Kapul urang ngak nong pakat negar taduan hu yaok triệu pok pandap, yaok rabau tấn kaya nong haong jien mbaok yaok pluh tỷ đồng di dom doanh nghiệp

Mesup ini (22/9) di Hà Nội, kapul urang ngak nong Việt Nam pakat negar ba tabiak danak dak “Triệu pok pandap, rabau tấn kaya nong anit ranam gam haong taneh ia yam tapa jit ruak Covid 19”. Pak di tuk peih tabiak, Kapul urang ngak nong pakat negar taduan hu yaok triệu pok pandap, yaok rabau tấn kaya nong haong jien mbaok yaok pluh tỷ đồng di dom doanh nghiệp, urang ngak pahla, urang ngak nong. Taong abih dom pandap nan hu pajeng tame dom tỉnh gah meraong, alin hadiah tal tangin bhap bini dom tỉnh, ban bhum pasak jit Covid 19.

Mesup ini 22-9, Jabat Tổng LĐLĐ Việt Nam brei thau,  Tổng LĐLĐ Việt Nam taduan tui panuac likau caik tabiak 200.000 pok pandap mbang huak piah daong chip mbang 2 ka dom đoàn viên công đoàn, urang ngak gaok kan kandah kayua jit praong Covid-19 di TPHCM. Tui nan, taduan tui panuac likau daong 200.000 pok pandap mbang huak, yaok pok yaom 200.000 đồng. Abih tih yaom jien daong lac 40 tỷ đồng. Jien nan hu kaoh tabiak meng jien công đoàn pataom piah di LĐLĐ TPHCM.

Đồng Nai bahrau ba tame ngak bruk Sang iek ruak dã chiến ka 11 hu papan ndih iek ruak rilo abih kuhria meng dahlau mai di dalam tỉnh, piah taduan raok, taong ruak ka urang ruak COVID-19. Sang iek ruak dã chiến ka 11 caik di palei 2, xã Xuân Hòa, huyện Xuân Lộc; hu ramik ngak meng trang trại di Cty Trách nhiệm hữu hạn Raong glang Hồng Gấm hu padang ngak blaoh min oh ka ba tame pandar. Sang iek ruak dã chiến ka 11 hu 3.000 papan ndih taong ruak.

Panuac meng sang iek ruak Trung ương Quân đội 108 brei thau, hadei di tuk taduan hu lệnh di urang pan akaok Mintri Quốc Phòng tuk mon 1 jala pandiak harei 21/9, labaih 200 urang jakar, bác sĩ, điều dưỡng di sang iek ruak samar pataom gauk, caga pandap panda khan ao piah tagok jalan daong ka gah meraong ralo darah meng hatai kham merat biak glaong. Mon 5 meteh harei nan, kapal haoh par tagok ba kapul nan tame daong ka bol bala saong bol bhap rahra gah meraong jhul kadun likuk jit praong COVID-19.

Tui yaok pataom meng harei 29/8 tal harei 20/9, tapa phần mềm VNEID, Công an TP Hồ Chí Minh hu mboh 607 mbang urang mboh yau njom COVID-19 nao tapa dom bilai pasang iek dalam ban raya. Dalam nan hu 406 urang nao tapa rilo bilai nan ye bruk khan brei thau ka dom menuac njom ruak meda kateik angaok gauk. Tui nan, Công an ban raya Hồ Chí Minh duah thau hu 199 urang, dalam nan hu 112 F0; 52 urang hadei di tuk duah thau mboh oh lac F0; 32 urang lac F0 thit ruak; dom urang daok veik daok hu duah thau, ngak brei cambaih laih.

Japon brei klauk mbang klauk ka 3 vắc-xin caga COVID-19 ka urang praong thun di akaok thun tal piah pacang caga siam jang haong dom biến thể bahrau mbuan njom mbak. Tui nan, bruk klauk vắc-xin mbang klauk ka 3 brei ka dom urang umo meng 65 thun tagok hu peih tabiak meng akaok thun hadei, salah bloh lac tal dom menuac hu ruak dahlau dalam rup saong puac di abih lac brei ka abih rahra. Lingiu di nan, dom urang y tế labik pacang jit hu klauk veik dalam thun ini, kayua ini lac dom menuac camereip abih hu klauk vaccine di Japon meng bilan 2. Adit dahlau, Mintri Y tế, Lao động saong Phúc lợi taneh ia ini hu tabiak bruk brei klauk veik ka dom urang klauk bloh mbang 2 hu takik di abih lac 8 bilan, gam tui panuac khan meng bruk roh duah brei mboh lac dom kháng thể khik caga, pacang veik Covid-19 trun meneing tui tukvak.

Harei kabroi, brei panuac di mbang ginum biai pakat glaong mbang nyaom ka 76 Đại hội đồng Liên hợp quốc, Tổng thống Biden brei thau lac Mỹ hu buh tabiak gac 15 tỷ đôla Mỹ brei ka bruk mesruh pacang COVID-19 di dunya, daong jien padai blei labaih 160 triệu mbang vắc-xin pacang COVID-19 brei ka dom taneh ia karei. Mỹ jeng hu blei 500 rabau mbang vắc-xin Phai-dơ/Bai-ô en tếch, daong tapa danak dak klah rabha vắc-xin dunya COVAX.  Tui ong Biden, vắc-xin di Mỹ hu payua tal 100 taneh ia. Mỹ meda ba tabiak dom sanya gac di Nyaom biai pakat glaong abih ka COVID-19 dunya kayua Tổng thống Biden dang tabiak peih di harei ini. Mỹ daok pachreih dom urang pan akaok dom taneh ia di dunya brei tapa dom jalan ngak piah palahik jit praong, dalam nan hu bruk khik ka 70% menuac sia dunya hu klauk vắc-xin di thun 2022.

Tổng thống barau di Iran Ebrahim Raisi harei 21/9 hu kadha ndom puac camereip abih  anak Đại hội đồng Liên hợp quốc, dalam nan urang pan akaok Iran hu panuac oh njauk hatai dom sarak di Mỹ. Tui ong Raisi, dom jalan taong phạt di Mỹ lac jalan mesruh metak bahrau. Min urang pan akaok Iran ndom lac, taneh ia Islam ini chreih chrai dalam dom bruk ginum biai haong dom taneh ia praong khang di dunya saong sa mbang tra ndom lac, bruk pambuak gauk halei ba tal bruk klaak dom lệnh trừng phạt jeng ba mai siam mekre./.

 Urang lang: M. Phương – 22/09 15:14:33