Urang nao rivang main dalam tuk jit ruak covid 19 hu cakak trun

Mesup ini (17/9), Bộ Y tế brei thau lac oh hu urang dương tính nCoV, 14 harei oh mboh njom mbak dalam bhap bini. Abih tih dom urang njom jeng daok lac 1.063. Dom urang metai kayua Covid-19 tal urak ini lac 35,3 urang metai hadei di 3 tal 4 mbang dut iek mboh âm tính. Dalam dom urang daok taong ruak, hu 3 urang ruak biak trak, 1 urang mbuan metai. Mintri Y tế ieu dom gah patagok bruk pabak dom pandap dut iek, samar mboh ruak, saong padang jalan mek mẫu, dut iek piah mboh urang njom nCoV di dom pabah mbang negar, dom mblang kapal haoh lagaih haong bruk pacang caga jit dalam tukvak bahrau.

Tal urak ni, hu 60/63 tỉnh, ban hu urang ruak pandiak tabiak darak. Dom chuyên gia kuhria mboh lac jit meda daok tamuh tabiak khang dalam vaktu anak tal kayua langik hajan rilo. Tui Cục Y tế pacang caga – Mintri Y tế, dom urang njom ruak pandiak tabiak darak daok meng akaok thun tal urak ni di Việt Nam tagok tanut 65.000 urang. Bruk njauk caik hatai lac, hu 7 urang metai.

Urak ini Việt Nam jeng hu 198 urang dương tính haong bạch hầu, dalam nan hu 4 urang ruak mretai. 81% dom urang njom oh thau lac klauk blaoh atau oh ka klauk jru pacang caga. Dalam taneh ia hu rilo pandiak ka rauk bạch hầu, dalam nan njauk ndom tal di abih lac Tây Nguyên. Dom urang ruak bạch hầu di bhum ini tagok khang dalam bilan 7 , lac 104 urang. Urak ini 80 sruh jit di Tây Nguyên daok pasang iek hu. Min tui kuhria mboh di dom chuyên gia, tal puac bilan 9, akaok bilan 10, jit ruak meng meda pacang hu, kayua daok hu 8 sruh jit bahrau.

UBND Bà Rịa - Vũng Tàu brei thau, tỉnh meda tacei UBND huyện Côn Đảo duah dom labik tanek saoh, rami ramik bhap bini piah padang labik tái định cư 9A pasak huyện Côn Đảo. Daok labik ciek hu phun manjek meng langik tasik meda hu ngak manieng. dalam 16.500 m2 hu brei thau cambaih lac hu gilia, tỉnh meda likau panua langyah di Thủ tướng brei ngak di gah langiu, oh gaok hagait tal labik tái định cư 9A. Pasak huyện Côn Đảo praong labaih 26.300 m2, hu 102 lô taneh saong hạng mục phụ trợ. Taong abih yaom jien buh tame ngak jaik 35 tỷ đồng, tui kuhria ngak salah di thun 2021.

Sở GTVT TPHCM brei thau, harei 10/10, mblang radaih miền Đông bahrau di quận 9 hu peih pabah mbang hadei di rilo mbang kuhria peih min oh jeng. Tui nan, mbang 1 pataom tame panduan ba dom radaih pajeng tuai nao – mai meng dom tỉnh Quảng Trị tabiak dom tỉnh gah brak hu jalan nduac tapa jalan roya 1 meng mblang radaih miền Đông urak ini di quận Bình Thạnh tabiak Bến xe miền Đông bahrau. Dalam 3 bilan camereip kuhria meng di tuk panduan ba, radaih hu taduan saong plaik tuai di Bến xe miền Đông urak ini dahlau di mblang radaih bahrau ngak hu salah dom adat cambat tui hukum.

Đại hội đồng Liên hiệp quốc (LHQ) hu ginum biai tamat mbang 74 saong peih ginum biai mbang 75. Dalam labaih 7 bilan tapa, Đại hội đồng hu brei tapa labaih 70 sarak saong harak hu makna praong glaong, dalam nan hu sarak “bhian randap haong abih gah saong pabuak saong jit praong Covid-19” hu rilo negar sangka tal saong pachrieh tui. Dalam mbang nyaom biai, akaok Đại hội đồng LHQ mbang 74 Muhammad-Bande hu pok mbaik búa lac angan je di quyền lực ka urang ngak salih ong lac ong Volkan Bozkir, urang ngoại giao negar Thổ Nhĩ Kỳ.

Quốc hội Japon hu pok ong Yoshihide Suga, urang dang akaok bahrau di đảng Dân chủ Tự do (LDP) ngak Thủ tướng ka 99 di taneh ia ini. Thu tuong bahrau, ong Suga hu tabiak angan dom urang dalam rajaei bahrau, khik veik 8 urang dalam rajaei di Thu tuong dahlau daih lac Shinzo Abe, dalam nan hu Phó Thủ tướng, akaok mintri jien padai Taro Aso haong akaok mintri Ngoại giao Toshimitsu Motegi. Dalam dom urang dalam rajaei bahrau, hu ong Nobuo Kishi, adei likei di ong Shinzo Abe - Thủ tướng klak, hu pok ngak akaok mintri Quốc phòng.

Tui Reuters, Mỹ daok caga harak gar pablei 7 hệ thống vũ khí hu mana praong prang ka Đài Loan, Trung Quốc, hu gam mìn sát thương, tên lửa ba jalan saong ahaoh oh hu manuac peih hu ngak tabiak di dom kapul quốc phòng praong yau ye Lốc-khít Ma-tin (Lockheed Martin), Boeing saong General Atomics. Tui kuhria, panuac panuac pathau ka bruk ngak di harak gar pablei salih vũ khí ka Đài Loan meda hu brei thau dalam adit ni. Mintri Ngoại giao Trung Quốc hu rilo mbang ndem lac cagar viek bruk ngak di Mỹ pablei vũ khí ka Đài Loan, brei thau lac ni lac bruk ngak kan kandah trak tal chủ quyền saong kein laba an ninh di negar ni./.

Urang lang: Thu Thảo -Mousaphuong