Dom tỉnh ban ngak njauk danak dak tapuk bac da-a bahrau ka tal bac 1

Mesup ini (28/8), Mintri Pato Megru peih nyaom biai online pakat negar pataom iek veik thun bac 2020-2021, ba tabiak bruk ngak ka thun bac bahrau. Dalam thun bac meng blaoh, jit COVID-19 tamuh tabiak di jaik abih dom tỉnh, ban, gah pato megru samar ramik veik danak dak thun bac; pataom ka nyu lagaih veik asal danak dak, peih bac da-a online… Asal bac da-a dom pakat hu pok paglaong, dom tỉnh ban ngak njauk danak dak tapuk bac da-a bahrau ka tal bac 1. Min kayua jit ruak rah tabiak srau kadau, anek saih brei bac online nan ye bruk bac da-a di dom labik oh siam, lagaih.

Di mbang ngak bruk haong kapul ngak bruk di Rajaei kayua Thủ tướng Phạm Minh Chính ba akaok, UBND tỉnh Đồng Nai pok panuac likau daong ka tỉnh 50 bác sĩ, 100 mac suak yava, 1 triệu test samar haong 2 triệu mbang vắc xin pacang COVID-19... Langiu di nan, tỉnh daok hu panuac likau Mintri Y tế, Mintri Quốc phòng haong dom tỉnh ban bhum gah barak brei urang jakar, urang lin, gah  y tế mai daong ka Đồng Nai pacang jit. Thủ tướng Phạm Minh Chính ndom lac, dom xã, phường brei jak ba rahra ngak njauk bruk pa-atah di gauk; khik kajap an sinh xã hội; daong ka bhap bini hu daong samar gah y tế.

Mintri Công Thương daok samar duah thau bruk pambuak tal panuac brei thau di gah Salamat pandap mbang Ireland ka mì Hảo Hảo haong miến Good di Acecook. Tui nan, Cty cổ phần Acecook Việt Nam samar brei thau jalan ngak tabiak 2 janih pandap mbang nan. Mintri Công Thương jeng hu tacei pato dom gah chức năng pambuak bruk pasang iek taong abih dom pandap di Cty cổ phần Acecook Việt Nam pablei dalam taneh ia, pasang iek bruk ngak tabiak pandap saong tacei tabiak dom bruk ngak chung meyah hu piah khik caga quyền lợi menuac blei mbang.

Sở LĐTB-XH TP.HCM brei thau, Sở daok peih bruk klauk vaccine COVID-19 ka 14.000 urang di 12 labik cai nghiện ma túy. Taong abih dom urang nan jeng hu klauk jru, oh kuhria urang ala 18 thun haong urang hu prein yava oh siam. Dom labik bảo trợ xã hội jeng hu klauk vaccine ka 6.000 urang taha, jaoh jo, daok sa drei, nao ban glai ban klo… Tal urak ini, taong abih 2.800 urang jakar, urang ngak di dom labik cai nghiện ma túy, gah bảo trợ xã hội hu klauk vaccine blaoh. Dom labik nan brei padeih taong abih dom bruk bac da-a, pato bruk ngak, dom bruk tư vấn, pato pakai salih tapa online piah khik njauk bruk pa-atah di gauk.

UBND tỉnh Bà Rịa - Vũng Tàu brei thau, piah daong ka doanh nghiệp haong po kapal ikan gaok kan kandah kayua jit Covid-19, Gilang pariak karja dhar tỉnh brei ramik veik tukvak bayar sraiy, khik tamo kapul mesraiy ngan haong 488 urang hu jien mesraiy haong jien laba daok tavak lac 1.162 tỷ đồng, brei mesraiy yaom laba lap jang tuk dahlau meng hu jit ruak, meng 1%-2% ngan saong yaom jien mesraiy bahrau 38.420 tỷ đồng… Dom gilang pariak jeng brei ramik veik tukvak bayar sraiy ka 20 po kapal kanduh pasei hu ngak tui Sarak 67 ngan saong yaom jien jaik 44 tỷ đồng. Gilang pariak sarak karja tỉnh daok tacei pato dom doanh nghiệp ngak harak gar mesraiy phun jien yaom laba 0% piah bayar jien bilan ka labaih 1.300 urang ngak, ramik veik bruk ngak.

Hội đồng bảo an Liên hợp quốc hu tabiak panuac lên án khang bruk taong tame mblang kapal haoh Kabul di Afghanistan ngak brei rilo menuac metai haong njauk rambus. Dom taneh ia dalam Hội đồng bảo an lên án bruk khủng bố saong ieu nan lac sa dalam dom jalan palai pajoa hòa bình haong sron mbon dunya. Bruk patuh mbom di mblang kapal haok Kabul di Afghanistan harei 26/8 ngak brei yaok ratuh menuac metai. Gah (IS) taduan lac kol nyu ngak bruk nan.

Ủy ban châu Âu hu panuac lac dom taneh ia dalam Liên minh châu Âu (EU) daok brei klauk mbang 3 vaccine Covid-19 meda dang anak dom bruk oh lagaih gah adat hukum kayua Gah Khik ramik jru tavao châu Âu (EMA) oh ka brei adat ka mbang klauk ini. Cty ngak tabiak vaccine jeng meda gam tal meyah oh hu siam lagaih ka urang klauk mbang 3 ini. EMA brei thau lac daok duah thau “janih karei” dalam vaccine di Hãng jru Moderna piah taong yaom iek bruk ini meda ngak kandah tal bruk pabak vaccine brei ka EU halei oh.

Cảnh sát Bangladesh brei thau, takik abih 19 urang metai hadei di tuk sa baoh ghe tabaleik angaok kraong di quận Brah-man-ba-ri-a (Brahmanbaria) tuk melam 27/8. Baoh ghe pajeng tuai nyu tabaleik hadei di tuk ginuh sa sruh kapal pajeng bak cuah saong njauk sa sruh kapal pajeng cuah karei ginuh meng gah likuk. Hu thau, baoh ghe pajeng rilo tuai, hu dom menuac patuah caluai hu tame gah, dom menuac metai oh ka thau cambaih hadom. Dom gah daok duah dom menuac lahik./.

Urang lang: M. Phuong – 28/08 12:02:12