Darak pasar pablei hadang tabiak negar langiu di Việt Nam daok biak siam lagaih

Mesup ini (10/12) di Hà Nội, Mintri ngak nong saong patagok palei pala peih nyaom biai online ginum biai jalan cakrok gah hadang bilan puac thun 2021 saong thun 2022. Yaom lac bruk ngak hadang dalam taneh ia gaok kan kandah kayua langik tasik oh lagaih, klaih klaoh bruk pabak kayua jit Covid-19, min maong rah tapa, darak pasar pablei hadang tabiak negar langiu di Việt Nam daok biak siam lagaih. Dalam tuk jit ruak daok srau kadau, caik ka dom doanh nghiệp kaya ikan jeng yau doanh nghiệp ngak hadang brei sangka bruk khik kajap salamat ka bruk ngak, pambak tame siam di darak pasar dalam taneh ia saong langiu negar, abih di nyu lac tuk puac thun saong Tết nguyên đán. Dom tỉnh, ban brei patagok bruk pambuak gauk ka nyu samu dom jalan cakrok ngak pandap piah gam patagok bruk raong hadang, gam pacang caga hu siam jit Covid-19.

Jit Covid-19 dok rah tabiak srau kadau ba tal biak rilo kan kandah ka gah ikan pra di dom tỉnh bhum taneran krong Cửu Long, labik hu tal 8 labik pablei tabiak negar langiu pandap ikan ni. Taphia di nan, tavak tavaiy meng paga pacang kỹ thuật di dom drak pasa pablei tabiak negar langiu prong caik ka gah ikan pra brei hu dom jalan ngak dalam tuk “siam mekre bahrau”. Piah khik hu salamat dalam bruk pacang caga jit gam khik siam mekre dalam bruk patagok kinh tế, dom urang ilamu gah ngak nong ndom lac njauk patagok talei pambuak gauk, samar langyah talaik dom kan kandah ka urang rong ikan pra, doanh nghiệp ngak pandap meng ikan pra piah khik ginup pandap piah ngak, pambak tame siam bruk drak pasa pablei tabiak negar langiu mboh lac daok siam veik.

Sở Ytế TPHCM ndom lac, bruk pablei salih jru taong ruak COVID-19 urak ini, lac suan hukum, dom bruk ngak suan meda njauk langyah catang. Amuk Nguyễn Thị Huỳnh Mai, Chánh văn phòng Sở Y tế TP brei thau :TP.HCM hu Mintri Y tế brei labaih 25.000 mbang jru Molnupiravir (pok jru C) saong yaok rabau mbang Faipiravir, dom janih jru đông y, labaih 30.000 mbang thực phẩm chức năng piah daong urang njauk ruak COVID-19. Dom jru ini hu ban raya pasang iek catang saong hu ba brei njauk menuac, njauk urang, kayua bruk pandar jru oh njauk meda ba tal kanjah jhak ka bhap bini. Jru Molnupiravir urak ini oh ka hu adat brei pablei salih, nan ye bruk pablei salih jru ini angaok mạng atau angaok darak pasar jru tavao jeng lac suan adat hukum.

Anak bruk jit ruak COVID-19 dok srau kadau, bruk tamuh tabiak rilo dom urang F0 dalam tuk vak jiak di ni ngak tapa prein dom labik iek ruak ka urang ruak Covid-19, Mintri Quốc phòng song mintri Y tế bhian dong biak rilo pandap panda jang yau pren ngak ka dom tỉnh dalam bhum taneran krong CL. Sở y tế ban Cần Thơ bahrau taduan kapul bác sĩ sang iek ruak Chợ Rẫy (TP.HCM) mai daong pacang caga jit di pak ni. Tỉnh Sóc Trăng jeng taduan kapul urang jakar, y, bác sĩ di sang iek ruak Nội tiết Trung ương. Dahlau di nan, harei 4/12, Sóc Trăng taduan kapul hu 39 urang jakar y, bác sĩ Học viện Quân y mai dong ka tỉnh pacang caga Covid-19. Bruk tamuh khang dom urang F0 dalam tuk vak jiak di ni ngak brei tapa prein dom labik iek ruak ka urang ruak Covid-19 di Sóc Trăng. 

Gah pacang pablei salih pandap pakauk tỉnh An Giang bahrau cap mek sa sruh radaih pajeng pandap, daok pajeng rilo janih pandap oh thau asal di nyu. Dahlau di nan, mesup 8/12, gah chức năng tuk daok khik iek di palei Trung Bắc Hưng, xã Nhơn Hưng, mboh sa sruh radaih ô tô tải kayua Trần Trung Dũng peih, sang daok di tỉnh Bình Phước, mboh medil nan ye ieu padeih nduac piah pasang iek. Tapa nan, kapul ngak bruk mboh angaok radaih hu: 2.800 lít cồn tinh luyện, võng dù, baoh kayau thu, yaom abih tih labaih 300 triệu đồng. Urang peih radaih oh hu harak gar hagait brei thau pandap nan mai meng halei.

Bruk peih mbaok padang ngak đài Hữu nghị Việt Nam – Campuchia bahrau rah tabiak harei kabroi di ban Svay Rieng, tỉnh Svay Rieng, Campuchia. Đài Hữu nghị lac bruk brei mboh ka talei jum pataom khang kajap di 2 bangsa Việt Nam song Campuchia, brei mboh dak rai ka bruk haok rilaow drah di rai nao dahlau piah mek hu sron mbon song haniem phol ka bhap bini Campuchia. Ong Nhem Valy, Phó Chủ tịch thường trực, gam lac Tổng Thư ký Hội đồng pakat negar Mặt Trận jum pataom patagok taneh ia Campuchia ndom lac: Kol drei padang Đài Hữu nghị ni, lac piah hadar darphol bol bala Việt Nam song gah Mặt trận dong taneh ia Campuchia var klaak rup drei piah peih paha ka bhap bini Campuchia tabiak truh bruk pametai menuac di kol Pol Pot.

Gah Y tế dunya (WHO) brei thau, biến thể Omicron meda ngak brei salih karei jalan nao di jit praong. Dalam tuk dom urang ilamu daok kham merat duah thau tanut njaom mbak saong bruk jhak di anek ruak bahrau, dom roh duah camereip dalam bilik ngak iek brei mboh, yaom lac takik siam lagaih jang, min vắc-xin jeng daok khik caga hu, plaih di ruak trak saong metai lahik kayua Omicron. Tui Tong Yam ndok WHO, urak ini biak kan piah thau cambaih bruk kanjah jhak di Omicron, min tapa pasang iek dom hagait hu di biến thể, dalam nan hu bruk njaom mbak di dunya saong rilo dom đột biến, meda mboh lac nyu meda ngak brei salih karei tal jalan nao di jit praong.

Kadung jien uranaih Liên hợp quốc (UNICEF) hu panuac ieu dom taneh ia Nam Á brei adat ka dom sang bac peih pabah mbang VEIK tong abih piah ka labaih 400 triệu uranaih oh klaik klaoh bruk bac daa. Tui pathau khan di UNICEF, dom sang bac di Bangladesh kreih pabah mbang jiak 18 bilan, dalam tuk dom sang bac karei di dom negar Nam Á kreih pabah mbang labaih 31 adit. Bruk padeih bac jeng ngak ka uranaih dang anak áp lực xã hội, pren yava glaow akaok trun song mbuan si njauk tong paoh. Uranaih kamei mbuan si tok pasang avar. Tui nan, harei hadei dom menuac ngak meda lac dom urang hu ilamu biar./.

Urang lang: Hani Pha – Bhumi – 10/12 10:30:00