Bruk dut iek hu peih ngak di rilo labik 

Di mbang ngak bruk saong tỉnh Đồng Nai biar harei 27/6, Thủ tướng Phạm Minh Chính pandar brei ngak iek bruk brei urang F1 daok karei di sang, tacei pato dom urang ngak njauk tui bruk ba tabiak. Jalan nan jeng hu Thủ tướng ndem cambaic laic dalam var ngak bruk saong tỉnh Bình Dương dalam page  harei nan. Tui nan, dom tỉnh maong tame bruk rah tabiak di labik drei piah duah jalan brei pa-atah ka nyu lagaih, meda brei urang F1 daok karei di sang; padang ngak dom danak dak pathau khan piah urang ilamu tacei pato bhap bini pacang caga jit, abih di nyu  ngan saong dom urang ruak brei daok di sang. Thủ tướng ndem lac, bruk pacang caga lac bruk suai lavik, min tuk hu jit brei ngak dahlau, ngak catang, siam lagaih.

Mesup ini (28/6), Mintri Y tế brei thau, dalam 12 mon tapa, Việt Nam hu 97 urang njom Covid-19 dalam taneh ia, rilo di abih lac di TP.HCM hu 62 urang, dalam nan hu 94 urang dalam labik daok karei atau dalam labik pacang veik. Việt Nam urak ini hu 13.971 urang njom Covid-19 dalam taneh ia saong 1.769 urang meng negar lingiu tame. Kuhria tal mon 4 biar harei 27-6, abih tih hu klauk labaih 3 triệu 386 rabau mbang vaccine pacang Covid-19. Dalam nan dom menuac hu klauk ginup 2 mbang lac 157.136 urang.

Page ini, Jabat An ninh điều tra Công an tỉnh An Giang brei thau, bahrau ngak tui Hukum chap mek Dương Văn Tỷ, umo 56 thun, daok di huyện An Phú ka bruk “ Ba menuac tame, tabiak negar suan hukum”. Tui duah thau, harei 30/5/2021, Dương Văn Tỷ pandar gaiy pajeng  9 urang nao tame negar Campuchia suan hukum; dom harei dahlau hu ba dom urang nan tame negar Viet Nam, mek jien 15 trieu dong. Bruk ngak nan di Dương Văn Tỷ mikva mboh bloh khan brei karja thau.

Kuhria tal harei ini (28/6) lac harei ka 3 labaih 3.000 urang Cam palei Lạc Trị, xã Phú Lạc, huyện Tuy Phong, tỉnh Bình Thuận brei pacang veik piah pacang caga jit ruak Covid-19. Mikva ngak njauk tui adat ba tabiak. Tui UBND xã Phú Lạc, kayua ini lac tuk padai daok sraoh, nan ye mikva njauk tabiak hamu pruh jru. Dom gah chức năng hu brei ka mikva tabiak hamu, min brei vak veik angan, laik CMND, brei mon nao mai saong brei nao tapa bilai khik iek. Karja palei hu padang 3 kapul pabak pandap mbang, mikva tut angan blei, hadei di nan mai mek saong bayar jien.

Dalam dom bruk ngak  pachreih tui Harei Baoh sang urang Viet Nam, page ini 28/6, Kapol Liên hiệp Urang kumei Việt Nam pakat negar pambuak saong Viện Roh duah Baoh sang saong giới tính, Viện Hàn lâm Khoa học xã hội Việt Nam peih nyaom biai Ilamu negar “ Ba Sarak Nyaom roya 13 tame raidiuk: Pabak ilamu Baoh sang Việt Nam – Duah mboh saong jalan ngak”. Di nyaom biai, dom urang hu mbaok hu ndem meyai nao mai dom bruk roh duah ilamu saong bruk ngak hu ka makna baoh sang VN; brei thau dom asar siam meng baoh sang, lagaih saong bruk caong khin di urang kumei. Tapa nan, ba tabiak dom bruk jak ba ngan saong dom tanut cambaic laic lagiah piah peih ngak dalam tukvak anak tal.

Hãng Reuters brei thau, Iceland padeih abih dom bruk pasang iek jit Covid-19 hu ba tabiak dahlau di nan dalam taneh ia, 15 bilan hadei di tuk ba tabiak jalan ngak camereip abih. Tapa nan, Iceland jeng taneh ia camereip abih di châu Âu klaak abih bruk pacang cakak hadei di tuk brei pacadu tui 4 mbang.Dalam tuk nan, di Italy, Mintri Y tế taneh ia ini brei thau, Italy oh daok bruk giới nghiêm kayua Covid-19 hadei di tuk bhum palei puac abih padeih dom bruk patakik nao mai tuk melam meng harei 28/6.

Indonesia harei 27/6 hu labaih 21.000 urang birau njom Covid-19, glaong abih kuhria meng tuk tamuh jit ruak, dalam tuk dom sang iek ruak di negar ini oh daok labik ka urang ruak tame. Urak ini, abih tih urang ruak di Indonesia tapa 2,1 triệu; labaih 57 ribau urang metai. Rilo urang roh duah haduh hatai ka urang njom ruak saong metai kayua jit ruak praong di Indonesia-labik jit praong abih di Đông Nam Á, biak mai gah langiu daok rilo jang kayua bruk dut iek ruak di taneh ia ini daok biar. Indonesia brei klauk jru vaccine Covid-19 ka labaih 180 trieu urang dalam 270 trieu bhap bini di akaok thun anak, min mbiah tal ini, bahrau klauk jru ginup ka labaih 5% bhap bini.

Dom gah cứu hộ harei ini daok kham merat duah labaih 150 urang daok lahik meng bruk jaleih sang glaong 12 tal di ban Mai-am-mi (Miami), dalam bang Florida (Mỹ) harei 24/6 ngak brei 9 urang metai. Kapul daong bruk meng Ixraen haong dom chuyên gia meng Mê-hi-cô jeng hu mbaok tame kapul daong duah menuac daok lahik. Sa binah di sang glaong 12 tal jaleih trun di mon 1 meteh kreh melam 24/6 (tui mon pak nan) tuk rilo menuac daok ndih. Urak ini, gah chức năng daok duah thau makna di bruk nan./.

Urang lang: Ái Nghiêm- Mousaphuong -28/6