Rilo bruk main sambai hu rah tabiak di bilan 9 ni 

Mesup ini (16/09), UBTVQH ginum biai danak dak Hukum khik kajap siam mekre, salamat jalan mbak nao mai. Sa dalam dom kadha daok hu rilo panuac karei di gauk lac: brei ka Mintri CA atau Mintri jalan mbak pajeng ba khik ramik bruk pato pakai, pasang iek brei harak adat peih radaih. Tui Mintri jalan mbak pajeng ba, bruk pato pakai, pasang iek brei harak adat peih radaih daok hu rilo tavak tavaiy, oh ka pabak hu bruk khik ramik. Bruk ba dom asal kadha meng Hukum nao mai angaok jalan mbak tapa Hukum khik kajap siam mekre salamat jalan mbak nao mai piah pasiam, paglaong bruk khik ramik di karja.

Harei ni (16/9), Mintri pato magru brei thau điểm pacacah tamat bac THPT mbang 2 thun 2020 di jaik 26 ribau anek saih pacacah di 11 labik. Dom Sở pato magru daok pasang iek brei panuac tamat bac THPT hadei tuk phúc khảo meng harei ni (16/9) tal 30/9. Meng harei 19/9, abih urang pacacah hu mbaok tame mbang pacacah tamat bac THPT mbang 1 saong mbang 2 thun 2020 meda salih  caong khin pilih ruah đại học, cao đẳng meng jalan online, atau meng harak tut angan pilih ruah. Tui kuhria bruk pilih ruah mbang 1 meda hu brei thau dahlau di maong 5 bier harei 5/10.

Mesup ini (16/9), TAND TPHCM peih mbang kaoh tui hukum camereip abih ngan saong ong Nguyễn Thành Tài, dahlau daih ngak phaok akaok UBND TP haong 4 urang karei kaduas “Ngak suan bruk khik ramik, pandar drap ar karja ngak brei khat lahik, palai pajoa” pambuak tal bruk jao labik "taneh ameh" labik ka 8 -12 Lê Duẩn (Quận 1). Tui kuhria mbang langyah rah tabiak tal abih harei 21/9. Tui cáo trạng, kayua hu hatai anit amuk Lê Thị Thanh Thúy (dahlau daih ngak Chủ tịch HĐQT Công ty Cổ phần đầu tư Lavenue), ong Nguyễn Thành Tài mbaoh tangin brei adat ka doanh nghiệp ini pandar taneh nan haong yaom biak lap lac 647 tỷ đồng, dalam tuk yaom biak di nyu tagok tal 2.574 tỷ đồng.

Sở Y tế Đồng Nai hu padang kapul duah thau makna ba tal metai di ranaih kumei umo sa thun hadei di tuk klauk jru vaccine viêm não Nhật Bản mbang 2 di bilai Y tế ban sit Hiệp Phước, huyện Nhơn Trạch. Hu thau, hadei di tuk tui iek prien yava 30 minit hadei di tuk klauk jru pacang caga, adei hu amaik mae ba nao payua tal labik khik iek ranaih. Min tuk gauk gar nao rok ye mboh adei jum juk, rak darah oh megei. Uranaih hu ba nao tal sang iek ruak piah taong ruak min oh tapa hu. Sở Y tế Đồng Nai hu brei padieh lô vaccine nan, brei pasang iek bruk klauk jru di dalam tỉnh, cang javap jaloi puac abih di jabat jakar.

Di tuk uan Sen Đôn Ta meng kan, urang pan akaok Tỉnh Ủy, HĐND, UBND, UBMT TQ  dom tỉnh dalam bhum ĐBSCL  hu padang dom kapul nao ravang saong alin hadiah pandap ka bhap bini, acar bnagsa Khmer. Di Trà Vinh, 26 pok pandap hu alin ka dom baha Khmer saong 203 sang sarak karja, urang jakar ngak praong di tỉnh padeih hưu bloh, abih tih yaom labaih 250 triệu đồng. Bhap bini Khmer Nam bộ hu jaik 1,3 triệu urang daok di dom tỉnh Trà Vinh, Sóc Trăng, An Giang, Kiên Giang. Yaok thun tuk hu rija roya meng kan di bhap bini, urang jakar jeng hu nao ravang saong alin hadiah pandap brei ka mBan khik ramik dom baha saong dom sang sarak karja lac urang bangsa. Thun ini, kayua jit ruak Covid-19 nan ye dom mbang pataom mbaok, harei pataom sap daoh ragu daoh bhap bini Khmer Nam bộ, pakacah limo Bảy Núi di An Giang oh hu peih tabiak, bruk ini hu bhap bini Khmer njauk hatai pachreih tui.

Gah pablei salih dunya (WTO) hu tabiak panuac lac bruk Mỹ taong je 200 tỷ đô la pandap panda Trung Quốc dalam thun 2018 ngak oh njauk haong adat pablei salih di dunya kayua tok pandar haong Trung Quốc saong glaong jang tanut bo Mỹ hu sanya. WTO brei thau lac bahrau pasang iek dom tanut taong je di Mỹ bo oh pasang iek tal dom jalan cagar veik di Trung Quốc kayua Washington oh hu harak yak bak. Gam tui di nan jeng pachrieh dua negar pambuak gauk paih langyah bruk mariek gauk dalam tuk daok tabung glaong di bruk pablei salih di dunya ka oh bhian hu. 

Thủ tướng Israel bahrau mbaoh tangin tame harak sanya sron mbon haong Ngoại trưởng Dom tiểu vương quốc A-rập thống nhất haong Bahrain di Nhà Trắng ala bruk hu mbaok tui iek di Tổng thống Donald Trump. Meng bruk dang tabiak langyah di Mỹ, Dom tiểu vương quốc A-rập thống nhất haong Bahrain lac taneh ia Arab ka 3 saong ka 4 pambuak veik talei rohim haong Israel kuhria meng di tuk taneh ia ini hu Ai Cập haong Gioóc-đa-ni công nhận thun 1979 saong 1994. Dalam tuk tranh cử, ong Trump hu sanya ba dom lin Mỹ mai veik taneh ia meng dom bruk mesruh gauk dui atah di taneh ia lingiu saong kham merat brei padeih abih bruk mesruh gauk 19 thun di Afghanistan lac kadha praong dalam panuac sanya ini.

Gah rivang main dunya brei thau dom tuai rivang main dunya trun 65% dalam 6 bilan akaok thun ni duk saong thun blaoh, khat lahik tagok tal 460 tỷ đô la saong njauk lahik meng 2 tal 4 thun piah mek hu veik bruk rivang main di thun 2019. Tổng thư ký gah rivang main dunya Du-ráp Pô-lô-li-cát-xvi-li (Zurab Pololikashvili) ndom lac dom bruk rivang main di dunya hu trách nhiệm saong salamat meda hu ngak di rilo labik di dunya, ieu rajaei dom negar pambuak haong dom gah tư nhân piah daong ngak pasiam viek dom bruk rivang main di dunya./.

Urang lang: Thu Thảo -Mousaphuong