Urang hu dut iek pak di labik dok 

Thủ tướng Phạm Minh Chính hu mbaoh tangin tame Sarak 68 ngan saong 12 kadha daong urang ngak, urang gaok kan kandah kayua jit Covid-19. Paok jien doang mbang ini kuhria abih tih labaih 26.000 tỷ đồng, parabha ka rilo nyaom urang karei di gauk. Mentri LĐTB saong XH brei thau, Rajaei ba tabiak 12 nyaom sarak, dalam nan hu bruk brei saoh atau trun jien blei BH bala ka urang ngak, ngan saong labaih 11 trieu urang hu mbang tui, kuhria mboh labaih 3 ribau 800 tỷ đồng. Taong abih jien di dom đơn vị pah urang ngak hu trun jien blei, meda pandar piahi daong tapak ka urang ngak.

Mesup 2/7, di jabat UBND TPHCM rah tabiak bruk taduan pandap y tế dong pacang caga jit Covid-19. Akaok  UBND TPHCM Nguyễn Thành Phong brei thau, thun 2021 lac thun kan kandah abih di ban raya, kayua njauk trak damak di jit ruak. Mbang camereip di ban raya paatah di gauk labaih sa bilan song mbang camereip hu labaih  12.000 doanh nghiệp luai ngak, padeih ngak dalam  6 bilan akaok thun 2021. Dalam tuk bak kan kandah, TPHCM biak buai sambai tuk taduan hu rilo hatai anit ranam song bruk sangka meng pakat negar tal dom tỉnh ban. Abih di nyu nan lac bruk ba tangin tame daong yaok ratuh ribau  doanh nghiệp.

Sở Y tế Bình Thuận brei thau, kuhria tal page harei 2/7, tỉnh ini hu tapa kalau harei oh hu urang njom Covid-19 dalam bhap bini. Gah Y tế daok samar duah dom urang hu taom gaok urang njom Covid-19. Mbiah tal ini dalam tỉnh Bình Thuận hu 14 urang njom Covid-19; hu  1.327 urang F1, tapa dut iek ruak mboh 10 mẫu dương tính saong SARS-CoV-2, daok veik am tinh abih. Dalam 3.282 urang F2, tapa duk iek ruak mboh 3 mẫu dương tính.

Harei ni (2/7), UBND tỉnh Bình Dương brei thau hu batabiak bruk mek mẫu dut iek dalam bhap bini  song dut iek Covid-19 ka  1 triệu rahra. Bruk mek mẫu dut iek Covid-19 hu peih ngak tal harei 15/7, di tong abih labik dalam ban Dĩ An, song dom phường di ban Thủ Dầu Một, Thuận An; dom ban sit: Tân Uyên song Bến Cát. Tỉnh Bình Dương jeng daok kuhria klauk 1 triệu mbang vaccine ka urang ngak dalam dom labik ngak cong  

Harei 2/7, Công an ban sit Phú Mỹ, tỉnh Bà Rịa – Vũng Tàu brei thau, hu payua hồ sơ vụ án ka Viện kiểm sát bhap bini ban sit, ieu truy tố Lê Thái Thiện, umo 56 thun saong anek likei Lê Thái Phong, umo 29 thun ka duis “ Brei mesre laba trak dalam” saong “ Rao jien”. Jabat pasang iek hu mboh, Thiện saong anek likei brei mesre yaok rituh tỉ đồng haong yaom laba meng 109% sa thun tal 146% sa thun, glaong jang 5 mbang dut saong adat hukum ba tabiak, duah laba suan hukum labaih 98 tỉ đồng. Langiu di nan, dua anek ame nyu brei rao jien 59 tỉ đồng.

Liên minh Châu Âu khan lac, urang oh hu bruk ngak di 19 negar di bhum pandar jien  euro hu trun 7,9% dalam bilan 5, meng tanut  8,1% dalam bilan 4. Urang oh hu bruk ngak dalam  EU tagok  khang meng  quý 2 thun  2020, kayua dom negar brei kreih pabah mbang piah pacang cakak bruk njom mbak di jit prong  Covid-19. Tal bilan 5 thun ni, bruk ni daok trun, tuk bruk klauk jru hu peih ngak di grauk  châu Âu song dom taneh ia hu peih pabah mbang veik.

Malaysia brei thau dom jalan ngak catang jang ka bruk nao mai saong pablei salih di ban ine Ku-a-la Lăm-pơ saong bang Sê-lan-go (Selangor) jaik nan, tuk dom urang njom Covid-19 oh mboh trun. Meng harei 3/7, tok hu dom D.N pablei salih pandap pandar yaok harei meng brei peih pabah mbang. Adit dahlau, Malaysia brei dui atah tukvak pacang caga dalam negar piah pacang bruk njom mbak jit Covid-19. Harei 1/7, taneh ia ini hu jaik 7 ribau urang njom bahrau, tui nan, abih tih urang ruak tagok tal jaik 759.000 saong hu 5.254 urang metai.

Công ty Johnson&Johnson di  Mỹ daok kuhria roh duah vaccine Covid-19 ka uranaih meng 12 tal 17 thun meng bilan thu thun ni.Tui kuhria brei hu  4.500 urang halan hatain  ka dom roh duah ni. Dahlau di nan, jabat khik ramik pandap mbang song jru tavao Mỹ brei adat pandar chip ka vaccine di Pfizer ngan song uranaih meng 12 thun tagok. Moderna bilan dahlau jeng hu panuac ieu brei adat  pandar vaccine di drei ka uranaih meng 12 tal 17 thun, hadei di tuk khan lac  vaccine Moderna hu siam mekre taong abih. Urak ni, 63,6% uranaih meng  12 thun tagok  di Mỹ hu klauk takik di abih 1 mbang  vaccine Covid-19./.

Urang lang: Ái Nghiêm- Hanipha- 2/7