Bruk rah tabiak jit ruak hu pacang caga biak catang

Harei ini, UBTVQH brei amuk Nguyễn Thị Kim Ngân padeih ngak akaok QH, padeih ngak akaok Hội đồng bầu cử pakat negar. Dom urang QH brei amuk Nguyễn Thị Kim Ngân padeih ngak akaok QH tui jalan buh phiếu. Hadei di nan, UBTVQH ba tabiak dom angan piah pilih ruah pok ngak akaok QH bahrau, akaok Hội đồng bầu cử pakat negar di mesup harei paguh. Tui TTK QH Nguyễn Hạnh Phúc, jaik 25 urang ngak praong pan akaok hu QH brei padeih, pilih ruah, pok ngak atau njauk hatai brei ngak dalam mbang nyaom ini, dalam nan hu akaok QH, akaok negar, Thủ tướng; dom Phaok Thủ tướng, dom urang di Rajaei; dom Phaok akaok QH saong urang ka UBTVQH...

Laik di yaok menuac urang hu pandar salih ka  dom harak gar pagam tal  menuac urang nan tuk ngak harak gar pagam tal bruk sang dok, pablei salih sang danaok taneh rija. Tui nan, bhap bini hu  brei laik blaoh oh cang pandar  bản sao harak CMND, thẻ căn cước công dân, passport song dom harak gar karei di drei, tuk ngak harak gar pagam tal sang dok. Asar kadha ni hu ba tabiak dalam sarak  30/2021 ka bruk tacei pato peih ngak dom paka di hukum sang dok, hu ba tabiak pandar meng di harei  26/3. Min, bruk pandar laik yau nan tok hu peih ngak tuk cơ sở dữ liệu pakat negar ka rahra, cơ sở dữ liệu ka bruk tut angan tame bruk ngak mbang, tut angan doanh nghiệp hu pambuak pagam, hu peih tabiak pandar.

Mesup ini (30/3), Tòa án bhap bini TPHCM ba tabiak kaoh tui hukum bruk Dương Tấn Hậu (urang ruak ka 1342- urang likei duh tuai angaok kapal haoh di Hãng kapal haoh negar Việt Nam, ieu katut lac Vietnam Airlines) ka duas “Ngak brei njaom mbak jit ruak kan kandah ka anek menuac”. Hu thau, dalam tuk brei daok karei di labik daok, Hậu hu taom gaok, nao mbang menyum haong Liễu Minh Sang, Bùi Thị Mỹ Hạnh; nao pakacah sap Anh di sang bac Đại học Hutech. Pambuak tal urang ruak ka 1342- Dương Tấn Hậu, Pasak pasang iek ruak kik TPHCM mboh cambaih hu 3 urang njauk njom Covid-19. Harak tacei tabiak duas di Viện Kiểm sát bhap bini TPHCM ndom lac, bruk di Hậu lac biak trak, ngak kan kandah ka bol bhap rahra, jhak tal prein yava di menuac sia. Saong brei mboh dom khat lahik meng bruk njom Covid-19 ini, lac 4 tỷ 400 triệu, nan oh ka ndom tal dom khat lahik di labaih 2.000 menuac dalam TP.HCM gaok kan kandah meng bruk nan. Hadei di tuk pasang iek cambaih laih, HĐXX tabiak panuac kaoh duas Dương Tấn Hậu 2 thun guk, brei hưởng án treo . Gam haong nan brei thử thách 4 thun.

Tui pasak kuhria mboh dahlau bruk langik tasik pakat negar, harei 30/3, tanut tia cực tím (UV) praong abih di dom tỉnh, ban gah merong jeng daok dang di tanut mbuan jhak biak glong. Abih di nyu nan lac ban raya Hồ Chí Minh, ban Cần Thơ, ban Cà Mau jeng hu chỉ số tia UV di tanut 10.7 (tanut brei thau lac biak jhak). Piah pacang caga kanjah jhak di tia UV, bhap bini njauk cuk khan aow tangin atah, sambo sup, meda pacang hu pandiak, tuak muat prong jih piah pacang mbaok, takuai song tanye, cuk camin pacang pamndiak piah khik meta, mbang boh kayau rilo vitamin C, pandar  kem pacang pandiak gam gam tuk tabiak gah langui, meng di tuk langik rilo taginum.

Di tỉnh Sóc Trăng, gam haong pandiak bhang, ia di dom ribaong dalam mblang hamu di tỉnh tapen tasik ini daok tame tuk tabung glaong di ia mbak njom tame. Min karei jang yaok thun, urang nong Sóc Trăng thau caga pacang pandiak bhang, ia mbak meng rilo jalan siam, gheih. Pagap yau tuk tam padai ST25, mikva trun pajaih aval nan ye plaih hu ia mbak. Lingiu di ngak padai, mikva daok salih tapa pala bimao pong. Meng hu Karja daong saong hu urang jakar tacei pato ilamu, jalan iek glang, hadei di jaik 1 bilan, bimao pong kaoh pablei hu, yaom tagok tal 70.000 đồng 1kg, rilo sang urang ngak nong hu jien mek tame glaong jang bruk ngak padai.

Beir harei 29-3, Jabat khik ramik kênh đào Suez brei thau jak jeng dalam bruk dong ka kapan Ever Given gar di kênh đào Suez dalam luac 6 harei tapa.Cố vấn di akaok jabat khik ramik  Kênh song Cảng Suez, Mohab Mamish, brei thau sruh kapan urak ni  peih nduac hu angaok kênh song kênh Suez hu lanieng lanoi, oh njauk kapan Ever Given cagar veik. Kapan Ever Given biak prong nan tual hala doh Panama njauk cagar  kênh đào Suez harei  23/3 meng bloh ngak ka yaok rituh  kapan pajeng pandap nao mai jalan pablei salih prong ni njauk padeih abih. Khat lihik ka jien ndua yaok harei tui kuhria meng  12-14 triệu USD.

Mỹ harei kabroi tabiak panuac brei padeih Thỏa thuận khung ka Pablei salih saong buh jien tame ngak mbang bo Mỹ hu mbaoh tangin haong karja Mi-an-ma di thun 2013 kayua bruk srau kadau di Mi-an-ma. Lambaok gah pablei salih Mỹ Katherine Tai brei thau, bruk brei padeih nan hu ngak tal tuk halei “Rajaei kayua rahra pilih ruah hu mai ngak veik” di Mi-an-ma. Jeng dalam harei nan, hu thau lac, 15 taneh ia di Hội đồng Bảo an brei peih mbang nyaom di harei  31/3 gam haong Đặc phái viên Liên hợp quốc ka Mi-an-ma, amuk Christine Schraner Burgener.

      Sa likei dam di bang Maryland, Mỹ, harei  29/03 pametai amaik ame pak di sang drei song hadei di nan cuh metai 2 urang di sa labik pablei pandap dahlau di tuk pametai rup drei.Makna di bruk nan daok hu pasang iek ngak brei cambaih laih. Ni lac mbang cuh phao pametai rilo menuac urang mbang ka 3 dalam sa bilan tapa di Mỹ. Di akaok bilan, sa urang cuh pametai 8 urang dalam nan hu 6 urang kamei asal châu Á di bang Georgia. Anak bruk nan, Karja Tổng thống Joe Biden dok hu panuac ieu QH ngak khang jang bruk pasang eik phao ndao di Mỹ./.

Urang lang: Hanipha- Mousaphuong -30/3