Harei pataom Dam dara mbang akok meti hu peih ngak pachreih hu labaih 200 urang đoàn, dam dara di Ban raya HCM

Mesup 26/3, Mban tacei jalan pacang caga Covid-19 pakat negar hu ngak bruk song gah y tế TPHCM ka bruk pacang caga khik ramik urang tame VN suan hukum song bruk klauk vắc xin di dom labik y tế. Pagam tal urang ruak bahrau hu brei thau di ban raya, Thứ trưởng Đỗ Xuân Tuyên khan lac urang ni tame VN suan hukum. Pasak pasang iek ruak kik TPHCM brei thau tui bruk batabiak, ban raya hu brei 8.000 mbang vắc xin pacang Covid-19. Urak ni hu 8 sang iek ruak dok peih bruk klauk jru. Tui kuhria hu dui atah tal bilan 4-2021. Ban raya hu panuac cong hu parabha meng 7.000-8.000 mbang vắc xin piah klauk ka dom urang ngak bruk dalam mblang kapan haoh, hải quan song dom labik brei dok karei hu mek jien di khách sạn.

Harei pataom Dam dara mbang akok meti hu peih ngak pachreih hu labaih 200 urang đoàn, dam dara di Ban raya HCM. Rah tabiak dalam 3 harei meng harei 26 tal harei 28/3 di Sang ilamu Dam dara Ban raya, harei pataom peih ngak rilo bruk yau: parang iek 90 thun Harei padang kapul dam dara; parang iek thực tế ảo ka Ban Thủ Đức; không gian tương tac ilamu “Radaih dam dara”; saong rilo mbang ginum biai ngan saong dom kadha “Rahra ranaih umo saong đô thị thông minh” “ Dam dara padang mbvang ngui”…

Mintri Thông tin Truyền thông brei thau Việt Nam hu ngak iek 5G di rilo labik dalam thun 2021. Ni lac sa dalam dom jalan nao akaok meti piah mek hu tanut ba negar drei jeng sa dalam dom negar ngak iek jak jeng công nghệ 5G di dunya, jang yau khang hatai hu thiết bị 5G hu ngak dalam negar hu chất lượng siam song patakik jien. Dalam nan abih di nyu nan lac sangka tal pandar 5G dalam bruk jhul pakhang bruk ngak nong , ngak cong ilamu glong.

Harei 26/3, dalam tuk nao pasang iek labik taphia negar, biên phòng di Đồn Biên phòng pabah mbang negar Mỹ Quý Tây saong Công an xã Mỹ Quý Tây, huyện Đức Huệ, tỉnh Long An mboh 5 urang mai meng Campuchia tame negar suan hukum. Kapol urang jakar ngak harak biên bản ba 5 urang tame Đồn Biên phòng pabah mbang negar Mỹ Quý Tây ngak brei cambaic laic. Urak ini, Đồn Biên phòng pabah mbang negar Mỹ Quý Tây daok pambuak saong Công an huyện patui bruk pasang iek, ngak brei cambaic laih dom urang nan pambuak tal bruk urang ba manuac tabiak negar langiu suan hukum.

Công an TP HCM khởi tố, chap khik ong Đinh Viết Hưng, umo 46 thun piah pasang iek ka bruk ngak suan hukum iek ruak ngak tabiak jru, brei jru, pablei jru atau dịch vụ y tế karei. Ong Hưng lac bác sĩ blac draih ngak tasau prong ka tuai umo 33 thun di sang iek ruak thẩm mỹ Emcas, quận 10. Dalam tuk ngak, ekip nan ngak suan ba tal urang metai. Makna camereip lac kayua dom bác sĩ oh duah thau cambaih abih dom ruak dahlau daih di urang nan, ka oh tong yaom abih bruk mbuan si rah tabiak tuk caik kadung tame tasau. Dahlau di nan, sa bilan ong Hưng lac menuac hút lamek di tain ka urang dok metain.

Jabat báo chí di Mentri Pato megru saong Ilamu Nga brei thau, vắc-xin CoviVac kayua Pasak Chumakov patagok, hu brei ngak tabiak. Tui bruk ngak iek, prein pacang caga ruak di dom urang halan hatian hu taong yaom mboh siam. Ini lac vắc-xin ka 3 di Nga hu brei pandar. Dahlau di nan, Nga hu dua janih vaccine hu ba tame pandar lac vaccine Sputnik-V saong vắc-xin "EpiVacCorona". Vắc-xin Cô-vi-vắc tui kuhria meda brei ngak tabiak takik abih di nyu 10 triệu jru di puac thun ini.

Tập đoàn đa công nghệ Google brei thau ngak salah bruk mbaoh tangin tame harak thỏa thuận bayar jien khaw tin song dom hãng truyền thông di Italia. Ni lac bruk ngak bahrau di abih piah patrun bruk pandik hatai di truyền thông ka bruk meriak gauk oh samu gauk di dom gah công nghệ song jabat harak mbao pabak khaw tin. Thỏa thuận tacei lac, bruk mbaoh tangin tui bruk sanya gauk di dom hãng tin song ni jeng lac jalan nao prong dalam bruk pakhang talei pambuak bruk di Google song gah truyền thông Italia.

Dom bingu anh đào di Nhật Bản daok chroh narang avar jaik dua adit dut saong bhian thun. Min, kayua jit Covid-19 nan ye dom labik rivang ma-in danei angan brei takik tuai, dom le hoi iek bingu klak padeih atau peih ngak sit veik piah pacang caga jit ruak. Piah pacang caga hu siam jit ruak, dom urang ngak praong di Nhật Bản iew abih bhap bini saong tuai damuai taduan raok le hoi bingu anh đào tapa online. Karja dom labik hu bingu anh đào chroh narang brei peih rayo papar binguk dalam dom bein bingu saong labik rivang main danei angan./.

Urang lang: Hani Pha – Ái Nghiêm – 27/03 14:28:50