinh tế sang meng pala drak, raong glang, tal taong cap kaya ikan…/.

Urang lang: M. Phương – 13/09