Dalam praong prang, taong abih y, bác sĩ ba gauk daoh quốc ca

Pahadar 76 thun CM bilan 8 haong harei negar 2/9, mesup ini, Tổng Bí thư Nguyễn Phú Trọng hu mai cuh gilau, pahadar Chủ tịch Hồ Chí Minh di Sang 67 dalam labik inem mek Chủ tịch Hồ Chí Minh di Phủ Chủ tịch. Ndom biai haong urang jakar, menuac ngak di labik inem mek, Tổng Bí thư Nguyễn Phú Trọng caong lac dom urang jakar, dom menuac ngak, kham merat ngak bruk siam jang, yaih khan ginup jalan sahneng, hatung hatian hadah krah, jalan diukrai, bruk ngak di Wa Hồ ngan saong bhap bini dalam taneh ia saong ayut sahabat dunya mai ravang, duah thau ka Wa di labik inem mek ini.

Mesup ini 2/9, di Sang iek ruak Dã chiến ka 6 (phường An Khánh, TP Thủ Đức, TP.HCM) rah tabiak adat chào cờ di tuk uan harei negar 2/9. Dalam praong prang, taong abih y, bác sĩ ba gauk daoh quốc ca; rilo urang ruak ba gauk tabiak ban công pataom mbaok tame. Dalam mesup ini, hu labaih 400 urang ruak COVID-19 abih ruak hu nao sang. Sang iek ruak ini peih tabiak ngak bruk meng harei 11/7, hu 4.000 papan ndih, 131 bác sĩ haong labaih 200 điều dưỡng, mai meng dom sang iek ruak: Chợ Rẫy, ĐH Y dược TP, Phụ sản Trung ương, Đa khoa Thái Bình…

Mintri Y tế bahrau hu harak payua TP.HCM, Long An, Đồng Nai, Bình Dương ieu pathau khan chip bruk klauk vaccine tal harei 2/9, brei thau cambaih hadom menuac hu klauk 1 mbang, 2 mbang… piah tui nan hu jalan parabha vaccine anak tal. Tui Mintri Y tế, kuhria tal harei 31/8, TP.HCM hu brei labaih 9 triệu mbang vaccine COVID-19, Bình Dương 2 triệu 300 rabau mbang, Long An 1 triệu 600 rabau mbang, Đồng Nai 1 triệu 800 rabau mbang. Long An haong Đồng Nai ginup klauk mbang 1 ka 80% urang meng umo 18 thun tagok. Mintri Y tế hu panuac ieu dom tỉnh ban jhul khang bruk klauk vaccine.

Cục An toàn thực phẩm, Mintri Y tế brei thau, angaok darak pasar daok hu janih pandap hu angan ieu lac Pandap khik caga prein yava Xuyên Tâm Liên. Angaok pa-op hu vak : ngak tabiak saong taduan trách nhiệm ka pandap lac Cty cổ phần liên doanh Dược Mỹ phẩm Diamond Pháp, parabha kayua Cty TNHH Hằng Thu Pharma. Cục An toàn thực phẩm brei thau pandap nan lac pandap ja, saong khan brei gah Cảnh sát điều tra thau piah pasang iek, duah thau.

Kuhria tal mesup ini, Đồng Nai hu 25.442 urang njom ruak, 213 urang metai saong 1 sruh jit bahrau dalam phường Tân Hiệp, TP Biên Hoà. Tui Sở Y tế, sruh jit bahrau di Trại giam B5 dalam phường Tân Hiệp, Biên Hòa urak ini hu 21 urang guk dương tính; langiu di nan, hu 2 urang lac menuac ngak di labik daok karei di TP Biên Hòa haong 2 urang halan hatain daong bruk y tế meng tỉnh Lào Cai mai daong, njauk njom ruak. Urak ini Đồng Nai daok hu 888 urang test samar mboh dương tính daok cang iek veik meng Realtime RT-PCR.

Mintri Y tế Japon bahrau brei thau janih hu dalam dom vaccine pacang COVID-19 di Moderna brei padeih pandar di negar ini, lac aih pasei. Lambaok Moderna langayh lac bruk nan mai meng tuk pagam dây chuyền ngak jru ba tal paoh gauk di dom pasei, hu pandar dalam dom khớp nhân tạo. Daok hu janih hu duah mboh dalam dom klaok vaccine Moderna di Japon jeng lac nút cao su, meda kayua pacah klaok vaccine halei nan, blaoh nyu gam tame. Gah Moderna ndom lac vaccine jeng khik hu salamat.

Dom chuyên gia y tế di Australia khan lac, dom sang iek ruak di taneh ia ini jeng oh ka caga hu bruk peih pabah mbang kinh tế veik di Rajaei, dalam tuk dom urang njom COVID-19 daok dak harei dak tagok. Dalam adit blaoh, 2 bang: New South Wales haong Victoria brei kreik pabah mbang veik kayua dom menuac njom bahrau tagok rilo. Urak ini Australia hu klauk ginup ka labaih 36% dom menuac umo labaih 16, biar jang rilo duk haong dom taneh ia hu bruk kinh tế dreih nan.

Lầu Năm Góc bahrau tabiak panuac tah klaak bruk salamat jalan tasik bahrau di Trung Quốc, ndom lac Mỹ sanya khik ramik siam mekre, tani tanat dunya iek tui adat hukum saong sa bhum Ấn Độ Dương - Thái Bình Dương tự do, peih praong. Panuac nan hu ba tabiak hadei di tuk Trung Quốc ba pandar adat salamat jalan tasik meng harei 1/9. Dalam nan ieu dom janih kapal brei khan cambaih ka jalan nao angaok "biển Đông, tasik Hoa Đông haong dom pulao, đá ngầm karei gauk daok rah tui dom bhum tasik" bo Trung Quốc hu ba tabiak quyền ndok ngak po oh njauk./.

Urang lang: M. Phuong – 02/09 15:24:04