Tỉnh Cà Mau urak ini daok hu 14.000ha padai hè thu tasak daok cang yuak

Mesup ni (23/10), Quốc hội pang harak khan song ginum biai ka danak dak hukum pasiam, pabak dom paka di hukum pacang caga HIV/AIDS. Hu tabiak di thun 2006, Hukum pacang caga HIV/AIDS hu dong palagaih ka dom bruk pacang caga HIV/AIDS hu peih ngak prong, samu gauk song hu siam lagaih. Tal urak ni urang njom HIV dalam bhap bini hu cakak di tanut 0,3%. Min, hukum jeng mblo tabiak dom cuang kandah tavak tavaiy. Nan lac bruk taduan khaw tin urang njom HIV oh ka ngak jeng adat hukum ginup ka bruk pasang iek jit HIV/AIDS song nao jaik piah dong brei, iek ruak samar ka urang njom HIV; Sarak ka bruk dut iek ka uranaih umo ala 16 thun, urang ruak AIDS tukvak puac oh dok lagaih haong bruk urak ni. Dom panuac dalam ginum biai jeng mboh lac njauk pasiam veik hukum ni piah tagok jang bruk khik ramik, iek glang song paglong pren yava ka bhap bini dalam tuk vak bahrau.

Phó Thủ tướng Trịnh Đình Dũng bahrau njauk hatai haong panuac caong di Mintri jalan mbak pajeng ba ka bruk jao brei UBND TPHCM haong UBND tỉnh Tây Ninh pathau khan HĐ bhap bini, njauk gauk brei lambaok TPHCM lac jabat tabiak bruk padang ngak saong ngak dom harak gar, adat hukum ka danak dak padang ngak jalan cao tốc TPHCM – Mộc Bài. Jalan nan atah abih tih 53 km meteh (labik tapa TP.HCM lac 24 km, tapa tỉnh Tây Ninh lac 29 km meteh) hu ngak haong yaom jien jaik 13.614 tỷ đồng. Danak dak tui kuhria hu ngak tui jalan công tư pambuak gauk, pandar phun jien daong meng kadung jien karja palei piah bayar abih ka bruk mek taneh ngak jalan.

Tỉnh ủy Cà Mau hu harak payua ka dom huyện ủy, thành ủy, đảng ủy di Tỉnh ủy; dom Sở, dom mban, dom gah, Mặt trận negar, dom kapul nyaom pakat tỉnh song dom doanh nghiệp dalam tỉnh ka bruk oh taduan bingu tadhau yuh nyaom roya piah peih bruk patak pataom, pachreih tui bruk jak ba “Rik pataom dong ka urang nong Cà Mau njauk khat lahik kayua ia duak song bhap bini bhum kreik negar njauk hajan ia sua”. Tong abih dom kapul nyaom, jabat , dom mban dom gah puk palei peih bruk patak pataom pandar cai piah rik dong jien. Hu thau, Nyaom roya Đảng bộ tỉnh Cà Mau mbang ka (14)XVI, tuk vak 2020 – 2025 rah tabiak meng harei 26 - 28/10, hu mbaok di 351 urang, lambaok ka labaih 48.500 urang đảng dalam tỉnh.

Tui Sở Ngak nong saong patagok palei pala dom tỉnh bhum taneran kraong CL, dom harei jaik ini, yaom lac langik hu pandiak min bruk yuak padai njauk ia dauk di urang ngak nong jeng daok suai damuai kayua padai dauk lavik harei, jaoh jaleih, dauk dalam ia nan ye jamriak jan yuak oh cakak hu, dalam tuk nan menuac pah yuak hu takik. Tỉnh Cà Mau urak ini daok hu 14.000ha padai hè thu tasak daok cang yuak. Gah công an, quân đội, biên phòng hu daong bhap bini yuak hu 2.870ha padai. Bạc Liêu jeng hu labaih 20.000ha padai thu đông, hè thu muộn njauk khat lahik. Tui dom urang blei padai, ia dauk ngak ka padai oh siam nan ye yaom blei trun khang, 1.000 tal 1.500 đồng sa kg. Rilo urang ngak padai brei thau, bilan padai ini khat trak. 

Gah chức năng duah hu gac sa atau urang ngak dok gar veik di thuỷ điện Rào Trăng 3. Ni lac atau ka 3 dalam 17 urang ngak lahik kayua patau haluk lam sre di danak dak thuỷ điện Rào Trăng 3 song hu ba nao sang iek ruak Trung ương Huế khik piah cang gauk gar mai ngak harak gar taduan mek, hadei di nan ba nao kubo di palei. Tỉnh Thừa Thiên - Huế brei thau, tapa dut iek ADN 2 urang metai dahlau di nan duah mboh di thủy điện Rào Trăng 3, lac sa urang di tỉnh Quảng Trị song sa urang karei di tỉnh Đắk Nông.

Dah page 23/10, 2 ứng cử viên Donald Trump haong Joe Biden hu mbang ndom puac nao mai puac abih dahlau di harei bầu cử 3/11. Dom kadha hu ba tabiak ndom biai dalam 90 minit hu bruk mesruh pacang Covid-19, bruk neh rabha bangsa di Mỹ, biến đổi khí hậu, sron mbon palei negar... Urang ba danak dak nan, lac nhà báo vak gah tin tức Nhà Trắng di kênh NBC News, amuk Kristen Welker. Amuk Walker lac menuac pilih ruah asal kadha ndom biai nao mai iek tui dom bruk rah tabiak di anak meta. Hu blaoh 41 triệu cử tri Mỹ nao buh phiếu tapa thư atau nao tapak tal dom labik buh phiếu, lac rilo di abih tapa nan brei mboh bruk sangka praong di cử tri anak dom kadha praong di taneh ia Mỹ saong dunya.

Jabat pasang iek song pacang caga jit ruak châu Âu brei thau dalam labaih 30 negar châu Âu, urak ini tok dok hu dom negar oh ka dang anak bruk njom Covid-19 mbang ka 2, dok veik jeng lac dok dalam tanut báo động meriak. Urak ni, tok hu 1 negar lac Na Uy oh ka peih bruk pacang cakak, 3 negar karei lac Phần Lan, Hy Lạp song Đức di tanut “klik kruac”, nan lac brei hu jalan pacang caga, dok veik tong abih dom negar karei hu salih tapa “sambo meriak”, tanut báo động glong di abih kayua jit Covid-19.

Panuac bahrau ini di gah Y tế dunya (WHO) hu pakhang jang panuac tabiak meng sa roh duah bahrau hu Mintri Quốc phòng Mỹ ba tabiak, lac bruk njom virus SARS-CoV-2 angaok dom mbang par lac biak biar meyah tuai cuk siuk pacang mbaok, kayua dom jalan thông gió angaok kapal haoh biak siam meda halang hu vi-rút saong vi trùng biak samar. Min WHO jeng hu panuac lac bruk njom mbak jeng meda mbuan rah tabiak meyah tuai nao kapal haoh ruak atau thau lac ruak Covid-19 ye oh brei tagok kapal haoh./.

Urang lang: Hani Pha – Thu Thảo – 23/10 15:21:49