Mesup ni,  10-6, Mentri Y tế brei thau hu  70 urang njom COVID-19 bahrau, dalam nan hu  66 urang dalam negar. Hu tal  26/66 urang ni di  TP.HCM song ni jeng lac mbang camereip ban raya .HCM tapa  Bắc Giang, yam tapa tong abih dom tỉnh ban  ka urang njom bahrau. Công ty TNHH Pouyuen Việt Nam, quận Bình Tân, hu rilo urang ngak di abih  di  TPHCM hu 65.000 urang ngak, harei kabroi hu sa urang kamei ngak bru labik nan mboh yau njom ruak, ngak ka labaih  1.100 urang ngak brei padeih bruk. Labaih 100 urang ngak sa labik hong urang ngak ni  hu brei dok karei. Jiak 1.000 urang ngak dalam labik nan di  khu C hu dut iek drah  song brei dok karei di sang dalam 14 harei.

Akaok Mintri Y tế Nguyễn Thanh Longbahrau hu panuac caong Kadung jien uranaih Liên Hiệp Quốc (UNICEF) – gah pambuak bruk peih ngak danak dak COVAX – patagok bruk pabak vaccin tui jalan samar di abih. Tui ong Long, Việt Nam daok dang anak mbang jit ka 4 ngan saong bruk hu mbaok di biến chủng virus bahrau (chủng hu mboh mbang camereip di Ấn Độ), nyu njaom mbak samar saong ruak trak samar. Dalam tuk nan, yaom lac Mintri Y tế kham merat nao duah vaccin piah meng ini tal puac thun klauk ginup ka 70% rahra, khik hu bruk oh njom mbak ruak dalam bhap bini, min vaccin  daok mai biak suai damuai. Dalam dom vaccin Việt Nam hu pabak brei, danak dak COVAX sanya pabak 38 triệu 900 rabau mbang, min mbiah tal harei ini bahrau hu jaik 2,5 triệu mbang mai tal Việt Nam.

Hải đội dân quân thường trực camereip abih di bhum taneran krong Cửu Long hu pang tagok di harei 9/6, di Kiên Giang. Tui sarak di  Quân khu 9, hải đội daok dalam Bộ chỉ huy quân sự tỉnh Kiên Giang. Ni lac sa kapul di  dân quân khik iek tasik, hu brei bruk pathau khan jak ba bhap bini  peih ngak hukum sarak di karja ka quốc phòng, an ninh, ka bruk tong chap song khik caga kaya ikan. Gam haong nan, hải đội jeng nao pasang iek bhum tasik Kiên Giang, brei mboh quyền ngak po palao tasik pambuak haong bruk tong chap kaya ikan, dịch vụ tong chap ikan; pambuak bruk song dom gah  dalam bruk mesruh khik caga quyền ngak po palao tasik... Hải đội dân quân thường trực camereip abih di taneh ia hu padang tabiak di bilan 4, di tỉnh Bà Rịa - Vũng Tàu.

Kapul 6 urang pataom gauk mbang menyum, oh tui bruk patakik pataom rilo menuac piah pacang caga jit di phường 8, ban sit Cà Mau bahrau njauk taong  phat 90 triệu đồng. Dahlau di nan, melam 2-6, kapul pacang caga jit Covid-19 di phường 8, ban sit Cà Mau hu mboh kapul 6 urang ini daok menyum alak mbia di kuan Huyền Cát Tường. Lingiu bruk mbang menyum, dom urang nan daok mek loa thùng di động piah daoh takơ.

Tui rilo sang bein di  Bà Rịa–Vũng Tàu, kayua srau kadau di jit Covid-19, urak ni bruk pablei tabiak dom janih boh kayau gaok kan kandah , yaom rilo janih boh kayau yau durian,  bơ, pa-ok, chôm chôm… trun khang dut song yaok thun ngak ka urang nong duh hatai. Anak meta, gah ngak nong song patagok palei pala tỉnh Bà Rịa – Vũng Tàu pachreih mik va patagok pablei pandap tapa dom blah  thương mại điện tử. Daok suai lavik, tỉnh jak ba dom doanh nghiệp buh jien tabiak padang ngak sang mac  ngak pandap meng kaya nong hadei di tuk paik boh, piah paglaong chất lượng pandap, plaih hu bruk  “dong blei ” pandap kaya nong yau urak ni.

Melam 9-6, sa baoh sang praong, glaong nyu jaleih trun dalam tuk yah klaak di ban Gwangju, tây nam Hàn Quốc, jaleih trun sa sruh radaih buýt daok pataok di sang “ga” jaik công trường. Tal jaik maong 9 melam nan, duah mboh 9 urang metai saong 8 urang njauk rambus trak. Dom urang nan hu ba tal dom sang iek ruak daok jaik nan.. Dom urang nan jeng lac menuac nao angaok radaih buýt. Gah daong duah urang njauk bala daok duah iek hu urang ngak atau meuac nao jalan halei daok gar dalam labik jaleih nan halei oh. Urak ini ka oh thau kayau halei ba tal bruk nan.

Nhà Trắng brei thau Tổng thống Mỹ Joe Biden hu mbaoh tangin tame sarak  oh daok brei pakauk bruk pandar dom ứng dụng Trung Quốc yau TikTok, WeChat kayua karja di  Donald Trump batabiak . Tuk pakauk, oh brei pandar dom ứng dụng ni, ong Trum tổng thống dahlau daih ndom lac TikTok, hu labaih  100 triệu urang pandar di Mỹ song  WeChat lac meda ngak jhak tal an ninh negar  song meda pataom mek  dữ liệu di urang pandar piah payua ka Trung Quốc. Langui di nan, sarak di ong Biden jeng ieu tacei Mintri pablei salih  song dom jabat  liên bang pagam tal  padang jalan tacei pato piah khik caga  dữ liệu ka urang pandar di Mỹ.

Tui Hãng tin AP, anak bruk urang ruak daok trun, dom bang di Ấn Độ brei pacadu dom jalan pacang cakak ngan saong bruk pablei salih piah pachreih urang blei pandar. Min jeng daok rilo bang brei dui atah tukvak pacang cakak saong oh ka khin peih pabah mbang veik. Rajaei Ấn Độ sanya klauk jru brei saoh ka taong abih bhap bini. Mbiah tal harei ini, jaik 20,2% urang praong di Ấn Độ, dalam nan hu 40,8% menuac umo labaih 45 thun saong 44,9% urang mengaok 60 thun hu klauk takik abih lac sa mbang vắc xin COVID-19./.

Urang lang: M.P - H.Pha  10/6/2021