Dom akaok mintri ginum biai tapak song 63 tỉnh ban dalam negar 

Mesup ini (28/12)  rah tabiak nyom biai tapak rajaei haong 63 tỉnh ban dalam taneh ia. TBT, akaok negar Nguyễn Phú Trọng mai hu mbaok. Brei panuac peih nyaom biai, Thủ tướng Nguyễn Xuân Phúc brei thau, 5 thun tapa, dalam taneh ia daok patagok. Ta-eng thun ini, kayua jit ruak Covid-19, dalam tuk rilo taneh ia dalam bhum saong di dunya daok laik tame kan kandah, Việt Nam lac 1 dalam takik taneh ia khik hu bruk patagok. Ta-eng di bhum bhap bini bangsa takik, Đảng, karja dom puk palei hu buh brei dahlau phun jien meng kadung jien karja piah padang ngak jalan, labik bac da-a, bilai iek ruak saong dom labik piah peih ngak bruk ilamu… pabak bruk patagok kinh tế saong peih ngak sarak patrun kathaot.

Tổng Cục yaok pataom brei thau: ralaow pabui blei mbang dalam tuk Tết ini meda hu pabak ginup nan ye yaom oh glaong yau Tết thun sak takuk 2020. Urak ni, jit tả pabui châu Phi daok pacang hu, dom drei pabui ba nao am cuh klaak dalam thun ni labaih 86.000 drei, bier jang rilo dut saong thun 2019 (labaih 6 triệu drei). Tapon pabui di dalam negar daok hu pasiam veik, taong abih tapon pabui tal puac bilan 12 tui kuhria hu 23 triệu drei, tagok 17% duk haong tukvak ni thun blaoh. Dom bilan puac thun, yaom ralaow pabui tani tanat di tanut ala 80.000 đồng. Dah page ni (28/12), yaom ralaow pabui diuk di gah barak meng 76.000-80.000 đồng/kg, glaong jang labaih 4.000 đồng dut saong darak pasa gah maraong negar.

UBND TPHCM bahrau taduan brei peih ngak danak dak daoh tamia salam uan thun bharau 2021 di melam 31/12/2020. 1 labik cuh phao bingu biar di labik Công nghệ glaong (Quận 9) piah salam uan Sarak ka padang ban Thủ Đức. Ini lac labik cuh phao bingu ka 4 di bna raya, gam haong 3 labik lac: akaok jalan lubang tapa kraong Bei Gon (Quận 2) saong sang glaong Landmark 81 (quận Bình Thạnh), 1 labik cuh biar di Mblang bein Đầm Sen (Quận 11). Danak dak hu parang iek xiếc, ảo thuật, Vovinam, võ meng kan, võ nhạc saong ilamu aangaok jalan.

Jala pandiak 28/12, UBND quận 5, TPHCM brei thau, hu pacang cakak sa binah chung cư Sư Vạn Hạnh (phường 9, quận 5, TPHCM) kayua medil hu urang njom Covid-19 hu pambuak tal urang ruak 1440. Urang ruak 23 thun, lac urang Việt Nam bhian daok haong urang ruak 1440 di Myanmar, hadei di nan, dua urang tame negar Việt Nam suan hukum. Tapa pasang iek mboh lac urang  dương tính mbang ka 1 haong SARS-CoV-2. Pasak Y tế quận 8 hu khan brei thau ka 13 urang F1 di pak ni hu taom gaok haong urang ruak daok di chung cư Sư Vạn Hạnh, abih tih jeng hu brei daok karei pataom gauk saong daok mek mẫu dut iek Covid-19.

Tui pasak kuhria dahlau bruk langik tasik negar, meng harei 30/12, di dom tỉnh Nam Trung bộ, Tây Nguyên langik la-an, hu labik daok tame la-an, meng harei 31/12 di Nam bộ langik la-an tuk melam saong page mesup (meda hu ia kakua) mai meng langik la-an biak khang tuh tame taneh ia drei di tuk tame thun bahrau.

Tổng thống Mỹ hu mbaoh tangin tame sarak hukum pandar cai yaom 2 rabau 3 rituh tỷ USD hu Quốc hội negar ni brei tapa dahlau di nan hadei di dom harei sahneng kuhria. Dalam nan, sarak daong pacang Covid-19 yaom 900 triệu USD hu dom paok biyar tapak 600 USD ka yaok urang praong thun saong uranaih di Mỹ. Sarak jeng hu 284 tỷ USD daong ka danak dak daong khik jien bilan (PPP), pabak ka dom doanh nghiệp sit daok gaok kan kandah dom paok jien masre meda oh biyar veik piah daong ka doanh nghiệp sit nan dang veik hu saong piah ka urang ngak padieh bruk.

Cty jru AAstraZeneca di negar Anh brei thau, daok patagok janih vắc-xin Covid-19, meda pacang caga hu anek ruak bharau di SARS-CoV-2 daok tamuh khang di rilo taneh ia angaok dunya. Urak ini, jabat khik ramik jru di Anh daok pasang iek bruk klauk iek mbang puac abih, tui kuhria rajaei Anh meda brei adat pandar ka vắc xin A-xtra Dê-nê-ca dalam adit ini saong peih bruk klauk ka bol bhap rahra di akaok thun bahrau.

Rajaei Hàn Quốc harei 27/12 hu tabiak adat pakauk tame tabiak abih dom var raong glang manuk ada di dalam negar dalam 24 maong hadei di tuk rilo bruk njom ruak manuk ada njauk jru mek glaong rahtabiak. Ni lac mbang ka dua dalam bilan ni,adat pakauk nao mai hu ba tabiak haong dom var raong glang.Dom urang ngak suan  adat ni meda njauk guk 1 thun atau njauk taong phạt 10 triệu won (9.000 USD). Meng puac bilan 11 tal urak ni,Hàn Quốc am cuh klaak labaih 6 triệu 3 rituh ribau drei manuk ada njom H5N8 di dalam negar./.

Urang lang: Thu Thảo -mousaphuong -28/12