Njam hijao di Đà Lạt (Lâm Đồng) pablei hu takik, ngak ka rilo urang nong njauk li-ua klaak piah ngak khak hijao

Mesup ini (19/2), Tỉnh ủy Bến Tre brei thau, ong Trương Vĩnh Trọng dahlau daih lac UV mintri Chính trị, Phó Thủ tướng dahlau daih, metai mon 3 meteh di sang tuk umo 79 thun. Ong Trương Vĩnh Trọng ndih tapui harei 11/11/1942 di xã Bình Hòa, huyện Giồng Trôm, tỉnh Bến Tre. Dalam bruk cách mạng, ong Trương Vĩnh Trọng pan akaok rilo bruk praong, hu rilo rik daong ka bruk cakrok di taneh ia, hu Đảng, karja rilo mbang pok meyaom. Ndam metai ong Trương Vĩnh Trọng kayua mBan CHTW Đảng dang tabiak ngak dalam Hội trường praong di tỉnh Bến Tre.

Mesup 19/2, Akaok mintri Y tế Nguyễn Thanh Long pal akaok mbang nyaom online pacang caga jit Covid-19 song dom tỉnh ban. Mintri Y tế tong yaom: jit ruak mbang ka 3 biak srau kadau kayua njom biến chủng bahrau njom mbak glong jang 70%. Urak ni, urang jom dalam negar dak harei dak tagok. Meng hu peih ngak khang rilo jalan ngak , urak ni 12/13 tỉnh ban pasang iek hu jit ruak. Mintri Y tế hu panuac kakei dom tỉnh, ban caga chip 3 kadha: ka sa lac brei dok karei F1, pacang cakak anek ruak njom tabiak bhap bini. Ka dua, khik ramik tal yaok menuac urang piah tuk rah tabiak sruh jit, nyaih ka bruk njom mbak dalam labik brei dok karei. Ka klau, kuhria caga chip bruk dut iek biak praong song patagok pren dut iek dalam tuk vak biak katut.

Anak bruk mehit lac tỉnh Bình Phước brei taong abih anek saih, SV padeih bac mbiah tal abih harei 14/3, mesup ini, Sở Pato Megru tỉnh Bình Phước hu harak payua chip tal dom sang bac. Tui nan, taong abih anek saih dom pakat dalam tỉnh hu padeih bac piah pacang caga jit Covid-19 tal abih harei 28/2/2021. Piah khik siam bruk bac da-a thun bac 2020-2021, dom sang bac jeng daok pato online atau dom jalan pato karei ka nyu lagaih haong bruk pacang caga jit di tỉnh.

Harei 19/2, Jabat CSĐT Công an tỉnh Đồng Nai brei thau lac hu harak ieu ong Phạm Văn Sáng, umo 63 thun, urang dahlau deih ngak Akaok Sở Ilamu song công nghệ Đồng Nai, tabiak mbaok. Dahlau di nan, Jabat CSĐT hu tabiak harak khởi tố vụ án hình sự, khởi tố ong, tabiak harak chap kreik ong Sáng piah pasang iek ka duas "ngka suan hukum ka bruk padang ngak ba tal khat lahik trak". Min, ong ni nduac dauh tabiak truh labik dok. Bilan 7/2020, mBan Bí thư kaoh angan ong Phạm Văn Sáng tabiak truh Đảng.

Hadei di dom harei padeih Tết, njam hijao di Đà Lạt (Lâm Đồng) hu rilo min pablei hu takik, ngak ka rilo urang nong njauk li-ua klaak piah ngak khak hijao. Tui lambaok sa Cty kaya nong, hadei Tết njam pablei ka darak pasar bhum kreh negar haong Hà Nội trun daok takik, di TPHCM trun jaik 25%. Min Jabat Kinh tế TP. Đà Lạt khan lac kayua njam hu rilo, rilo jang harak pambuak bruk, oh lac kayua jit Covid-19 tamuh veik bo ngak kan kandah tal pala saong pablei njam di Đà Lạt.

Dom kapul nyaom di gah Y tế dunya (WHO) ngak salah bruk 28 harei di Vũ Hán, Trung Quốc bo oh duah mboh bruk halei ka asal di SARS-CoV-2. Dom urang jakar ndom lac jit prong Covid-19 ngak ka labaih 110 triệu urang njom song labaih 2,4 triệu urang metai meda lac kayua sa janih hagait nan pabak tapa anek menuac. Dom negar phương Tây hu panuac lac Trung Quốc oh ka tantu cambaih laih dalam tuk camereip di jit prong Covid-19, ngak ka jit ruak yam tapa langiu negar song njom mbak grauk labik di dunya.

Indonesia brei thau lac meda brei adat ka karja dom tỉnh ban phạt dom menuac oh khin klauk vaccine caga Covid-19, saong brei ba angan dom urang nan tabiak truh dom danak dak daong di karja... Tui pasang iek di Mintri Y tế Indonesia, 65% menuac sia taneh ia ini brei thau lac khin klauk caga Covid-19, dom urang karei brei thau lac huac abih jien saong klauk vắc xin blaoh oh thau njauk hagait halei oh. 8% oh khin klauk pacang. Indonesia hadei di nan tabiak panuac lac klauk brei saoh.

Thủ tướng Australia Scott Morrison ndom lac bruk pacang klah rabha khaw tin harak mbao di Facebook brei mboh bruk suh sah lac dom công ty công nghệ prong sahneng lac drei hu quyền glong jang rajaei. Dahlau di nan, Facebook oh brei vak khaw tin harak mbao Australia angaok jalan ni piah cagar veik hukum pandar dom hãng công nghệ bayar jien ka asal kadha harak mbao di Australia. Thủ tướng Morrison ndom lac bruk ngak ni di Facebook oh cakak hu Quốc hội negar ni brei tapa hukum./.

Urang lang: M. Phương – Hani Pha – 19/02 15:46:45