Đại tướng Võ Nguyên Giáp lac sa dalam dom urang pan akaok hadah krah di CM Việt Nam

Mesup 25/8, uan bruk pahadar 110 thun Harei menek Đại tướng Võ Nguyên Giáp (25/8/1911 – 25/8/2021), Mintri Quốc phòng pambuak bruk haong mBan Tuyên giáo Trung ương, Jabat Rajaei haong Tỉnh ủy Quảng Bình peih ginum biai pakat negar “Đại tướng, Tổng Tư lệnh Võ Nguyên Giáp – sa urang gah quân sự biak naih gheih, urang pan akaok hu angan je praong di cách mạng Việt Nam”. Brei panuac di ginum biai, Akaok Mintri Quốc phòng Phan Văn Giang ndom lac, Đại tướng Võ Nguyên Giáp lac sa dalam dom urang pan akaok hadah krah di CM Việt Nam, hu buh prein yava praong ka bruk dak padang, mesruh metak saong praong tagok, jayah praong di bol bala bhap bini Việt Nam.

Mintri Pato Megru bahrau tabiak Sarak ka bruk ngak di thun bac 2021-2022 pacang caga jit Covid-19. Dalam nan, bruk praong camereip lac padang ngak saong ba tabiak jalan ngak ka thun bac lagaih haong jit ruak dalam palei. Sarak tacei cambaih, oh tagok yaom jien bac dut haong thun bac 2020-2021; hu sarak daong, oh mek jien, trun meneing jien, dui atah tukvak đóng jien bac, daong tapuk bac da-a ka dom anek saih sang kan kandah.

Meng harei ini (25/8), Mintri Y tế brei thau lac meda ba jru pacang virus Molnupiravir tame kadung jru an sinh, ngan haong 200.000 kadung jru hu brei ka F0 di TP.HCM. Abih di nyu nan lac, mbang camereip abih hu 3 robot hu pandar piah ba pandap mbang menyum, ndom biai haong urang ruak. Hu 360 urang ruak pandar jru dalam 2 mbang ngak iek angaok menuac, tuk camereip mboh hu siam mekre, salamat, abih di nyu lac ngak hacih atau trun meneing virus di urang ruak COVID-19 mbiah haong hanjul hadei di 5 harei taong ruak. Min brei menyum jru dak samar dak siam.

Pasak pasang iek ruak kik TP.HCM brei thau, kuhria tal mesup 25/8, ban raya hu 185.367 urang njom COVID-19; abih tih urang ruak thit abih ruak hu nao sang lac 93.289. Ban raya daok peih bruk mek mẫu dalam bhap bini, tui kuhria dom mẫu njauk mek di bhum kanjik, bhum bhong lac 2 triệu tal abih harei 25/8. Urak ini ban raya hu padang 274 dalam 400 bilai y tế lưu động, piah tui iek prein yava F0 tuk taong ruak di sang.

Harei 25/8, UBND tỉnh Bình Phước hu harak samar drah ka bruk khik ramik pandap saong peih bruk test samar ka urang peih radaih, urang nao gam radaih piah pasang iek jit ruak. Tui kuhria mboh, dom menuac njom ruak di Bình Phước tagok dalam tukvak tapa rilo meng lac njom mbak meng dom urang peih radaih mai meng TP.HCM. Bahrau di abih, melam 23/8, di huyện Chơn Thành hu 8 urang dương tính SARS-CoV-2, hadei di nan hu 3 F1 di 8 urang nan jeng F0. Tapa duah thau mboh lac njom mbak meng urang peih radaih pajeng pandap tame labik ngak kong ini mai meng TP.HCM.

Urang jakar y tế Australia harei ini ndom lac bruk y tế taneh ia daok jaik tapa prein, hadei di tuk dom menuac njom bahrau di ban Sydney gam gam tagok biak rilo. Gam haong nan, hu panuac ieu bhap bini nao klauk jru piah patrun patakik menuac tame sang iek ruak. Australia daok dang anak mbang jit ka 3 ngan saong dom bruk pacang veik hu peih tabiak ngak tal meteh taneh ia. Tal urak ini, taneh ia ini hu klauk 2 mbang ka jaik 31% dom menuac angaok 16 thun saong 54% rahra hu klauk takik di abih lac 1 mbang.

Dang anak biến thể Delta biak khang, dom menuac njom ruak di Indonesia tagok jang 2 mbang, 2 triệu tagok 4 triệu urang dalam 2 bilan tapa. Harei kabroi, Tổng thống Joko Widodo brei pacadu bruk “Patakik bruk ngak di bhap bini” di dom labik, hadei di tuk dom urang ruak Covid-19 trun 78% duk haong tabung glaong kreh bilan 7 meng blaoh. Indonesia daok tagok saong peih praong danak dak klauk vaccine Covid-19. Urak ini hu labaih 91 triệu mbang vaccine hu klauk, dalam nan hu jaik  33 triệu rahra hu klauk ginup 2 mbang.

Gah Taliban tabiak panuac lac meda brei adat dom gilang pariak di Afganistan hu ngak bruk veik meng harei ini (25/8) ngan saong dom sarak yau klak, oh hu hagait salih karei. Labaih 1 adit hadei di tuk Taliban tagok pan quyền pasang iek, sang bac, sang iek ruak haong gilang pariak di Afganistan jeng daok ngak bruk yau kung. Lambaok gah Taliban jeng hu rilo mbang ndom lac brei pandar sarak siam lagaih jang, abih di nyu lac ngan saong anek naih haong urang kumei./.

                               Urang lang: M. Phuong – 25/08 15:53:38