Meng di akaok jit ruak mbiah tal ni Việt Nam hu 900.585 urang njom COVID-19, dang ka 40 dalam 223 taneh ia song bhum taneh

Mentri Nội vụ birau eiw dom Mentri, dom gah samar tacei pato brei klak bruk brei hu chứng chỉ sap negar langiu, tin học, ngak salah dahlau harei 31/12 anak tal piah pataom iek, pathau khan Thủ tướng Rajaei. Gah langiu QH, dom urang QH mboh lac piah ngak brei sumu gauk dalam bruk cakak trun chứng chỉ pabak ilamu oh lagaih ngan saong cong chức, viên chức, bruk samar klak chứng chỉ tin học, sap negar langiu lac bruk njauk ngak.

Mesup harei 28/10, dalam negar hu labaih 812.300 urang ruak COVID-19 abih ruak dalam abih tih 900.585 urang njom ruak COVID-19 dalam taneh ia. Meng di akaok jit ruak mbiah tal ni Việt Nam hu 900.585 urang njom COVID-19, dang ka 40 dalam 223 taneh ia song bhum taneh. Hu 13 tỉnh, ban oh hu urang njom pak di labik dalam 14 harei tapa, yau: Ninh Bình, Lạng Sơn, Sơn La, Yên Bái, Lai Châu, Hải Phòng, Tuyên Quang, Thái Bình, Hưng Yên, Điện Biên, Thái Nguyên, Hòa Bình, Bắc Kạn.

Urang njom Covid-19 birau di Ban raya HCM dom harei jiak ini mboh tagok hasit min trun biak ralo dut saong tukvak tabung jit lac 8.510 urang di harei 3/8. Ban raya daok ngak tui jalan duah saong langyah F0 dalam bhap bini di tukvak siam mekre birau. Tuk hu urang dương tính, karja labik nan brei taong yaom chip bruk ruak piah pacang, gam dut iek ruak samar piah taong yaom tanut ruak, meng nan ba tabiak labik meda pacang takik abih. Ban raya HCM urak ini daok di pakat 2 di jit ruak, lac jit ruak di tanut mbiah. Meng harei ini 28/10, dom labik pablei quan mbang huak hu pablei pak di labik saong brei ngak ginup dom bruk pacang caga jit ruak.

Harei 28/10, Sở pato megru tỉnh Bình Dương brei thau, jabat dok pambuak bruk piah peih bruk klauk vaccine pacang COVID-19 ka anek saih meng harei 31/10 anak tal. Dalam tỉnh Bình Dương hu labaih 500.000 anek saih , urak ni tỉnh dok peih bruk pato bac online. Tui kuhria anek saih THPT di Bình Dương hu nao bac meng di bilan 11/2021. Anek saih THCS hu bac meng harei 3/1/2022. Taeng pakat tiểu học hu bac online song tapa rayo papar binguk .Pakat mầm non sang bac pambuak bruk song amaik ame iek glang uranaih di sang.

UB bhap bini tỉnh Ninh Thuận birau hu harak iew dom sở, mban, ngành saong dom bhum palei pakhang bruk tui iek, pacang jit Covid-19 dalam tukvak birau ka lagaih, khan brei Mban tacei pato jalan pacang caga jit Covid-19 tỉnh thau dahlau harei 30/10. Tui nan, dom bhum palei brei pasang iek, dut iek PCR ka taong abih urang mai meng dom labik jit ruak pakat 3, 4 saong dom tỉnh, ban hu urang njom ruak rilo yau: TP.HCM, Đồng Nai, Long An, Bình Dương…Kuhria tal harei 27/10, Ninh Thuận klauk vaccine pacang Covid-19 hu 93% mbang 1 ka urang umo 18 thun tagok. Yau nan min, urang umo labaih 65 thun hu klauk mbang sa bahrau hu labaih 63%.

Dalam kham merat pambuak talei rohim hadei di bruk khủng hoảng “kapan njuk ia”, Tổng thống Prang Emmanuel Macron song Tổng thống Mỹ Hoe Biden hu taom gaok gauk anak mbang nyaom pakat glong G20 rah tabiak dalam dom harei 30 song 31/10 di Italia. Ni jeng lac mbang camereip 2 urang pal akaok di Prang song Mỹ taom gaok tapak hadei di tuk Mỹ khan lac padang liên minh Aukus haong Anh song Australia, ba tal bruk Australia eng drei klaak harak pambuak bruk blei kapan njuk ia hu yaom 56 tỷ euro song Prang di kreik bilan 9/2021.

Nyaom biai pakat glong abih kapul dom taneh ia kinh te patagok saong birau tagaok dang akaok di dunya ( G20) – lac labik pataom dom taneh ia kinh te praong angaok dunya, mabng akok meti hu peih tabiak di Italia dalam dom harei 30-31/10. An ninh hu khik biak catang jaik tuk peih nyaom biai ngan saong rilo caong khin hu ba tabiak di nyaom biai mbang ini, abih di nyu lac bruk ngak di G20 ka dom jalan pacang caga dom bruk kan thau rah tabiak di jit ruak Covid-19. Italia taduan ngak akaok nyaom biai G20 meng bilan 12/2020. Min, kayua jit ruak Covid-19, ini lac mbang akok meti Italia meng peih nyaom biai pakat glong G20 hu taom gaok tapak.

Hàn Quốc brei thau meng bilan 11 anak tal, dom mblang kapan haoh dalam negar hu peih veik dom mbang par dunya dalam tuk bruk klauk jru patagok glong. Urang negar langiu song urang Hàn Quốc di negar langiu hu nao mai dom mbang par dunya meyah hu klauk ginup dom janih c vaccine di dom hãng Pfizer, Moderna, AstraZeneca, Johnson&Johnson 2 adit dahlau di tuk vak par./.

Urang lang: Ai Nghiem – Hani Pha – 28/10