Ruak katal klik tagok boh daok mbuan si tamuh tabiak song pambak praong kayua langik oh siam

Kuhria meng mon 6 biar harei sup 27/5 tal mon 6 mesup harei 28/5, Việt Nam hu 40 urang njom bahrau COVID-19, jeng lac urang dalam negar, taeng di Bắc Giang hu 30 urang. Urang njom bahrau kuhria meng harei 27/4 tal urak ni lac 3.294 urang. Melam 27/5, ban raya .HCM hu pacang caga di rilo labik kayua gam tal dom urang njom COVID-19. Tal urak ni hu 36 urang njom COVID-19, jeng gam tal 'hội thánh truyền giáo Phục hưng'.

Mesup 27/5, di tuk peih mbang tabung glaong rik pataom jien daong pacang caga jit Covid-19 tui jalan online dalam negar di UBTWMT negar Việt Nam, hadei di panuac ieu di UV mintri Chính trị, akaok negar Nguyễn Xuân Phúc, Tong Yam ndok BHXH Việt Nam Nguyễn Thế Mạnh lambaok ka taong abih urang jalar, urang ngak dalam gah BHXH Việt Nam jao 2 tỷ đồng daong pacang caga jit Covid-19. Ini lac pok jien halan hatian rik tame di taong abih urang jakar, urang ngak gah BHXH Việt Nam, brei mboh bruk jum pataom, caong hu rik daong prein yava, ba tangin tame haong Đảng, Karja khang hatai jhul kadun likuk jit ruak Covid-19, khik siam mekre salamat raidiuk saong prein yava di bhap bini.

Thứ trưởng mintri ngak nong song patagok plei pala Phùng Đức Tiến brei thau, ruak katal klik tagok boh daok mbuan si tamuh tabiak song pambak praong kayua langik oh siam, lagaih ka dom janih ba ruak caih mebaoh rilo yau ye: roi, jamaok, ve, mòng…piah khik caga siam gam pacang caga jit Covid 19 gam patagok bruk rong glang, dom tỉnh ban samar padang jalan klauk jru pacang caga piah khik kajap bruk patagok di gah rong glang song pambak tame siam bruk pablei tabiak negar langui dom pandap rong glang dalam tuk vak urak ni.

Tỉnh Bắc Giang peih bruk ba jaik 20 tấn baoh vải thiều Tân Yên nao darak pasar negar Japon meng jalan kapal haoh. Ông Phan Thế Tuấn, Phaok akaok UBND tỉnh Bắc Giang brei thau, anak bruk jit jit COVID-19 rah tabiak srau kadau, tỉnh hu padang dom jalan ngak ka bilan vải thiều thun 2021 saong padang dom bhum pala vải thiều siam mekre anak jit ruak COVID-19, abih di nyu lac bhum pala vải di huyện Tân Yên saong huyện Lục Ngạn, piah khik ka baoh vải thiều hu siam, bingi, pablei ka darak pasar dalam saong langiu taneh ia.

Ninh Thuận urak ni dok 9.606 boh sang kathaot (meblah labaih 5,33% boh sang dalam tỉnh), song 13.308 sang jiak kathaot. Piah patrun kathaot samar song kajap, tỉnh Ninh Thuận urak ni dok pataom tame pachreih ba dom pren khang piah buh jien tabiak ngak mbang, patagok jalan mbak nao mai di dom buhm kan kandah, dom xã hu boh sang kathaot biak glong, xã hu rilo mik va bangsa takik. Dalam nan, dong dahlau ka sang kan kathaot hu mbang tui dom bruk an sinh xã hội tui bruk patrun kathaot rilo gah yau: Y tế, pato pakai , sang dok, ia hacih, alam môi trường, pato bruk ngak, brei mesraiy phun jien piah salih janih phun pala, anek athur rong lagaih song biến đổi khí hậu. Ninh Thuận kham merat dalam tuk vak 2021 – 2025, patrun sang kan kathaot meng 1,5 – 2%/thun, dalam nan patrun boh sang kan di bhum bangsa takik song bhum ceik tui kuhria labaih 3%/thun tui tanut kathaot rilo gah tuk vak 2021 - 2025.

Meng kham merat pasiam veik gah du lịch dalam tuk jit ruak daok pasang iek hu, meng harei 28/5, Akaok Mintri Quản trị Kỹ thuật Số Hy Lạp meda yaih khan Passport vắc xin Covid-19 atau daok ieu lac Chứng chỉ Covid kỹ thuật số tal taong abih rahra taneh ia ini. Ini lac harak chứng nhận công dân atau tuai du lịch hu brei thau lac oh njaom Covid-19, dut iek mboh âm tính haong virus SARS-CoV-2 atau abih ruak hadei di tuk njaom Covid-19. Yau nan, Hy Lạp lac taneh ia dalam EU camereip abih ba tabiak Passport vắc xin Covid-19. Urak ini, Hy Lạp hu klauk vaccin brei ka labaih 5,2 triệu menuac, dalam nan hu jaik 1,9 triệu urang hu klauk 2 mbang.

Harei ni, Gah Y tế dunya (WHO) brei thau châu Phi brei hu takik di abih 20 triệu mbang vắc xin AstraZeneca dalam 6 adit tal, piah klauk ginup mbang ka 2 ka tong abih dom urang hu klauk mbang ka sa. WHO brei thau lac, urak ni bahrau hu labaih 28 triệu mbang vắc-xin pacang caga Covid-19 hu klauk di châu Phi, samu ka oh tal 2% menuac sia dalam taneh negar. Ni lac tanut bier meyah dut song 1tỷ meteh mbang vắc-xin hu klauk di dunya.

Melam blaoh 1 sruh kapal pajeng pandap di Japon paoh gauk haong kapal negar lingiu di langiu tasik labik tỉnh Ehime blaoh tabaleik hadei di nan. 9/12 urang angaok kapal hu sraong tagok, 3 urang daok lahik. Dalam tuk taong abih 13 urang angaok kapal hóa chất taneh ia langiu oh thei njauk hagait. Urak ini gah chức năng Japon daok kham merat duah 3 urang lahik./.

Urang lang: Hani Pha – M. Phương – 28/05 10:26:33