Bruk TP.HCM haong dom tỉnh, thành dui atah tukvak paatah di gauk ngak ka dom doanh nghiệp ngak pandap kan kandah jang

Hadei di tuk nao pasang iek tapak bruk pacang caga jit di dom xã, phường, ban sit di TP.HCM, Bình Dương, Đồng Nai, Hà Nội, Thủ tướng Rajaei Phạm Minh Chính, Akaok mBan Tacei pato pakat negar pacang caga jit COVID-19 haong Mintri Thông tin - Truyền thông tacei pato brei padang Pasak tacei ba, pasang iek online ka bruk pacang caga jit meng jabat ngak bruk di Thủ tướng, pambuak tal 2.594 labik di dom xã, phường, ban sit di 19 tỉnh, ban daok pa-atah di gauk tui Sarak 16. Thủ tướng Phạm Minh Chính brei thau, meng labik ngak bruk, ong meda pasang iek dom xã, phường, ban sit tuk halei jeng hu, saong hu pang tapak dom panuac caong khin meng gah ala.

Mesup ini, di Hà Nội, Mintri ngak nong saong patagok palei pala peih nyaom biai online haong dom tỉnh, ban, Kapul nyaom gah pandap piah lang talaih dom kan kandah gah ngak pandap, pablei kaya ikan dalam tuk jit COVID-19. Tui yaok pataom, di ĐBSCL hu 120 dalam abih tih 449 sang mac ngak pandap brei padeih ngak, daok veik tok ngak meng 30% tal 40% prein ngak. Bruk blei kaya ikan jeng rah tabiak suai damuai ngak brei yaom trun khang. Bruk TP.HCM haong dom tỉnh, thành dui atah tukvak paatah di gauk hadei di harei 15/8, ngak ka dom doanh nghiệp ngak pandap kan kandah jang kayua jien piah ngak bruk “3 di labik” biak glaong.

UBND TP.HCM njauk hatai haong bruk daong taong abih jien bac học kỳ I thun bac 2021-2022 ka dom pakat bac meng mầm non tal trung học phổ thông (công lập  saong langiu công lập) kayua kan kandah di jit ruak COVID-19. Sở Pato Megru TP hu brei bruk jak ba dom labik pato pakai hu phun jien negar langiu trun jien bac ka anek saih dalam học kỳ ini.

Meng harei 5/9, menuac sia di Bình Dương tabiak jalan brei hu harak nao jalan. Tui UBND tỉnh, ini lac sa dalam dom jalan ngak piah khik catang bruk rahra tabiak jalan tuk oh hu bruk hagait, piah khik kajap bruk pacang caga jit ruak COVID-19 dalam tuk menuac njom ruak tagok glaong. Hu dom kapul urang oh cang hu harak nao jalan, dalam nan hu công an, quân sự, y tế; urang nao klauk vaccine; nao ierk ruak… Harak nao jalan di bhum palei halei tok hu nao mai dalam bhum palei nan.

Harei ini (4/9), ban Vũng Tàu, tỉnh BR-VT ngak bruk haong Cty truyền hình cáp Saigontourist (SCTV) dhar  Vũng Tàu piah pasang iek dom adat, ngak brei cambaih laih bruk menuac di Cty lac F1 nao mek jien cước, hadei di nan urang ini tapa test samar mboh lac F0. Bruk nan ngak ka labaih 400 rahra di phường 8 haong phường 2, TP Vũng Tàu jeng F1.

Biến thể Delta daok ngak brei tagok veik dom menuac njom COVID-19 di Mỹ, ba tal patagok bruk ngak biar jang tui kuhria mboh dahlau. Mintri Lao động Mỹ brei thau, gah oh ngak nong hu pabak 235 rabau bruk ngak dalam bilan 8, biar jang rilo duk haong labaih 1 triệu di bilan 7, dalam tuk patagok dom menuac njaom COVID-19 di Mỹ, hu 150 rabau urang njom dalam adit ini. Bruk klaih klaoh dom bruk ngak kinh tế meda oh hu, tuk meteh dom menuac sia hu klauk ginup vaccine, min bruk menuac njom COVID-19 tagok glaong meda ngak kan kandah tal bruk pilih ruah.

Pasak pacang caga haong Pasang iek jit ruak châu Âu daok pachreih dom taneh ia jhui samar klauk vaccine mbang ka 3 pacang COVID-19. Tui jabat y tế châu Âu, dalam tuk 70% urang praong di Liên minh châu Âu hu klauk pacang  COVID-19 ginup abih, ye vaccine njauk caik veik ka dom menuac mbuan njom ruak jang. Langiu di nan, bruk klauk mbang ka 3 jeng daok dalam tuk pasang iek, duah thau.

Hãng tin Reuters brei thau meng 3 khau tin di Taliban ndom lac, gah ini taong janeh kol di Panjshir saong pasang iek hu taong abih labik di taneh ia Afganistan. Urak ini oh ka thau panuac ini njauk halei oh. Bruk brei ngak dahlau di rajaei jaik hu tabiak mbaok di Afganistan lac pacang cakak bruk jaleih tayah di nền kinh tế. Afganistan jeng daok dang anak dom srau kadau meng dom gah cực đoan, dalam nan hu 1 dhar di kol (IS)./.

Urang lang: M. Phuong – 04/09 12:01:55