Bruk brei urang klauk jru mbang ka 2 hu jiak ginup abih

Mesup 28/9, Thủ tướng Phạm Minh Chính pan akaok nyaom biai online pakat negar haong dom mintri, dom gah, dom jabat di Trung ương haong dom tỉnh, ban ka jhul patagok bruk peih jien buh tame ngak dom bruk di karja. Thun 2021, bruk kuhria buh jien tame ngak dom bruk di karja lac 500 rabau tỷ đồng, min tal urak ini dalam taneh ia bahrau peih jien brei hu labaih 47%. Tui Mintri Kế hoạch Đầu tư, bruk suai peih jien buh tame ngak dom bruk di karja mai meng rilo makna, dalam nan hu bruk peih taneh, đấu thầu, salih sarak, prein di po đầu tư… Ta-eng thun 2021, taneh ia drei pataom prein yava, jien padai tame ka bruk pacang caga jit praong, rilo tỉnh, thành njauk peih bruk pa-atah di gauk, takik taom gaok gauk.

Harei ini, HĐ bhap bini tỉnh Bình Thuận (mbang XI), vaktu 2021-2026 peih mbang nyaom ka 3, tabiak dom bruk praong di tỉnh, dalam nan hu Danak dak mblang kapal haok Phan Thiết. Meng phun jien labaih 3.800 tỷ đồng, hu ngak tui jalan BOT, ini lac danak dak praong ka bruk cakrok patagok khang kajap di tỉnh Bình Thuận. Mbang nyaom jeng brei tapa sarak brei ngak danak "Daong buh jien tame ngak dom hạ tầng bhum urang bangsa takik dalam tỉnh Bình Thuận vaktu 2021-2025” haong yaom jien buh tame ngak lac 38 tỷ 300 triệu đồng.

UBND tỉnh Bình Phước bahrau tabiak sarak peih bruk daong sinh viên urang bangsa takik dalam tỉnh. Sarak ini hu pandar ka sinh viên sang kathaot, jaik kathaot, hu hộ khẩu daok meng 3 thun tagok di dom xã biên giới, bhum kan kandah. Dom adei hu daong jien cai pandar yaok bilan, ngak luận văn, pathau khan bac tamat (samu 0,4 mbang jien bilan cơ sở), jien radaih nao mai (4 mbang sa thun); sinh viên bac da-a naih, joi hu pok meyaom samu 0,2 - 0,3 mbang  jien bilan cơ sở.

Mesup ini, Viện Roh duah patagok Xã hội haong Kapul Plan International tabiak mbaok online kadha “Adei bui sambai”, dalam danak dak “Patagok hatai sahneng di dam dara bangsa takik ka bruk pablei salih menuac haong bruk lakhah caga tuk oh ka tal umo thun tapa công nghệ số”. Tapa nan daong ka uraniah, dam dara urang bangsa takik umo meng 10 tal 24 thun hu thau ka bruk tok diuk tok pasang tuk oh ka tal umo thun, bruk pablei salih menuac, hu thau dom bruk daong. Ini jeng lac labik ndom biai nao mai di dam dara bangsa takik haong dom urang padang ngak sarak di dom jabat Rajaei.

UBND tỉnh Đồng Nai bahrau hu panuac ieu dom jabat karja patagok dom jalan ieu urang dut iek COVID-19 samar drah, mek hu 100% dalam bhap bini. Tui nan, UB bhap bini dom huyện, ban patagok bruk pasang iek, peih ngak dom jalan ieu rahra dut iek COVID-19, pasang iek taong phạt jien  pambuak tal bruk ini, meyah oh dut iek caik ka jit njaom mbak njauk ba tabiak kaoh tui hukum hình sư.

Meng harei 1/10, Gah khik ramik pandap panda taong ruak Australia meda taduan harak đơn likau adat brei pandar dom bộ dut iek COVID-19 di sang. Tui kuhria tal harei 1/11, dom bộ dut iek camereip hu pablei njauk adat di darak pasar Australia. Bruk klauk vaccine glaong ngan haong 76% rahra hu klauk 1 mbang saong jaik 52% rahra klauk ginup 2 mbang daok ba mbuan lagaih ka bruk pasang iek jit COVID-19 di Australia. Taneh ia ini daok kuhria yam tame “siam mekre bahrau” meng bilan 12/2021.

Meng siam lagaih dalam pacang caga di vaccine saong meda hu jru menyum taong ruak, rilo taneh ia daok ba tabiak dom jalan ngak bahrau piah diukrai siam mekre salamat haong jit ruak tuk bruk klauk vaccine hu tal  takik di abih lac 70%. Klaak bruk “zero covid”, New Zealand ngak iek bruk eng drei daok karei 14 harei ngan saong dom urang tabiak nergar lingiu takik harei mai veik. Taneh ia pulao Fiji daok kuhria lac, tuk hu 80% bhap bini hu klauk vaccine, meda brei du lịch oh brei daok karei dom tuai mai meng bhum takik hu jit ruak. Meng harei 1/10, Thái Lan brei peih veik pabah mbang du lịch.. Indonesia jeng daok pasang iek bruk peih veik pabah mbang negar tuk hu takik di abih 70% rahra hu klauk vaccine mbang klauk camereip.

Thủ tướng Trung Quốc Lý Khắc Cường hu maoh tangin tame sarak ka bruk brei klaak 3 pok quy định hành chính pambuak tal bruk ndih tapui anek. Tui nan, kayua taneh ia ini brei klaak bruk taong phạt dom diuk pasang ngak suan bruk ndih tapui anek tui sarak karja, brei adat ndih tapui anek rilo jang, nan ye dom bruk taong phạt oh daok pandar. Dom bruk ka ndih tui tui sarak karja pambuak tal menuac meng negar langiu tame daok jeng hu klaak. Di bilan 8, Trung Quốc brei tapa adat brei ka dom diuk pasang ndih tapui anek ka 3, dalam tuk taneh ia ini daok dang anak bruk menuac sia daok taha samar saong dom menuac ngak dak harei dak takik./.

Urang lang: Mousaphương -28/9