Tổng Bí Thư Nguyễn Phú Trọng pal akaok nyaom biai 

Mesup ini 16/12/2021, di Hà Nội, Quân ủy Trung ương peih Nyaom biai mbang ka 3, vaktu 2020-2025 piah brei tapa pathau khan pataom iek veik bruk quân sự, quốc phòng thun 2021; ba tabiak jalan pan akaok peih ngak bruk quân sự, quốc phòng saong dak padang  Đảng bộ Quân đội thun 2022. Tổng Bí thư Nguyễn Phú Trọng, Bí thư Quân ủy Trung ương pan akaok nyaom biai.

Pasak kuhria mboh dahlau bruk langik tasik pakat negar brei thau lac, melam 17/12 ribuk Rai meda tame tasik biển Đông tui gah tây tây bắc lac 25 km/h. Ong Trần Quang Hoài, Phó mBan tacei jalan ka bruk pacang caga bala langik tasik brei thau, ini lac mbang ribuk khang saong biak kan kandah. Tui jalan ba tabiak, urang taong ikan meda tabiak tasik taong cap bilan ikan Bắc meng harei 19-21/12, dom tỉnh njauk caga dahlau bruk pasang iek, rami ramik jalan tabiak tasik piah khik salamat. Langiu di nan, ong Hoài ieu kakei dom tỉnh kham marat oh caik ka bhap bini daok viek lồng bè, chòi khik iek kaya ikan di tasik. Ngan haong labik panduan ba bhap bini nao daok di karei, brei ngak njauk tui bruk pacang caga jit Covid-19. 

Harei ini, kapul Doanh nhân ranaih Việt Nam pakat negar, Kapul Doanh nhân ranaih ban sit Cần Thơ pambuak bruk haong Thành Đoàn, Hội Liên hiệp Thanh niên Việt Nam ban sit Cần Thơ peih bruk ba brei ATM oxy saong daong ka ban sit Cần Thơ dom pandap y tế pacang caga, taong ruak COVID-19, hu: 500 bình oxy 8L; 150 đồng hồ duk iek, 5 mac ngak oxy; 200 pandap piah parabha nding suak yava chip. Jeng tapa nan, Cty cổ phần DHA haong Tập đoàn Trường Sinh hu alin hadiah ka ban sit Cần Thơ 1.500 bộ khan ao khik caga rup saong 600 pandap khik caga prein yava daong taong ruak COVID-19.

Pasak Y tế huyện Bù Đăng, tỉnh Bình Phước brei thau, urang ndih tapui angan Thị Xuân, lac F0 – hu manek salamat hadei di tuk dom y, bác sỹ blac raih mek anek dalam tain hu siam mekre di Pasak Y tế huyện di melam 15/12. Saai Thị Xuân (umo 20 tuổi), njauk dương tính haong virus SARS-COV-2 atah di ini 10 harei di sruh jit xã Thọ Sơn, dom bác sĩ Pasak y tế brei blac raih piah khik salamat ka amaik saong anek. Urak ini, prein yava di urang kumei ndih tapui ini hu siam mekre, tani tanat.

Mesup 16/12, Sở Jalan mbak Pajeng ba ban raya Hồ Chí Minh pambuak bruk haong Tập đoàn Trí Nam peih tabiak bruk brei pah radaih juak di dalam Quận 1. Tui Tập đoàn Trí Nam, 388 sruh dalam  500 sruh radaih juak hu blei meng negar langiu mai brei pah, daok veik hadom sruh lac piah caga. Radaih hu caik di 43 labik angaok takai jalan di dom jalan di Quận 1, daok jaik dom pataok, cang radaih buýt, mblang bein, labik ravang me-in... piah duh ka bhap bini nao mai dom canah jalan katut panak. Yaok labik hu meng 10 - 20 sruh radaih pataok jeng 2 talei. Menuac pandar tame ứng dụng Mobike angaok phone tangin blaoh tame duah labik hu radaih daok jaik, hadei di nan quét mã code peih so radaih; tut angan yaom pah tui tukvak pandar...

Dalam blah khau tin brei thau ka bruk langik tasik taneh ia di jalan pandiak harei ini, Jabat khik ramik Khí quyển, Địa vật lý saong Thiên văn Philippines brei thau pasak ribuk Odette – lac ribuk ka 15 di Philippines dalam thun 2021, daok atah ban Surigao – pasak tỉnh Surigao del Norte labaih 175 km. Jaik pasak ribuk, prein hangin khang di abih lac 185 km/h, hangin handaoh tagok tal 230 km sa maong. Jabat Khí tượng pak ini hu tabiak panuac kakei tal tanut bhong, lac tanut glaong di abih. Di dalam tỉnh SurigaoNorte. Hu labaih 17.000 baoh sang ngan haong abih tih labaih 51.000 urang hu ba nao tal labik salamat jang. Dalam tuk nan, jaik 30.000 urang jeng hu ba nao daok di labik karei di tỉnh Đông Samar saong jaik 2.000 sang nao daok di kaoh pulao Dinagat piah plaih “ribuk khang”.

Pasak pacang caga saong pasang iek jit ruak Mỹ (CDC) harei ini (16/12) ginum biai piah kuhri kuhria bruk lac njauk patakik pandar vắc-xin pacang Covid-19 di hãng jru Johnson & Johnson halei oh kayua dom bruk pambuak tal khal darah jeng daok hu rilo. Di mbang nyaom, Uỷ ban Tư vấn ka bruk klauk jru di CDC meda ba tabiak dom kadha bahrau brei mboh bruk khal darah di do menuac klauk vắc-xin Johnson & Johnson daok tagok di Mỹ kuhria meng bilan 4 meng blaoh. Tui yaok pataom hu jaik 9 urang metai kayua khal darah hadei di tuk pandar vắc-xin Johnson & Johnson di Mỹ.

Hadei di 2 adit brei padieh piah patui iek biến thể Omicrom, Australia daok brei peih pambang negar ka anek saih dunya saong dom urang ngak bruk hu ilamo glaong. Yaom lac suai jang dut saong dom taneh ia karei yau ye Mỹ, Anh saong Canada min bruk peih pambah mbang negar ka dom urang ni lac sa bruk biak siam ka kinh tế Australia./.

Urang lang: Thu Thảo -Mousaphuong- 16/12