Mesup ni (20/8), mban tacei jalan pakat negar hu khan ka urang ruak bahrau di  Hà Nội. Nan lac urang ruak  994, lac likei , umo 87 thun , dok di  xã Khải Xuân, huyện Thanh Ba, tỉnh Phú Thọ. Harei 11/8, urang ruak njauk ruak  song harei  12/8 iek ruak di sang iek ruak  E, hadei di nan mai sang gauk gar di Cổ Nhuế, Bắc Từ Liêm, Hà Nội. Harei  13/8, urang ruak tame viện khoa Gan mật, Bệnh viện E. Harei 18/8, urang ruak hu mek drah payua ka Viện Vệ sinh Dịch tễ Trung ương dut iek song mboh dương tính dalam harei 19/8. Urak ni urang ruak brei dok atah, iek ruak di sang iek ruak  Bệnh Nhiệt đới Trung ương Anh. Kuhria tal  6tuk  harei 20/8: Việt Nam hu abih tih  654 urang njom  Covid-19 kayua njom mbak dalam negar.

Dalam melam 19/8, sang iek ruak E (Hà Nội) njauk pacang cakak veik abih sang iek ruak, pruh jru pametai anek ruak hadei di tuk hu urang njom Covid-19 dahlau daih hu taong ruak di labik ni. Camriep abih, CDC Hà Nội brei thau jaik 100 urang jaka y tế lac urang F1". Tui PGS.TS Lương Ngọc Khuê – akaok Cục khik ramik iek ruak (Mintri Y tế) hu tapak pato pakai di sang iek ruak E saong brei thau lac: Mintri hu tabiak dom jalan langyah, dalam nan oh klaak tapa bruk ngak di sang iek ruak E tagok tanut khẩn cấp. Mintri Y tế jeng hu khan ka tỉnh Phú Thọ pasang iek, duah dom urang hu pambuak tal urang ruak.

Biar 19/8, di ban  Đà Nẵng, Jabat rayo sap ndom Việt Nam bhum kreih negar daok hu jao pandap pacang khik rup pabhap di dom kapul nyaom , menuac urang ngak pahla di ban raya  HCM payua ka dom sang iek ruak  di ban  Đà Nẵng pacang caga jit ruak Covid-19.  Taong abih  8.000 khan ao cuk khik pacang rup pabhap, patiah  pacang blac draih  yaom jiak  1,2 tỷ đồng hu VOV gah kreih negar  payua brei ka dom sang iek ruak  dok di Đà Nẵng song sang iek ruak Đa khoa Trung ương Quảng Nam.

Liên hiệp HTX pablei salih ban raya HCM (Saigon Co.op) brei thau, meng harei ni (20/8), dom siêu thị Co.opmart, Co.opXtra meda gam gam peih danak dak trun yaom ngan saong kadha “hadah mbaok mata pandap Việt Nam – Sa tangin haong gauk pacang caga jit Covid-19” piah parabha dom kan kandah haong urang blei pandar. Nan lac mbang trun yaom ka 2 dalam bilan 8/2020, dui atah dalam 21 harei. Tanut trun tui kuhria meng 20%-50%. Abih di nyu lac lac, meng harei 25/8, dom siêu thị Co.opmart, Co.opXtra, Co.opmart SCA saong Fine Life meda alin biak rilo mblah pataik pacang pambah khan baai kháng khuẩn ka manuac sia hu thẻ thành viên di dalam negar, tui kuhria abih tih yaom labaih 50 tỷ đồng.

Hajan gam gam ngak khat lihik ka dom  tỉnh Tây Bắc dak harei dak tagok. Kuhria tal beir harei 19/8, ia sua, glut jaleih taneh di Lào Cai ngak brei 3 urang metai, lahik, 3 urang njauk rambuac; 2 urang di tỉnh Lai Châu song  01 urang di  Sơn La metai, yaok rituh boh sang  njauk ia dauk, khut tayah  atau panduan ba nao labik karei jip. Anak bruk kuhria mboh dahlau lac ribuk ka  4 hu hajan dalam dom harei anak tal, dom tỉnh ban hu pasang iek di dom labik mbuan si glut jaleih, ia ndik glong piah panduan ba bhap bini tal labik siam mekre. Bruk ngak nong di mik va urang nong di dom tỉnh Tây Bắc jeng gaok kan kandah song yaok rituh  héc ta padai, njam patam njauk khat lihik, rilo menuk ada athur rong njauk ia ba theik. Rilo jalan tỉnh, jalan pambuak dom xã njauk glut jaleih  kan kandah ka bruk nao mai.

Dalam dom harei tapa, Prang hu yaok ribau urang njom vi rút SARS-CoV-2 yaok harei. Harei 19/8, negar ni ngak jeng kỷ lục bahrau tuk hu dom urang njom virus dalam harei glaong abih kuhria meng labaih 3 bilan hadei di tuk klaak bruk pacang cakak. Taeng dalam adit tapa, France hu viek abih tih 16 ribau 747 urang njom virus tapa dut iek. Tui Mintri Y tế France, dalam 24 maong, negar ni hu bahrau 21 sruh jit, ba tal taong abih sruh jit Covid-19 hu duah mboh di dalam taneh ia tal 1062, kuhria meng harei 9/5 tal urak ni. Meng akaok bilan 3 tal urak ni, jaik 30 ribau 500 urang metai pambual tal jit Covid-19 di France.

Liên minh châu Phi brei thau, hu brei padeih bruk lac thành viên di  Mali di Kapul ini  hadei di mbang srau kadau pajaleih rajaei. Bruk brei padeih dui atah mbiah tal tuk hukum negar di  Mali hu pasiam veik, saong hu panuac ieu  peih palao Tổng thống Ibra-him Cây-ta (Ibrahim Keita) song dom urang jakar pakat glong karei karei. Sa urang jakar di jabat Thủ tướng Mali ndom lac Tổng thống song Thủ tướng njauk chap mek di  căn cứ quân sự di ban Kati. Dom urang lin hu mbaok tame bruk srau kadau nan hu tabiak panuac lac daok khik ramik sron mbon  tui jalan chuyển tiếp  chính trị song peih bruk palih ruah dalam tuk siam lagaih.

Gah angaok di kraong Trường Giang (Trung Quốc) daok dang anak mbang tabung glaong di ia sua praong abih kuhria meng thun 1981 tal urak ni, ngan haong lưu lượng ia duk hu lac 73.600 m3/giây. Tui kuhria harei ni (20/8), jalan ia nduac tuh trun danao di binek Tam Hiệp meda tagok tal tabung glaong 76.000 m3/giây – lac praong abih kuhria meng tuk bilai ni hu padang ngak. Piah pacang caga, dom binek di akaok halau kraong Trường Giang kayua kapul Tam Hiệp khik ramik meda pambuak gauk piah pacang caga ia sua, patrun trak damak dalam bruk pacang caga ia sua ka tỉnh Tứ Xuyên, ban Trùng Khánh jeng yau binek Tam Hiệp./.

Urang lang: Thu Thảo - H.Pha  20/8/2020 11:11:58